YOHANES 14
14
Yésus éh jalan mihin kelunan tai tavin Tamen Néh
1Ka' ha' Yésus kepéh, Mai keh pelasam ngan béé kenin, jian keh ngelan tong Allah ngan ngelan tong Akeu' kepéh. 2Dalem umaa' Tamen Ké' pu'un pinaa' lamin, ngan Akeu' juk tai petenup jalan ngan keh. Hun néh bé' pu'un pinaa' lamin kenat, bé' Ku' pu'un bara' kenat ngan keh. 3La'o Ké' tai petenup jalan ngan keh, boh Ku' tuai alaa' keh dokoo' keh omok pu'un pemung ngan Ké' sinah. 4Kejam ka'ah tong jalan Ké' juk tai nah, ha' Néh.
5Ka' ha' Tomas ngan Néh, Tuhan bé' mé' jam kemah Ke' juk tai nah, kineu' jalan mé' omok jam éh ke' mé' omok tai sinah da', ha' néh.
6Yésus mipa éh, Akeu' iteu' éh jalan, ngan Akeu' iteu' éh teneng, ngan Akeu' iteu' éh urip, bé' pu'un séé'-séé' éh omok tavin Tamen Ké' hun néh bé' pu'un jalan Akeu'. 7Hun iteu' pu'un keh jam Akeu' ngan omok keh jam Tamen Ké' kepéh, ngan jin la'o iteu' ka'ah pu'un jam éh, ngan ka'ah pu'un na'at Éh tenéh, ha' Néh.
8Ka' ha' Pilipus ngan Néh, Tuhan, jian Ke' pepoléng Tamen Ko' ngan mé', boh mé' jian kenin, ha' néh.
9Ka' ha' Yésus mipa éh, Pilipus, lebéé' tenéh Akeu' pu'un mokoo' ngan keh bé' jak keh jam Akeu' kei? Séé'-séé' éh lepah na'at Akeu', iah lepah na'at Tamen Ké' kepéh, hun néh kenat kineu' keh nyohoo' Akeu' pepoléng Tamen Ké' ngan keh. 10Kineu' ke' Pilipus, bé' ke' ngelan Akeu' pu'un pekua' ngan Tamen Ké' ngan Tamen Ké' pu'un pekua' Akeu'. Kekat ha' éh benara' Ké' ngan keh, bé' éh ha' Ké' tengéé', Tamen Ké' éh pu'un petem dalem Akeu', pu'un Éh maneu' kekat penganeu' Néh. 11Jian keh ngelan Akeu' pu'un pekua' ngan Tamen Ké' ngan Tamen Ké' kepéh pu'un pekua' ngan Akeu'. Hun ko' bé' omok ngelan ha' Ké' bara' ngan keh kenat, jian keh ngelan uban kekat penganeu' Ké' éh ta'an keh nah. 12Akeu' bara' mu'un ngan keh, séé'-séé' éh ngelan tong Akeu', iah kepéh omok maneu' kekat penganeu' Ké' inah, éh mu'un néh, éh pelapah ja'au jin iteu' uban ké' juk moléé' tai Tamen Ké'. 13Ngan ineu'-ineu' éh keh menyat dalem ngaran Ké', omok Ku' maneu' éh pekua' éh nenyat keh nah, dokoo' pengaren Tamen Ké' pu'un poléng dalem Anak Néh. 14Ineu'-ineu' nenyat keh dalem ngaran Ké', omok Ku' maneu' pekua' barei' inah, ha' Néh.
Tong jajii' Yésus mena' Sahéé' Ni'ai
15Ka' ha' Yésus kepéh, Hun keh murung Akeu', adang keh pu'un kivu kekat sohoo' Ké'. 16Akeu' juk menyat jin Tamen Ké', boh Éh mena' jah Penolong kepéh ngan keh, inah éh Sahéé' éh pepoléng kekat éh teneng, ke' Néh omok pu'un ngan keh pelinguh. 17Iah Sahéé' Ni'ai éh bara' ineu' éh teneng tong Allah. Kelunan éh mihau urip réh tong tana' iteu' awah, bé' réh omok alaa' Éh uban bé' réh omok na'at Éh ngan bé' réh omok jam Éh bang ka'ah iteu' jam Éh uban Néh pu'un mokoo' ngan keh, ngan pu'un pemung ngan keh.
18Bé' Akeu' bet ka'ah, adang Akeu' tuai kepéh. 19Bé' lebéé' la'ah irah éh mihau urip réh tong tana' iteu' awah, bé' réh omok na'at Akeu' kepéh, bang omok ka'ah na'at Akeu'. Uban Akeu' murip ke' ka'ah péh omok murip. 20Tovoo' néh pu'un kenat, adang keh omok jam Akeu' pu'un pekua' ngan Tamen Ké' ngan ka'ah péh pu'un dalem Akeu', barei' Akeu' péh pu'un dalem ka'ah, ha' Néh.
21Ka' ha' Yésus kepéh, séé' éh mihau ngan kivu kekat sohoo' Ké', kelunan inah éh murung Akeu', Tamen Ké' murung irah éh murung Akeu', ngan Akeu' péh murung éh ngan juk pepoléng usah Ké' ngan néh, ha' Néh.
22Pu'un Yudas bara' ngan Néh, bé' éh Yudas Iskariot bang kelunan éh jah, ka' ha' néh, Tuhan kineu' Ke' omok pepoléng usah Ko' ngan améé' ngan bé' pepoléng éh ngan kekat kelunan, ha' néh.
23Ka' ha' Yésus mipa éh, séé'-séé' éh murung Akeu', pu'un éh kivu kekat sohoo' Ké'. Tamen Ké' pu'un murung éh, Tamen Ké' ngan Akeu' péh juk tuai mokoo' ngan murip ngan néh. 24Séé'-séé' éh bé' murung Akeu', bé' éh kivu ha' Ké'. Kekat tebaraa' éh nenéng keh iteu', bé' éh jin Akeu' tengéé', bang pu'un éh jin Tamen Ké' éh nyohoo' Akeu' tuai, ha' Néh.
25Ka' ha' Yésus kepéh, Pu'un Akeu' bara' kenat ngan ka'ah kelebéé' Ké' pu'un mokoo' keto ngan keh. 26Bang hun Penolong inah pu'un tuai, inah éh Sahéé' Ni'ai éh juk senohoo' Tamen Ké' tuai lem ngaran Ké', Iah juk nebaraa' keh ngan petesen keh kepéh tong kekat tebaraa' éh benara' Ké' ngan keh.
27Ka' ha' Yésus kepéh, Pawah kenin keh, pengepawah Ké' Akeu' mena' éh ngan keh, bé' Ku' ngepawah kenin keh barei' kelunan éh mihau urip réh tong tana' awah. Mai keh tusah kenin, mai keh medai. 28Pu'un keh menéng ha' Ké' bara' Akeu' juk tai ngan Akeu' juk moléé' kepéh ngan keh, hun keh murung Akeu', adang keh murung kenin uban Akeu' moléé' tai Tamen Ké', uban Tamen Ké' éh pelapah ja'au jin Akeu'. 29Bé' jak kekat inah pu'un, tenah Ku' bara' ngan keh, dokoo' hun néh pu'un, ka'ah omok ngelan. 30Bé' pu'un pinaa' ha' Ké' kepéh, uban pengeja'au tana' iteu' juk tuai bang bé' éh pu'un penyukat tong Akeu'. 31Bang adang éh tekep kekat kelunan pah tipo tana' jam Akeu' murung Tamen Ké' ngan Akeu' pu'un kivu kekat sohoo' Néh.
Betéé' tam, jian tam piso jin siteu', ha' Néh.
Currently Selected:
YOHANES 14: PNT
Highlight
Share
Copy
Want to have your highlights saved across all your devices? Sign up or sign in
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia