YOHANES 20
20
Tong patai Yésus bé' pu'un tong luvang bateu'
(Mat. 28:1-8, Mrk. 16:1-8, Luk. 24:1-12)
1Tong dau migu bé' jak sakui rema, Meriam Magdalena tai luvang bateu' inah, ta'an néh bateu' éh palaa' réh matep ubaa' luvang nah rai, lepah sulip. 2Tioo nekedeu' éh tai tavin Simon Péterus ngan jah bakéh Yésus éh kemurung Néh nah, ke' néh bara' ngan roh, ka' ha' néh, Pu'un kelunan lepah alaa' patai Tuhan jin luvang bateu' rai ne', bang bé' mé' jam semah éh nodoo' réh kepéh la', ha' néh.
3Boh Péterus ngan bakéh néh nah tioo pata tai luvang bateu' nah kepéh, 4nekedeu' roh, bang bakéh Yésus nah rigah mu'un éh, inah éh tenah avéé'. 5Iah ngelila kelem ngan na'at livah kapan pu'un sinah bang bé' iah masek lem luvang tanem inah. 6Boh Simon Péterus avéé' kepéh tioo masek éh lem luvang inah kepéh. Ta'an néh livah kapan nah, 7ngan livah éh peseleben réh tong ulun Yésus rai. Livah inah bé' éh pemung ngan livah kapan bang pu'un éh peseleben tengéé'. 8Boh bakéh Péterus éh tenah avéé' ri', masek kepéh tong luvang inah, ta'an néh kekat inah béé ngan pu'un éh ngelan. 9Bé' jak irah nesen tong ha' lem surat Allah éh bara', adang Yésus pu'un betéé' jin patai Néh. 10La'o inah rawah tai lamin roh kepéh.
Yésus pepoléng usah Néh ngan Meriam Magdalena
(Mat. 28:9-10, Mrk. 16:9-11)
11To ke' Meriam nekedéng sinah ngan mangaa'. Lem néh mangaa' iah ngelila na'at lem luvang inah. 12Ta'an néh duah meliket éh pu'un pakai mebéng, jah meliket menyun déhéé' retek ulun patai Yésus, ngan jah meliket kepéh déhéé' retek gem Néh hun Néh pu'un sinah. 13Ka' ha' rawah ngan Meriam, O redo, kineu' ke' mangaa' kenat, ha' roh.
Ka' ha' Meriam mipa roh, Pu'un réh alaa' patai Tuhan ngan bé' ku' jam semah Éh nodoo' réh kepéh, ha' néh.
14La'o néh pané kenat, pupah éh boh éh na'at Yésus nekedéng sinah, bang bé' éh jam éh Yésus. 15Ka' ha' Yésus ngan néh, O redo, kineu' ke' mangaa' kenat. Séé' éh penitah ko', ha' Néh.
Kelem Meriam Yésus nah iah kelunan éh mihau pulah awah, kenat éh bara' ngan néh, ka' ha' néh, O lakei' ja'au, hun ko' alaa' Éh, jian ke' bara' éh semah Éh nodoo' ko' kepéh, ke' ké' omok tai alaa' Éh, ha' néh.
16Ka' ha' Yésus ngan néh kepéh, Meriam, ha' Néh.
Tioo pupah Meriam na'at Éh ngan bara' ngan Néh lem ha' Yahudi, Rabuni, ha' Néh. Sin tong ha' Néh kenat, Guru.
17Ka' ha' Yésus ngan néh kepéh, Mai ke' ngamit Akeu', uban bé' jak Ku' pu'un moléé' tai Tamen Ké', bang jian ke' moléé' tai tavin kekat padéé' Ké' ngan bara' ha' Ké' iteu' ngan réh. Pu'un Akeu' moléé' ngan Tamen Ké', éh Tamen ka'ah péh, ngan Allah Ké', éh Allah ka'ah péh, ha' Néh.
18Boh Meriam Magdalena tai bara' ngan irah bakéh Yésus iah pu'un na'at Tuhan, ngan pu'un éh bara' kepéh kekat ha' éh benara' Yésus ngan néh ri' ngan réh kepéh.
Yésus pepoléng usah Néh ngan irah bakéh Néh
(Mat. 28:16-20, Mrk. 16:14-18, Luk. 24:36-49)
19Tong dau tahup dau migu inah, pu'un irah bakéh Yésus petipun tong jah lamin, ngan kenusi réh kekat usit tapé réh uban réh medai kelunan Yahudi. Beleka' ulak Yésus de' ke' nekedéng belah réh, ka' ha' Néh ngan réh, Pawah kenin keh, ha' Néh. 20La'o Néh pané kenat, pu'un Éh bara' ojoo' Néh ngan suhat tegahang Néh ngan réh. Murung mu'un réh na'at Tuhan. 21Boh Yésus bara' ngan réh kepéh, ka' ha' Néh, Pawah kenin keh, barei' Tamen Ké' nyohoo' Akeu' tuai, kenat péh Akeu' nyohoo' keh kepéh, ha' Néh. 22La'o Néh bara' kenat, pu'un ayen laset néh teneng tong irah, ka' ha' Néh, Jian keh alaa' Sahéé' Ni'ai, ha' Néh. 23 Hun keh ngelepan penyala' kelunan, boh penyala' réh pega' mu'un. Hun keh bé' ngelepan penyala' réh, bé' penyala' réh pega', ha' Néh.
Yésus ngan Tomas
24Jah bakéh Yésus ngaran néh Tomas, keruwah ngaran néh Papin, bé' éh pu'un pemung ngan irah sioo' Yésus pané ngan réh nah. 25Inah irah bakéh Yésus bara' ngan néh, Améé' lepah na'at Tuhan, ha' réh.
Ha' Tomas mipa réh, Hun ké' bé' na'at uban paku' tong ojoo' Néh ngan masek ojoo' ké' tong suhat tegahang Néh, bé' akeu' ngelan éh, ha' néh.
26Jah migu kepéh la'o inah, irah bakéh Yésus petipun kepéh, hun inah Tomas péh pu'un ngan réh. Kekat usit tapé kenusi réh béé éh, beleka' ulak Yésus de' ke' nekedéng belah irah kepéh. Ka' ha' Néh ngan réh, Pawah kenin keh, ha' Néh. 27Ka' ha' Néh ngan Tomas, Jian ke' na'at ojoo' Ké' ngan masek buaa' ojoo' ko' tong suhat ojoo' Ké' ngan masek ojoo' ko' tong suhat tegahang Ké' iteu'. Mai ke' putui pengelan, jian ke' ngelan, ha' Néh.
28Ka' ha' Tomas mipa Éh, O Tuhan, pu'un akeu' ngelan, Ka'au éh Allah ké', ha' néh.
29Ka' ha' Yésus ngan néh kepéh, Pu'un ke' ngelan uban ko' na'at Akeu', bang murung kenin kelunan éh ngelan éh bé' na'at Ku', ha' Néh.
Yohanes bara' uban ineu' iah nyurat surat iteu'
30La'ah pu'un pinaa' telana' Yésus éh ja'au éh neu' Néh tong ta'an irah bakéh Néh, éh bé' senurat ké' lem surat iteu'. 31Bang kekat éh senurat ké' iteu' pu'un ku' nyurat éh kenat dokoo' keh omok ngelan adang Yésus nah Iah éh Kristus éh Anak Allah mu'un, ngan hun ko' ngelan éh kenat, boh ke' omok alaa' urip lem ngaran Néh.
Currently Selected:
YOHANES 20: PNT
Highlight
Share
Copy
Want to have your highlights saved across all your devices? Sign up or sign in
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia