YouVersion Logo
Search Icon

MARKUS 1

1
Ha' tebaraa' éh benara' Yohanes Batis
(Mat. 3:1-12, Luk. 3:1-18, Yoh. 1:19-28)
1Kekat ha' lem surat iteu' inah éh bara' Rengah Jian tong Yésus Kristus éh Anak Allah. 2 Tong bu'un Rengah Jian inah, pu'un éh pekua' barei' éh senurat nabi Yesaya sahau,
Ka' ha' Allah pané, Iteu' néh lawah Ké'.
Akeu' nyohoo' lawah Ké' tai saa' tenah Ko',
ke' néh petenup jalan Ko'.
3 Pu'un jah kelunan mejui tong ahang tana', ka' ha' jui néh,
Petenup jalan ngan Tuhan ngan pepejek jalan Néh, ha' néh.
4Pekua' ha' Yesaya nah, kenat néh Yohanes Batis nah hun néh tai ahang tana' nah, pu'un éh ngebatis kelunan ngan nebaraa' réh, ka' ha' néh, Jian keh piso jin penyala' keh ngan batis dokoo' Allah omok mega' penyala' keh, ha' néh. 5La'ah pinaa' kelunan jin tana' Yudea ngan jin' leboo' ja'au Yérusalem, tai tavin Yohanes ke' réh menéng ha' néh. La'ah irah ngakun penyala' réh ngan Tuhan, boh Yohanes ngebatis réh dalem baa' Yordan.
6 La'ah pakai Yohanes bulun ka'an unta, ngan jeret é'éng néh, kulit ka'an, la'ah penguman néh karah ngan nyak layuk. 7Ka' ha' néh. Pu'un jah kelunan éh juk tuai kepéh jin la'o ké' teu' dat, kelunan inah éh pelapah ja'au ngaran jin akeu', savéé' muka talei' kasut Néh péh ku' bé' tekep. 8Pu'un akeu' ngebatis ka'ah dalem baa' awah, Iah nah da' ngebatis ka'ah neu' Sahéé' Allah, ha' Yohanes.
Tong Yésus benatis Yohanes
(Mat. 3:13-17, Luk. 3:21-22)
9Bé' lebéé' la'o inah, tuai Yésus jin leboo' Nasaret éh tong tana' Galilia, ke' Néh tavin Yohanes nah. Pelapah Yohanes ngebatis Éh lem Baa' Yordan. 10Tovoo' Yésus musit jin baa' nah, pu'un Éh na'at langit pukap ngan Sahéé' Ni'ai tuai tuhun tong Néh éh layan néh barei'-okoo' juhit punai. 11 Tioo pu'un jah ha' jin Allah ka', Ka'au' iteu' néh Anak Ké' éh kemurung Ké'. Ka'au' éh ngejian kenin Ké', ha' inah.
Yésus tenupat Sitan
(Mat. 4:1-11, Luk. 4:1-13)
12Tovoo' inah péh Sahéé' Ni'ai mihin Yésus tai tong ahang tana'. 13La'ah Yésus pu'un tong ahang tana' pat poloo' dau kelebéé' néh, ngan kelebéé' inah pu'un Sitan tupat Iah. Ka'an lajam péh pu'un sinah, bang meliket mihau Yésus.
Tong Yésus tebai pat kelunan kivu Éh
(Mat. 4:12-22, Luk. 4:14-15, 5:1-11)
14La'o Yohanes Batis kenamit réh tong lamin tutup, Yésus tai tong tana' Galilia ke' Néh bara' Rengah Jian tong Allah ngan réh. 15 Ka' ha' Néh, Danii' jaka' hun Allah Pengeja'au. Piso keh jin penyala' keh ngan ngelan Rengah Jian iteu', ha' Néh.
16La'ah Yésus lakau déhéé baa' Banget Galilia, inah Iah na'at duah kelunan ngejala', jah Simon ngan padéé' néh Anderias, uban pohoo' kereja' rawah inah, inah éh ngejala'. 17Ka' ha' Yésus ngan roh, Jian koh kivu Akeu', boh Akeu' nebaraa' koh tong jalan koh omok pitah kelunan éh tawang ngan mihin réh tavin Akeu', ha' Néh. 18Pelapah rawah modoo' jala' roh ke' roh kivu Yésus.
19Lakau Yésus kepéh bé' makat juu' jin sinah, inah Iah na'at duah kelunan éh pepadéé' kepéh, inah éh Yakub rawah Yohanes éh anak Sabedeus. To roh tenep jala' lem alut roh. 20Pelapah Yésus tebai rawah kivu Iah kepéh. Boh rawah pokoo' tamen roh dalem alut ngan kelunan éh pegaji' nah ke' roh tioo kivu Yésus.
Tong kelunan éh nasek balei'
(Luk. 4:31-37)
21Lakau Yésus réh teleu' inah tai leboo' Kapernaum. Tovoo' Dau Posot tai Yésus tong lamin sebayang Yahudi ke' Néh nebaraa' kelunan. 22 Béé kenin réh menéng ha' tebaraa' Néh, uban bé' Éh barei' irah guru éh nebaraa' tong Surat Musa nah awah, pu'un Éh nebaraa' réh ngan pu'un penyukat.
23Tovoo' inah masek jah kelunan éh nasek balei', tong lamin sebayang nah, ngeradau kelunan éh nasek balei' inah, ja'au ha' néh, 24ka'au' Yésus éh jin Nasaret, ineu' juk neu' Ko' tong améé' tu' da'? Ko' juk kebéé mé' énéh da'? Akeu' jam Ka'au', Ka'au' néh éh Lawah éh ni'ai jin Allah, ha' néh.
25Pelapah Yésus meta' balei' inah, Mai kahut, musit ke' jin kelunan iteu', ha' Yésus.
26Balei' nah, maneu' kelunan inah riet, ngeradau éh ja'au ha', boh éh tioo musit jin kelunan inah. 27Béé kenin irah pinaa' nah, avéé' irah peteteng belah irah ke', Ineu' itu' da'? Ha' tebaraa' éh maréng itu' da'? Kelunan iteu' nah ri' pu'un penyukat néh nyohoo' balei' nah pega', pega' mu'un ke' éh kivu ha' néh.
28Kenat lah jalan rengah tong penganeu' Yésus ke' néh omok tutuh tana' Galilia.
Yésus peka'o pinaa' kelunan sakit
(Mat. 8:14-17, Luk. 4:38-41)
29La'ah musit Yésus ngan bakéh Néh jin lamin sebayang nah, ke' réh tai lamin Simon rawah Anderias, Yakub rawah Yohanes péh kivu réh tai. 30Pu'un kivan Simon nah éh redo pegen, uban néh sakit darem. Hun Yésus avéé' sinah boh réh bara' éh kenat ngan Néh. 31Yésus tai ngan redo inah, Iah ngamit ojoo' néh ke' Néh nolong éh betéé'. Kedarem néh ri' tioo ma'o, boh éh betéé' petubo réh.
32La'ah dau tahup inah, kekat kelunan éh pu'un bakéh éh sakit ngan éh nasek balei', pu'un réh mihin irah inah tavin Yésus. 33Kekat kelunan tong leboo' inah pu'un réh petipun tong jumen lamin Simon nah. 34Yésus peka'o kuraa' arong kesakit réh, ngan pinaa' balei' nebet Yésus jin tong réh, pah avéé' néh bé' buhaa' balei' nah pané, uban kejam balei' nah, séé' Yésus nah.
Yésus nebaraa' kelunan tong tana' Galilia
(Luk. 4:42-44)
35Tovoo' peka ngivun betéé' Yésus tai mokoo' tong tana' ke' néh sebayang. 36La'ah Simon ngan bakéh néh nah tai pitah éh. 37Hun réh temeu' ngan néh, boh réh bara', Kekat kelunan nah pu'un pitah Ke' rit, ha' réh.
38Yésus mipa ha' réh, ka', Adang lu' tekep tioo mejoh pengelakau' lu' teu' tai leboo' éh jah déhéé' siteu' kepéh, uban Ké' juk bara' ha' Tuhan ngan réh, uban inah néh kereja' Ké', ke' ké' tuai nah, ha' Néh.
39 La'o inah lakau Yésus tutuh tana' Galilia, ke' Néh nebaraa' réh lem lamin sebayang Yahudi ngan bet balei' jin kelunan.
Tong kelunan sakit kapéé'
(Mat. 8:1-4, Luk. 5:12-16)
40Pu'un jah kelunan sakit kapéé' tavin Yésus, iah ngejekuu' lep néh tong jumen Yésus, ngan iah menyat pika ngan Néh. Ka' ha' néh ngan Yésus, Hun Ko' keloo' adang Ko' omok peka'o ku', ha' néh.
41La'ah Yésus pika éh mu'un, ngan Iah ngamit kelunan sakit nah, ha' Yésus ngan néh, Akeu' keloo', ma'o ke' jin penyakit ko' nah, ha' Néh. 42Kesakit kelunan inah, hun inah néh éh tioo bé' pu'un lah ngan iah pu'un ma'o. 43La'ah Yésus nyohoo' éh tioo lakau, ngan petepat ngan néh. 44 Ka' ha' tepat Néh, Ko' menéng ha' Ké' teu', amai ke' bara' ngan séé' péh, tong iteu' da'. Jian ke' tai tavin imam tong sebayang Yahudi, ke' néh na'at usah ko' lepah ma'o nah. La'o inah ko' mena' pengena' ko' ngan néh, barei' sohoo' Tuhan lem Surat Musa dokoo' kelunan omok jam ka'au' pu'un ma'o jin kesakit ko' nah, ha' Yésus.
45Bang kelunan inah tai éh bara' rengah inah ngan kelunan semah-semah péh. Uban néh kenat bé' Yésus omok merah lakau tong leboo' éh pinaa' kepéh. Iah mokoo' tong tana' linek, bang kelunan jin kuraa' leboo' awah éh tai tavin éh sinah.

Currently Selected:

MARKUS 1: PNT

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy