YOHANES 10
10
Ha' tapan tong tepun domba ngan domba néh
1Ha' Yésus kepeh, Akeu' bara' mu'un ngan keh, kelunan éh masek lem pagin domba mukat jin jalan tengéé éh bé' jin usit tapé, Iah kulunan nekau ngan kelunan éh ngesakit usah réh ke' néh omok alaa' livah réh. 2Bang kelunan éh masek jin usit pagin, inah éh tepun domba nah. 3Kelunan éh mavaa' usit pagin iah mukap usit pagin ngan tepun domba nah. Kekat domba jam menéng ha' tepun néh ngan iah tebai réh palaa' ngaran réh ke' néh mihin réh musit. 4La'o néh mihin réh musit, lakau éh saa' tenah réh ngan kekat domba néh kivu éh uban réh jam menéng ha' néh. 5Bang kelunan éh jah, bé' réh keloo' kivu éh, kelap awah réh, uban bé' réh jam menéng ha' kelunan éh jah.
6Kenat ha' tapan éh benara' Yésus ngan réh, bang bé' réh nesen tong ha' Néh kenat.
Yésus éh Tepun domba mu'un
7Ka' ha' Yésus kepéh, Akeu' bara' mu'un ngan keh, Akeu' iteu' usit pagin jalan kekat domba omok masek lem pagin. 8Kekat irah éh tuai jin tenah Ké', irah barei' kelunan nekau, barei' kelunan éh ngesakit usah réh ke' néh omok alaa' livah réh, ngan kekat domba bé' éh jam kivu ha' réh. 9Akeu' iteu' éh usit tapé tong pagin domba. Séé'-séé' éh masek jin Akeu', omok éh alaa' urip, adang néh pu'un masek ngan musit kepéh ngan alaa' penguman néh. 10Kelunan nekau tuai ke' néh nekau domba ngan mematai ngan nasa' réh awah, bang Akeu' tuai dokoo' kelunan omok alaa' urip, avéé' réh murung mu'un-mu'un, ha' Néh.
11Ka' ha' Yésus kepéh, Akeu' éh tepun domba mu'un. Akeu' éh tepun domba mu'un nah mena' urip Néh ngeliwah kekat domba Néh. 12Kelunan sohoo' éh bé' tepun domba mu'un ngan éh bé' mihau réh mu'un, hun néh na'at bekuleu' tuai, kelap éh, nebet néh awah domba nah, boh bekuleu' inah navap domba nah ngan pepurat réh. 13Kelunan sohoo' pu'un éh kelap awah, uban néh kelunan sohoo' awah, ngan bé' éh pika domba nah. 14Akeu' éh Tepun domba mu'un, ngan Akeu' jam kekat domba Ké', ngan domba Ké' péh jam Akeu'. 15 Akeu' jam irah ngan irah jam Akeu', pekua' Tamen Ké' jam Akeu', ngan Akeu' jam Tamen Ké', la'ah Akeu' juk mena' urip Ké' ngeliwah kekat domba Ké'. 16Pu'un domba Ké' kepéh éh bé' jak masek lem pagin iteu', kekat irah péh Akeu' juk alaa' réh lem pagin iteu'. Irah péh omok menéng ha' Ké' boh réh omok jah awah vun ngan jah awah tepun, ha' Néh.
17Ka' ha' Yésus kepéh, Tamen Ké' murung Akeu' uban Ké' keloo' mena' urip Ké' jalan Ké' omok alaa' éh kepéh. 18Bé' pu'un séé'-séé' éh ngebéé urip Ké' iteu', bang neu' pengeloo' Ké' tengéé' Akeu' mena' éh. Akeu' pu'un penyukat omok mena' urip Ké' kenat, ngan pu'un penyukat Ké' alaa' éh kepéh. Inah éh sohoo' Tamen Ké' ngan Ké', ha' Yésus ngan réh.
19Naneu' ha' Yésus kenat, inah irah Yahudi petengéé' kenin kepéh. 20Ka' ha' jelua' réh, kelunan inah nasek balei' ngan tuleu'. Uban ineu' keh keloo' menéng ha' Néh, ha' réh.
21Ka' ha' jelua' kepéh, Kelunan éh nasek balei', bé' éh jam pané kenat, kenat kepéh, bé' balei' omok peka'o kelunan peseu' ha' réh.
Irah kelunan Yahudi bé' keloo' alaa' Yésus
22La'ah sioo' inah pu'un irah Yahudi maneu' jah Dau Ja'au kepéh tong leboo' Yérusalem, Dau Ja'au éh petesen réh tong jalan réh lepah suai umaa' Allah éh maréng ngan mena' éh ngan Tuhan. 23Sioo' réh maneu' Dau Ja'au inah, sioo' genin. Lakau Yésus tong lamin Salomo éh tong umaa' Allah nah. 24Tuai irah Yahudi nekedéng tutuh Yésus, ka' ha' réh, Mai Ke' petusah kenin améé', jian Ke' pané petek ke' ngan améé', kineu' Ke', Ka'au éh Kristus. Kineu' Ke', bé' éh, ha' réh.
25Ka' ha' Yésus mipa réh, Pu'un Akeu' lepah bara' éh ngan keh, bang bé' keh keloo' ngelan tong ha' Ké' nah. Kekat penganeu' Ké' éh neu' Ké' kivu sohoo' Tamen Ké', kekat inah bara' tong Akeu'. 26Bang bé' keh ngelan uban keh bé' domba Ké'. 27Kekat domba Ké' jam réh menéng ha' Ké', ngan Akeu' péh jam irah ngan irah pu'un kivu Akeu'. 28Pu'un Akeu' mena' urip pelinguh ngan réh, bé' réh omok matai, ngan bé' pu'un séé'-séé' éh omok ngelebu réh jin kamit Ké'. 29Tamen Ké' éh mena' réh ngan Ké', Iah pu'un pelapah ja'au ngaran jin kekat réh béé ngan bé' pu'un séé'-séé' éh omok ngelebu réh jin Tamen Ké'. 30Tamen Ké' ngan Akeu' péh jah awah kenin, ha' Néh ngan réh.
31Irah Yahudi alaa' bateu' ke' réh juk memateu' Éh. 32Ka' ha' Yésus ngan réh, Pinaa' kereja' Ké' éh jian, éh neu' Ké' tong ta'an keh, kereja' éh sohoo' Tamen Ké' ngan Ké'. Jin belah iteu' éh mah éh sala' dokoo' keh juk memateu' Ku', ha' Néh.
33 Ka' ha' irah Yahudi mipa Éh, Bé' améé' juk memateu' Ke' naneu' kereja' Ko' éh jian, bang uban Ko' kelunan awah, ngan pu'un Ke' juk maneu' usah Ko' pekua' ngan Allah, inah Ke' ngesa'at Allah, uban Ko' kenat nah ke' mé' juk memateu' Ke', ha' réh.
34 Ka' ha' Yésus mipa réh, Pu'un senurat lem surat Allah, tong ha' Allah éh bara', Ngaran ka'ah allah, ha' lem surat nah. 35Kejam lu' kekat ha' lem surat Allah pu'un petem pelinguh, hun néh kenat hun Allah pu'un bara' ngan kelunan éh menéng ha' tebaraa' Néh sahau, nateng Néh allah, hun néh kenat ha' ngan irah éh kelunan awah, 36uban ineu' keh bara' Akeu' ngesa'at Allah hun Ké' bara' Akeu' éh Anak Allah mu'un. Bang pu'un Allah ngevéléé' Akeu' ngan nyohoo' Akeu' tuai tong tana' iteu'. 37Hun Ké' bé' pu'un maneu' kekat kereja' éh sohoo' Tamen Ké', mai keh ngelan tong Akeu', 38bang hun néh pu'un, na' péh ka'ah bé' keloo' ngelan tong ha' Ké', jian keh ngelan éh ta'an keh tong kereja' Ké', dokoo' keh omok jam adang Tamen Ké' pu'un dalem Akeu' ngan Akeu' péh pu'un dalem Tamen Ké', ha' Néh.
39La'o inah irah pitah jalan ke' réh juk ngamit Éh bang bé' réh omok, pelepu Éh.
40 Moléé' Yésus kepéh tai saa' dipa baa' Yordan tong jalan Yohanes ngebatis kelunan rai, sinah éh mokoo'. 41Pinaa' kelunan tuai tavin Yésus, ka' ha' réh, Bé' Yohanes pu'un maneu' telana' ineu'-ineu' éh ja'au, bang kekat ha' éh benara' néh tong Yésus nah, pu'un éh teneng mu'un, ha' réh. 42Jin belah kelunan inah, pinaa' éh ngelan tong Yésus.
Currently Selected:
YOHANES 10: PNT
Highlight
Share
Copy
Want to have your highlights saved across all your devices? Sign up or sign in
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia