Juan 15
15
Jesús uva kꞌarrakꞌa bɨ
1Uchiadai naaweda, Jesupa mãgaji:
—Mɨ uva kꞌarrakꞌa pipɨara bɨda aji. Jõdee mɨ Akꞌõre chi uva uuda akꞌɨparikꞌa bɨ. 2Mɨ kꞌarradepema jɨ̃kꞌara chau–e bɨ pɨrã, irua mãgɨ́ jɨ̃kꞌara tꞌɨapꞌetꞌaapari. Jõdee chi jɨ̃kꞌara chauparidepema jua chakꞌeerã jaritꞌaapari mãgɨ́ jɨ̃kꞌara waapɨara chaumerã. 3Parã mãgɨ́ jɨ̃kꞌara jaridákꞌata pꞌanɨ mɨa ũraa jarada ijãadapꞌedaa perã. 4Mɨ ome araa pꞌanapatáatɨ mɨ parã ome araa baparikꞌa. Uva jɨ̃kꞌara ichi itu chaukꞌaa chi kꞌarra ome araa ba–e pɨrã. Mãga pɨkꞌa pãchi kꞌĩradoopa mɨa oopi bɨkꞌa pꞌoyaa ooda–e, mɨ ome araa pꞌanapataada–e pɨrã.
5ʼMɨda aji, uva kꞌarrakꞌa bɨ. Jõdee parã chi jɨ̃kꞌarákꞌata pꞌanɨ. Uva jɨ̃kꞌara pia chauparikꞌa araa bakꞌãri chi kꞌarra ome, mãga pɨkꞌa parã mɨ ome araa pꞌanapataadakꞌãri, ne–inaa chokꞌara mɨa oopi bɨkꞌa oopataadaitꞌee. Mamĩda mɨ wẽe parãpa maarepida ooda–e pai mɨa oopi bɨkꞌa. 6Uva jɨ̃kꞌara chaukꞌaa bakꞌãri, tꞌɨapꞌekꞌoodapꞌeda, pꞌe nɨ̃bɨpata akꞌõrejĩrumaa pꞌookꞌoodaimerã. Maapꞌeda tꞌɨpɨtaude batꞌakꞌoopata paakꞌoodaimerã. Mãga pɨkꞌa paitꞌee chi mɨ wẽe beerã ome.
7ʼMamĩda parã araa pꞌanaruta pɨrã mɨ ome mãikꞌaapa mɨ ũraade jara bɨkꞌa ooruta pɨrã, ɨtꞌaa iidipatáatɨ pãchia iidi kꞌiniata. Mɨ Akꞌõrepa ooitꞌee parãpa iidi pꞌanɨkꞌa. 8Parãpa ne–inaa chokꞌara mɨa oopi bɨkꞌa oodakꞌãri, akꞌɨpipata wãara mɨ kꞌõpꞌãyoorã. Mãga unudakꞌãri, awaraarãpa “Tachi Akꞌõre jõmaarã kꞌãyaara waibɨara bɨda” adaitꞌee. 9Mɨ Akꞌõrepa mɨ kꞌinia iru baparikꞌa, mɨa aukꞌa parã kꞌinia iru bapari. Mɨ ome chikꞌinia pꞌanapatáatɨ. 10Mɨ, mɨ Akꞌõre ome chikꞌinia bapari, mɨa oopari perã irua jara bɨkꞌa. Mãgá parã mɨ ome chikꞌinia pꞌanapataadaitꞌee, mɨa jara bɨkꞌa ooruta pɨrã.
11ʼMɨa mãga jaraji mɨkꞌa parã tꞌãri o–ĩa pꞌanapataadamerã. Kꞌinia bɨ parã tꞌãri o–ĩa pꞌanapataadamerã. 12Mɨa nãga jara bɨ: Chikꞌinia pꞌanapatáatɨ, mɨa parã kꞌinia iru baparikꞌa. 13Eperãpa chi kꞌõpꞌãyo audú kꞌinia iru bakꞌãri, iru kꞌaripapari ma kꞌaurepa piuru pɨjida. Ma kꞌãyaara apidaapa awaraa eperã audupɨara kꞌinia iru pꞌanada–e pai. 14Parã wãara mɨ kꞌõpꞌãyoorã, mɨ ũraa jara bɨkꞌa oo wãruta pɨrã. 15Waa mɨa parã tꞌɨ̃jara–e “mimiapataarã”, mimiaparipa kꞌawa–e bairã ne–inaa jõmaweda chi poropa oo bɨ. Ma kꞌãyaara tꞌɨ̃jara bɨ “mɨchi kꞌõpꞌãyoorã” mɨa kꞌawapida perã jõmaweda mɨ Akꞌõrepa mɨmaa jarada. 16Parãpa mɨ jɨrɨtꞌerada–e paji. Mɨata parã jɨrɨtꞌeraji mãikꞌaapa awara bɨji mɨ ũraa jarateenadamerã. Mãgá parã kꞌaurepa eperãarãpa ma ũraa ũridapꞌeda, mɨde ijãadai mãikꞌaapa ichita pꞌanapataadai mɨ ome. Ma awara ma jarateenadapꞌedaa kꞌaurepa parãpa mɨ tꞌɨ̃de ne–inaa iididakꞌãri mɨ Akꞌõremaa mɨchideerã perã, irua ooitꞌee parãpa iidi pꞌanɨkꞌa. 17Waya mɨa jara bɨ: chikꞌinia pꞌanapatáatɨ.
Ijãadakꞌaa beerãpa Jesús ichideerã ome kꞌĩra unuamaa iru pꞌanapata
18—Mɨde ijãadakꞌaa beerãpa parã kꞌĩra unuamaa iru pꞌanɨ pɨrã, kꞌirãpátɨ mɨta naapɨara kꞌĩra unuamaa iru pꞌanapachida. 19Parã pꞌanadapꞌedaa paara ãchi pꞌanapatakꞌa, ãchia parã kꞌinia iru pꞌanakꞌajida ãchideerãkꞌa. Mamĩda parã ãchideerã–e. Mɨata parã jɨrɨtꞌeraji ãchi kꞌãyaara awara pꞌanapataadamerã. Maperãpɨ ãchia parã kꞌĩra unuamaa iru pꞌanapata. 20Kꞌirãpátɨ mɨa jarada: “Mimiapari ichi poro waibɨa kꞌãyaara waibɨara bɨ–e.” Mɨ jɨrɨ nipapatapꞌedaakꞌa ichiaba parã jɨrɨ nipapataadaitꞌee. Jõdee mɨa jarateeda ijãajida pɨrã, parãpa jaratee pꞌanɨ ichiaba ijãadaitꞌee. 21Mamĩda ma kꞌãyaara audupɨara parã jɨrɨ nipapataadaitꞌee, mɨchideerã perã. Mãga oodaitꞌee kꞌawada–e pꞌanadairã kꞌaipata mɨ pëiji.
22ʼMɨa Akꞌõre netꞌaa jara che–e pada paara, ãrapa kꞌĩsiada–e pꞌanakꞌajida ãchia pꞌekꞌau kꞌachia oopata. Mamĩda mɨ Akꞌõrepa jara pëida jara cheji. Mapa ɨ̃rá “taipa kꞌawada–e pꞌanɨda” adaikꞌaraa bɨ. 23Mɨ kꞌĩra unuamaa iru pꞌanɨɨrãpa mɨ Akꞌõre jida kꞌĩra unuamaa iru pꞌanɨ. 24Unuda–e pada paara mɨa ne–inaa ooda awaraarãpa pꞌoyaa oodakꞌaa, ãchia pꞌekꞌau kꞌachia ooda–e pakꞌaji Tachi Akꞌõre kꞌĩrapite. Mamĩda ãchia mãga unujida mĩda, atꞌãri mɨ, mɨ Akꞌõre ome kꞌĩra unuamaa iru pꞌanɨ. 25Pꞌasaji ãchi ũraa pꞌãdade jara bɨkꞌa:
‘Ãchi kꞌinia mɨ kꞌĩra unuamaa iru pꞌanapachida.’ (Salmos 35.19)
26ʼMamĩda mɨa awaraa Kꞌaripapari pëiitꞌeeda aji. Mãgɨpa wãara aupaita jarapariitꞌee. Mãgɨ́ uchiapari Tachi Akꞌõredeepa, iru Jaure perã. Mãgɨ́ chekꞌãri, irua mɨ kꞌawapiitꞌee eperãarãmaa. 27Parãpa pida mɨ kꞌawapidaitꞌee awaraarãmaa, mɨde ijãadakꞌãriipa mɨ ome pꞌanapatapꞌedaa perã.
Currently Selected:
Juan 15: sjaB
Highlight
Share
Copy
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.