YOHANES 15
15
Yésus inan buaa' agun mu'un
1La'ah ka' ha' Yésus kepéh, Akeu' iteu' inan buaa' agun mu'un, ngan Tamen Ké' éh mihau pulah agun iteu'. 2Kekat paka' néh éh bé' ngebuaa', nebet Néh awah éh, ngan kekat paka' éh ngebuaa', netoo' néh éh ke' néh omok jian urip ngan ngebuaa' kepéh. 3Ka'ah péh pu'un jian neu' ha' tebaraa' éh benara' Ké' ngan keh. 4Jian keh petem dalem Akeu', Akeu' péh petem dalem ka'ah. Hun keh bé' petem dalem Akeu', bé' keh omok ngebuaa', barei' paka' buaa' agun bé' omok ngebuaa' hun néh bé' pu'un dalem inan néh, ha' Néh.
5Ha' Yésus kepéh, Akeu' iteu' inan buaa' agun, ka'ah éh paka' néh. Séé'-séé' éh petem dalem Akeu' ngan Akeu' pu'un petem dalem Néh, adang néh ngebuaa' ngan buaa' néh pinaa', uban bé' keh omok maneu' ineu'-ineu' tengéé'. 6Séé'-séé' éh bé' pu'un petem dalem Akeu', nebet Néh awah éh barei' paka', ngan mapeu' éh. Paka' éh mapeu', pu'un réh tipun éh ngan bet éh lem luten. 7Hun keh pu'un petem dalem Akeu' ngan ha' tebaraa' Ké' pu'un petem dalem keh, hun keh menyat ineu'-ineu' éh pengeloo' keh, adang néh pu'un kenat. 8Hun keh ngebuaa' ngan buaa' pinaa', inah jalan Tamen Ké' pu'un kenajung, ngan inah jalan keh omok bakéh Ké' mu'un. 9Pu'un Akeu' murung ka'ah barei' Tamen Ké' murung Akeu', jian ka'ah petem dalem kemurung Ké'. 10Hun keh kivu kekat sohoo' Ké', boh keh petem lem kemurung Ké', barei' Akeu' kivu kekat sohoo' Tamen Ké' ngan pu'un Ku' petem dalem kemurung Néh, ha' Néh.
11Ka' ha' Yésus kepéh, Pu'un Akeu' bara' kenat ngan keh dokoo' kemurung Ké' omok pu'un dalem ka'ah, ngan kemurung ka'ah omok sukup mu'un. 12 Iteu' éh sohoo' Ké' ngan keh, jian keh murung jah usah ngan jah usah barei' Akeu' péh murung ka'ah. 13Kemurung éh pelapah ja'au mu'un, inah éh hun kelunan mena' urip néh uban néh murung bakéh néh. 14Hun keh kivu kekat sohoo' Ké', boh keh omok bakéh Ké'. 15Bé' Akeu' bara' ka'ah kelunan sohoo', uban kelunan sohoo' bé' éh jam ineu' éh juk neu' pengeja'au néh. Bang Akeu' bara' ka'ah bakéh Ké', uban pu'un Ku' bara' ngan keh kekat éh nenéng Ké' jin Tamen Ké'. 16Bé' éh ka'ah éh ngevéléé' Akeu', bang Akeu' éh ngevéléé' keh ngan Akeu' éh nyohoo' keh tai ngan ngebuaa' ngan buaa' pinaa', buaa' éh kenat omok éh pelinguh. La'ah ineu'-ineu' keh menyat jin Tamen Ké' dalem ngaran Ké', adang Néh mena' éh ngan keh kepéh. 17La'ah iteu' éh sohoo' Ké' ngan keh, jian keh murung jah usah ngan jah usah, ha' Néh.
Tong keleko kelunan tong tana'
18La'ah ka' ha' Yésus kepéh, Hun kelunan tong tana' iteu' leko keh, jian keh nesen Akeu' éh keleko réh tenah. 19Hun keh pu'un pekua' kenin ngan irah tong tana' iteu', boh réh murung keh. Bang pu'un Akeu' ngevéléé' keh jin belah irah tong tana' iteu', ngan bé' keh pekua' kenin ngan réh kepéh. Uban keh bé' pekua' kenin ngan réh, inah maneu' réh leko keh. 20 Jian keh seruh kepéh tong éh benara' Ké' ngan keh rai, kelunan sohoo' bé' éh ja'au ngaran jin pengeja'au néh. Hun néh kenat jian keh jam hun irah peketa Akeu', adang réh juk peketa keh kepéh. Hun réh mihau ha' tebaraa' Ké', adang réh keloo' mihau ha' tebaraa' keh kepéh. 21Adang irah pu'un peketa keh uban keh ngelan tong Akeu', uban bé' réh jam Iah éh nyohoo' Akeu' tuai. 22Hun Ké' bé' pu'un tuai ngan pané ngan réh lepah nah, bé' réh sala', bang pu'un Ku' tuai, ngan bé' réh omok bara' réh bé' jam sala' réh. 23Séé-séé' éh leko Akeu', pu'un réh leko Tamen Ké' kepéh. 24Hun Ké' bé' maneu' kuraa'-kuraa' telana' éh ja'au éh pelapah ja'au jin éh neu' kelunan éh jah, bé' réh pu'un sala', bang pu'un Ku' maneu' telana' éh ja'au, ngan pu'un réh na'at éh, bang inah réh leko Akeu' ngan leko Tamen Ké' kepéh. 25 Pu'un éh kenat dokoo' néh pesukup ha' lem surat Allah, ka' éh, Pu'un réh leko Akeu' na' péh bé' pu'un ineu'-ineu' éh ke' réh tekep leko Ku'.
26Ka' ha' Yésus kepéh, Pu'un jah Penolong juk tuai jin Tamen Ké', inah éh Sahéé' éh pepoléng kekat éh teneng. Akeu' juk nyohoo' éh tuai jin Tamen Ké' ngan Iah omok bara' tong Akeu'. 27Ka'ah kepéh omok bara' tong Akeu', uban keh pu'un ngan Ké' jin bu'un Ké' maneu' kereja' Ké', ha' Néh.
Currently Selected:
YOHANES 15: PNT
Highlight
Share
Copy
Want to have your highlights saved across all your devices? Sign up or sign in
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia