YOHANES 19
19
1La'o réh pané kenat boh Pilatus alaa' Yésus ke' néh nyohoo' kelunan mipok Éh. 2Irah seradu ngeleleng inan suha' ke' réh pepekah éh tong ulun Néh ngan pekerayung éh palaa' kerayung rep-rep. 3Irah tai tepih déhéé' Néh ke' réh peja' Éh, Tabi' Raja' kelunan Yahudi, ha' réh. Boh réh tepap da'in Néh.
4Musit Pilatus kepéh ke' néh pané ngan irah Yahudi, ka' ha' néh, Jian ku' mihin Éh musit siteu', dokoo' keh omok jam bé' pu'un ineu'-ineu' kesa'at Néh éh kejam ké' éh tekep ké' ngukum Éh matai, ha' néh. 5Boh réh mihin Yésus musit jin sinah ketem pekah suha' ngan kerayung Néh rep-rep iri'. Ka' ha' Pilatus ngan réh, Nah, inah Iah, ha' néh.
6Irah pengeja'au imam ngan kelunan éh kereja' mavaa' umaa' Allah, hun réh na'at Yésus, pané réh ngan ja'au ha', Nyalib éh, nyalib éh, ha' réh.
Ka' ha' Pilatus ngan réh, Hun kenin keh kenat, jian keh alaa' Éh ngan mematai Éh tong salib, bé' akeu' jam ineu'-ineu' kesa'at Néh éh ké' tekep ngukum Éh matai, ha' néh.
7Ka' ha' irah Yahudi mipa éh, Kivu ukum mé' uban Néh lepah bara' Iah Anak Allah, adang tekep Éh ukum matai, ha' réh.
8Hun Pilatus menéng ha' réh bara' kenat, medai mu'un éh. 9Boh éh masek kepéh tong lamin néh ke' néh neteng Yésus, ka' ha' néh, Semah bu'un Ko' sahau, ha' néh.
Bé' Yésus mipa ha' néh. 10Boh Pilatus neteng éh kepéh, Kineu' ke' bé' mipa ha' ké', jian ke' seruh, akeu' pu'un penyukat omok ngelepu ke', kenat péh pu'un penyukat ké' ngukum Ke' matai tong kayeu' salib, ha' néh.
11Ka' ha' Yésus mipa éh, Bé' ka'au' tengéé' pu'un penyukat, bang Allah éh kejeraa' ke' maneu' kenat awah, kenat péh kelunan éh mena' Akeu', lem kamit ko' nah, iah éh pelapah ja'au penyala' jin penyala' ko' nah, ha' Néh.
12Hun Pilatus menéng ha' néh kenat, jaa'-jaa' néh gahang mu'un kenin juk ngelepu Yésus nah. Tioo ngeradau kepéh irah Yahudi, ja'au mu'un ha' réh, Hun ko' ngelepu éh, bé' ke' bakéh Pengeja'au Rum. Séé'-séé' éh bara' usah néh tengéé' raja', inah éh ayau tong Pengeja'au Rum.
13Hun Pilatus menéng ha' réh kenat, musit éh mihin Yésus. Menyun éh tong jah nyun tong jalan réh ngukum kelunan, ngaran jalan inah Awaa' Bateu', ngaran jalan inah lem ha' irah Yahudi, Gabata.
14Tovoo' réh maneu' kenat, inah éh dau pejek teka dau réh maneu' Dau Ja'au Paska. Ka' ha' Pilatus ngan irah Yahudi, Inah Raja' keh, ha' néh.
15Tioo bika' réh, ja' au ha', Mematai Éh, mematai Éh, mematai Éh tong kayeu' salib, ha' réh.
Ha' Pilatus ngan réh, Keloo' keh akeu' mematai Raja' keh tong salib, ha' néh.
Ka' ha' irah pengeja'au imam, Jah awah raja' mé', inah éh Pengeja'au peritah Rum, ha' réh.
16Boh Pilatus mena' Yésus ngan réh ke' réh mematai Éh tong salib. Boh irah alaa' Yésus ke' réh mihin Éh.
Tong Yésus senalib réh
(Mat. 27:32-44, Mrk. 15:21-32, Luk. 23:26-43)
17Musit Yésus jin lamin inah, nyu'un kayeu' salib Néh lakau tai retek tana' éh ngaran néh, Tulang Ulun, ngaran retek inah lem ha' irah Yahudi, Golgota. 18Avéé' sitai sinah inah réh nyalib Éh tong kayeu' salib, kenat éh kepéh neu' réh tong duah kelunan éh jah, jah éh saa' na'au' Yésus, jah éh saa' kabéng Néh kepéh. 19Boh Pilatus nyurat jah surat ngan nyohoo' réh memaku' surat inah tong salib Yésus, ka' éh senurat néh, Yésus jin Nasaret, Raja' kelunan Yahudi, ha' néh. 20Pinaa' kelunan Yahudi pu'un purung éh senurat néh inah, uban retek réh mematai Yésus tong salib nah, bé' éh juu' jin leboo' réh. Ha' tong surat inah pu'un éh senurat lem ha' irah Yahudi, kenat péh lem ha' irah Rum ngan ha' irah Yunani péh. 21Kekat irah pengeja'au imam tong sebayang Yahudi pu'un réh pané ngan Pilatus, ka' ha' réh, Mai ke' nyurat Raja' kelunan Yahudi, bang jian ke' nyurat, Kelunan iteu' bara' Akeu' éh Raja' kelunan Yahudi, ha' réh.
22Ha' Pilatus mipa réh, Turut ke' éh senurat ké' inah kenat awah, ha' néh.
23La'o irah seradu nyalib Yésus boh réh alaa' pakai Néh ngan petulat éh pat tulat, jah tulat ngan siget seradu nah. Kenat péh irah alaa' kerayung Néh éh kebit, kerayung inah bé' pu'un riput néh, kerayung inah laya livah awah. 24 Ka' ha' irah seradu pané belah irah ke', Mai tam mejéé' kerayung iteu', jian tam nyunga' lubun dokoo' tam jam séé' éh omok alaa' éh, ha' réh. Pu'un éh kenat dokoo' néh pesukup ha' lem surat Allah éh bara' ka',
Irah petulat livah Ké' belah irah ke',
Pu'un réh nyunga' lubun dokoo' réh omok alaa' kerayung Ké' éh kebit.
Kenat péh éh neu' irah seradu nah kepéh.
25La'ah tinen Yésus ngan jah redo éh véé' Yésus jin tinen Néh, ngan Meriam redo Klopas ngan Meriam Magdalena nekedéng déhéé' kayeu' salib nah. 26Hun Yésus na'at tinen Néh ngan bakéh Néh éh kemurung Néh, pu'un Éh bara' ngan tinen Néh, ka' ha' Néh, Inah éh anak ko', ha' Néh.
27Boh Éh bara' kepéh ngan bakéh Néh inah, Inah éh tinen ko', ha' Néh. Jin la'o iteu' bakéh Néh inah mihin tinen Yésus moléé' tong lamin néh ke' néh petubo éh sinah.
Tong pematai Yésus
(Mat. 27:45-56, Mrk. 15:33-41, Luk. 23:44-49)
28 Kejam Yésus kekat éh juk neu' néh rai pu'un éh lepah sukup, ngan dokoo' Néh pesukup ha' lem surat Allah, inah Iah bara' ka', Mapeu' batok Ké', ha' Néh.
29Pu'un jah tajau déhéé' Néh sinah, tajau inah jalan baa' buaa' agun éh mesem. Pu'un réh maham lamut lem baa' inah boh réh nedok éh ke' réh mena' éh tong ujun Yésus. 30Yésus météé' lamut inah, boh éh bara' Lepah sukup, ha' Néh. Boh éh tukep ngan béé laset Néh.
Kelunan muja' tong tegahang Yésus
31La'o inah irah Yahudi menyat Pilatus kejeraa' réh memutui gem irah éh senalib réh nah ngan alaa' patai réh jin kayeu' salib. Pu'un réh maneu' kenat uban dau inah dau lemah, ngan bé' réh keloo' patai kelunan pu'un tong salib tovoo' Dau Posot réh, uban Dau Posot inah, jah dau éh ja'au. 32Boh irah seradu tai memutui gem jah kelunan éh tong salib nah, kenat péh réh maneu' éh keruwah nah. 33Bang hun réh avéé' tong Yésus, boh réh jam Yésus lepah matai tenéh, bé' irah memutui gem Néh. 34Bang jah seradu tioo muja' tong tegahang Yésus palaa' atap néh, tioo musit dahaa' ngan baa' jin suhat Néh.
35La'ah kelunan éh na'at réh maneu' Éh kenat nah, pu'un éh bara' éh ta'an néh. Ngan kejam lu' kekat éh benara' inah pu'un éh teneng, inah iah bara' éh dokoo' keh omok ngelan tong Yésus. 36 Kekat éh neu' réh nah pu'un éh kenat dokoo' pesukup ha' lem surat Allah éh bara' ka', Jah-jah péh tulang Néh bé' éh pu'un putui, ha' Néh. 37 Ngan pu'un jah ha' kepéh dalem surat Allah éh bara', Pu'un kelunan juk na'at tong Iah Éh nuja' réh.
Tong réh modoo' patai Tuhan Yésus
(Mat. 27:57-61, Mrk. 15:42-47, Luk. 23:50-56)
38La'o inah kepéh, boh Yusup éh kelunan jin leboo' Arimatia menyat Pilatus kejeraa' éh alaa' patai Yésus. Yusup nah pu'un éh ngelan tong Yésus, bang bé' éh ngakun éh kenat ngan irah éh jah, uban néh medai irah Yahudi. Pilatus kejeraa' éh tai alaa' patai Yésus nah. Boh Yusup tai alaa' patai nah. 39 La'ah Nikodemus éh tavin Yésus sioo' merem lepah nah, pu'un éh kivu Yusup alaa' patai Yésus nah, ngan pu'un éh mihin tawan mur ngan garu' ngioo' teleu' poloo' kilogram kebahat néh. 40Pu'un rawah alaa' patai Yésus ke' roh mutup éh palaa' livah kapan pemung ngan tawan inah, uban kenat adet irah Yahudi hun réh modoo' patai kelunan. 41La'ah pu'un jah pulah déhéé' jalan réh mematai Yésus nah, ngan tong pulah inah pu'un jah luvang bateu' jalan réh modoo' patai kelunan, bang bé' jak réh pu'un modoo' patai kelunan tong néh jak. 42Uban dau inah teka Dau Posot irah Yahudi, inah kepéh uban luvang bateu' inah pu'un danii', sinah roh modoo' patai Yésus nah.
Currently Selected:
YOHANES 19: PNT
Highlight
Share
Copy
Want to have your highlights saved across all your devices? Sign up or sign in
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia