ÉPESUS 1
1
1 Akeu' Paulus lem pengeloo' Allah lawah Kristus Yésus, akeu' éh maneu' surat iteu' ngan kekat kelunan éh anah Allah éh mokoo' tong leboo' Épesus, ngan éh tigéh dalem urip réh lem Kristus Yésus. 2Jian Allah éh Tamen lu' ngan Tuhan Yésus Kristus, mena' penika Néh ngan pengepawah Néh ngan keh.
Pengena' Kristus lem kenin kelunan
3Jian uleu' bara' jian kenin ngan Allah éh Tamen Tuhan lu' Yésus Kristus, uban uleu' murip pemung ngan Kristus, Allah lepah mena' pengejian ngan lu', palaa' kekat pengejian éh jin seruga. 4Bé' jak tana' iteu' pu'un, Allah pu'un ngevéléé' uleu' tenéh, dokoo' neu' urip lu' lem Kristus, uleu' omok anah Néh, ngan murip ni'ai ngan jian mu'un, bé' pu'un sa'at ineu'-ineu' tong jumen Néh.
Uban neu' penika Néh, 5La'ah naneu' penika Néh, jin bu'un tenéh Allah petenup jalan dokoo' neu' Anak Néh Kristus éh matai tong salib, Iah omok maneu' uleu' anak Néh kepéh. Iah maneu' kenat kivu pengeloo' ngan kemurung kenin Néh tengéé'. 6Jian uleu' mejing Allah uban lu' jam penika Néh éh ja'au mu'un. Bé' éh mena' urip maréng ngan lu' uban pengejian uleu', bang uban neu' penika Néh awah nah ke' Néh mena' urip maréng ngan lu', dalem Anak Néh éh kemurung Néh mu'un. 7 Uban neu' dahaa' Kristus, uleu' pu'un pelepu, inah éh, penyala' lu' pu'un pega'. Iah maneu' kenat uban ja'au mu'un penika Allah ngan lu', pelapah ja'au jin éh omok benara' lu'. 8Uban dalem pengejam ngan pengeloo' kenin Néh tengéé', Iah kivu kenin Néh, 9ngan kejeraa' uleu' jam tong pengeloo' kenin Néh éh petenup Néh tenéh ngan éh pelim jin kelunan sahau. 10Pengeloo' kenin Néh éh juk neu' Néh, tovoo' avéé' jaka' néh, Iah juk pepemung kekat penyuai Néh dalem Kristus ngan Kristus éh omok pengeja'au néh béé. Kenat péh tong seruga, kenat péh tong kekat éh tong tana' péh.
11Allah ngelayau maneu' ineu'-ineu' éh payoo' kivu pengeloo' kenin Néh. Avéé' Néh ngevéléé' améé' dalem Kristus dokoo' mé' omok anah Néh, kivu pengeloo' kenin Néh éh petenup Néh tenéh jin sahau. 12Uban néh kenat, jian urip améé' éh bu'un-bu'un ngelan tong Kristus, pepoléng pengaren Allah.
13Kenat éh ngan ka'ah kepéh, hun keh menéng ha' tebaraa' éh teneng, inah éh Rengah Jian éh jalan keh alaa' urip maréng, hun keh menéng éh pu'un keh ngelan tong Kristus, uban Allah nelana' ka'ah éh anah nah, inah éh Iah mena' Sahéé' Ni'ai ngan keh éh lepah pejajii' Néh. 14Uban Allah mena' Sahéé' Ni'ai ngan uleu', inah telana' adang lu' omok alaa' kekat éh pejajii' Néh ngan uleu' éh anah nah, ngan inah kepéh telana' adang Tuhan juk ngelepu uleu' jin kekat kesa'at ngan penyala' lu'. Uban néh kenat jian uleu' mejing Allah éh Matek Maren.
Tong ha' sebayang Paulus
15Uban néh kenat jin bu'un ké' menéng rengah tong pengelan keh tong Tuhan Yésus, ngan penika keh ngan kekat kelunan éh anah Allah, 16bé' ku' posot, ngelayau ku' sebayang bara' jian kenin ngan Allah. Akeu' mateng ka'ah dalem sebayang ké', 17Akeu' menyat Allah, éh Tamen Tuhan Yésus Kristus, inah éh Tamen éh Matek Maren, akeu' menyat éh mena' pengejam jin Sahéé' Ni'ai ngan keh dokoo' keh omok nesen mu'un tong Kristus, ngan kekat éh neu' Néh. 18Akeu' sebayang menyat éh pepekang maten kenin keh dokoo' keh omok nesen tong pengeloo' kenin Néh tovoo' Néh tebai keh rai. Pengeloo' kenin Néh nah bé' éh terah urip lu' hun iteu' awah, bang avéé' vam kepéh. Hun keh nesen éh adang keh nesen kepéh tong kejian pengena' Néh éh pejajii' Néh ngan irah éh anah nah. 19Ngan akeu' keloo' keh jam tong ke ja'au penyukat Tuhan lem uleu' éh ngelan tong Kristus. Penyukat Néh inah pu'un éh pekua' penyukat Néh, 20 jalan iah pebetéé' Kristus jin patai Néh, ngan ngajung Iah saa' na'au' Néh tong seruga.
21Tong sinah Kristus pu'un penyukat bau kekat pengeja'au, kelunan éh pu'un penyukat, kelunan éh majak ngan raja'. Kristus pelapah ja'au penyukat jin la'o séé'-séé' kelunan murip kesioo' jaka' éh juk avéé' kepéh. 22 La'ah pu'un Allah mena' kekat-kekat néh béé ra' penyukat Kristus, ngan mena' Kristus ngan sidang ke' Néh pengeja'au néh, ngan pengeja'au kekat ineu'-ineu' péh. 23La'ah sidang nah usah Kristus éh pu'un pepoléng pengejian Kristus, uban Kristus pu'un pesukup kekat ineu'-ineu' péh.
Currently Selected:
ÉPESUS 1: PNT
Highlight
Share
Copy
Want to have your highlights saved across all your devices? Sign up or sign in
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia