Hechos 25

Pablo Festo kꞌĩrapite

1Festo pachekꞌãri Cesarea pꞌuurude ma eujã akꞌɨpari bade, kꞌãima õpee mama baji, Jerusalendee wãi naaweda ma pꞌuuru kꞌawade. 2Mama bɨde pꞌaareerã poroorãpa mãikꞌaapa judiorã poro waibɨarãpa Pablo ãpɨte pedeejida. 3Chupɨria iidijida Festomaa Pablo Jerusalendee pëimerã. Mãga oojida pedeetee pꞌanadapꞌedaa perã ode peetꞌaadaitꞌee. 4Mamĩda Festopa mãgaji:

—Pablo preso bɨda aji, Cesarea pꞌuurude. Taarã–ee mɨ araa wãitꞌee. 5Mapa parã poro waibɨarã mɨ ome pë́itɨ. Mãgá ma eperãpa ne–inaa kꞌachia ooji pɨrã, iru kꞌĩrapite ãchi nepɨra jaradayada aji.

6Festo Jerusalende baji tomia aba maa–e pɨrã kꞌãima diez. Maapꞌeda cheji Cesarea pꞌuurudee. Ma pacheda norema charra mimiapari tede su–akꞌɨ beeji mãikꞌaapa Pablo atapiji. 7Pablo pakꞌãri, judiorã Jerusalendeepa cheepurudapꞌedaarãpa ɨmɨateejida Festomaa. Mamĩda ãchia jara pꞌanadapꞌedaa pꞌoyaa akꞌɨpida–e paji. 8Jõdee Pablopa pꞌanauji:

—Mɨa pedee kꞌachia jara–e bɨda aji, judiorã ũraa Moisepa pꞌãda ãpɨte maa–e pɨrã Tachi Akꞌõre te waibɨa ãpɨte. Ma awara César ãpɨte pedee kꞌachia jara–e bɨda aji.

9Mamĩda Festo, judiorãpa ichi tꞌo pꞌanadamerã, Pablomaa mãgaji:

—¿Wã kꞌinia bɨkꞌã aji, Jerusalendee, mɨa jãma pɨ nepɨra akꞌɨmerã?

10Pablopa pꞌanauji:

—Nama mɨ nepɨra akꞌɨdaipia bɨda aji, nama mɨ César charra kꞌĩrapite bairã. Pɨa kꞌawa bɨ mɨa judiorãmaa ne–inaa kꞌachia oo–e bɨ. 11Kꞌachia oo bɨ pɨrã, mɨ peedaipia bɨ. Waawee–ee piutꞌee. Mamĩda kꞌachia oo–e bɨ pɨrã, apidaapa mɨ ãchimaa teedaikꞌaraa bɨ. Mapa mɨa kꞌinia bɨda aji, Cesarpa mɨ nepɨra akꞌɨmerã.

12Mãpai Festo pedeeji ichi ũraapataarã ome mãikꞌaapa mãgaji Pablomaa:

—Cesarmaa wã kꞌinia bairã, pɨ irumaa wãitꞌee.

Festopa Pablo nepɨra jarada Rey Agripamaa

13Maapꞌeda, taarãpai Rey Agripa chi ɨ̃pewẽra Berenice ome Festomaa pꞌasiade wãjida Cesarea pꞌuurudee. 14Taarã pꞌanadapꞌedaa perã, Festopa Pablo nepɨra nepɨrɨji reymaa:

—Nama bɨda aji, Felixpa preso bëida. 15Jerusalende nipakꞌãri, pꞌaareerã poroorãpa mãikꞌaapa judiorã poro waibɨarãpa mɨmaa jarajida Pablo ome nepɨra iru pꞌanɨ. Maapꞌeda jarajida peepitꞌaamerã. 16Mamĩda mɨa pꞌanauji Romadepema charraarãpa chĩara peepidakꞌaa, ma presopa ichi kꞌapꞌɨa pedee–emaa ichi ɨmɨateepataarã kꞌĩrapite. 17Tꞌẽepai ãra nama pachedakꞌãri, aɨ norema mɨ charra tede wãji maapꞌeda aneepiji ma preso. 18Mamĩda iru ɨmɨateepataarãpa pꞌoyaa wãarada ada–e paji ma preso kꞌĩrapite. Mɨa kꞌĩsia baji Pablopa kꞌachia oo bɨ. Mamĩda mãga–e paji. 19Jĩpꞌa jara pꞌanapachida ãchia ijãa pꞌanɨ Akꞌõre Waibɨapa ooda mãikꞌaapa Jesuda a pꞌanɨ piuda; mãgɨta Pablopa chokꞌai bɨda a bɨ. 20Mɨa kꞌawa–e pada perã sãga ooi, Pablomaa iidiji wã kꞌinia bɨ pɨrã Jerusalendee, jãma mɨa na nepɨra waya pia akꞌɨmerã. 21Mamĩda ichia chupɨria iidiji Tachi Rey Waibɨa Cesarpa na nepɨra akꞌɨmerã. Mapa mɨa jaraji atꞌãri preso bamerã, Romadee pëiru misa.

22Mãga ũrikꞌãri, Rey Agripapa mãgaji Festomaa:

—Mɨa ma eperã pedee ũri kꞌinia bɨda aji.

Mãpai Festopa pꞌanauji:

—Nu iru pedee pɨa ũriyada aji.

23Aɨ norema Agripa Berenice ome, reyrã chi–oo jõmaweda jɨ̃dapꞌeda, tꞌĩujida eperãarã chipꞌedaipata tede. Ichiaba tꞌĩujida soldaorã poroorã mãikꞌaapa ma pꞌuurudepema poro waibɨarã. Mãpai Festopa Pablo aneepiji ãchi kꞌĩrapite. 24Festopa mãgaji:

—Rey Agripa mãikꞌaapa kꞌõpꞌãyoorã nama see nɨ̃bɨ, pãchi kꞌĩrapite na eperã unu pꞌanɨ. Judiorã jõmaarãpa ichi ɨmɨatee chepata Jerusalendeepa mãikꞌaapa Cesarea pꞌuurudeepa. Jõmaarãta biukꞌadaipata mɨa ichi peepitꞌaamerã. 25Mamĩda mɨ–itꞌee irua kꞌachia oo–e bɨ piumerã. Ma awara ichia chupɨria iidida perã Cesarpa ichi nepɨra akꞌɨmerã, mapa mɨa mamaa pëiitꞌee. 26Ichi nepɨrade mɨa ne–inaa kꞌachia unu–e pada perã, pꞌã pëiitꞌee wẽe bɨ mɨchi poro waibɨa Cesarmaa. Mapata mɨa aneeru na eperã parã kꞌĩrapite mãikꞌaapa ma kꞌãyaara pɨ kꞌĩrapite, Rey Agripa. Taipa kꞌawaadakꞌãri kꞌãare kꞌachiata oo bɨ, mɨa pꞌã pëiitꞌee reyrã poro waibɨamaa. 27Mɨ–itꞌee pia–e pɨkꞌa bɨ pëiitꞌee preso, jara–ee kꞌãare kꞌachiata ooji.

Currently Selected:

Hechos 25: sjaB

Highlight

Copy

Compare