Salmo 91
91
Si Diyos Di Manalaknib En Datako
1Olay sino ay emey en Diyos ay Manakabalin Am-in ya Kangatoan,
ta sisya di kanayon ay ena pankamangan ya panpaayowanan,
2kanana, “Sik-a, Yahweh, di salaknib ko ya pankamangak,
sik-a din Diyos ay daydayawek ya pantalkak.”
3Ilisi daka sin kaman bito ay maknaam
ya kaeegyat ay sakit ay kateyam.
4Kaman kan kiyap ay sakokoan di ina na.
Magay pan-egyatam tan wadas sisya ay mangayowan en sik-a.
Matalek sisya et kaman mon salida.
5Sin labi et magay pan-egyatam,
olay din panan di kalaban sin kaagawan.
6Sin labi ya kaagawan, magay pan-egyatam,
olay dimonyo ono bigla ay sakit ay kateyan.
7Olay ad-ado di matey sin asag-en mo,
ngem adi ka pay maan-ano.
8Mailam to ay mismo di kadosaan da
din lawlawa di ogali na.
9Gapo ta si Yahweh ay Kangatoan
di kinamang mo ay pansalinan,
10magay lawa ay mapasamak en sik-a
ono somag-en sin beey mo ay mamaligat en sik-a.
11Bilinen Diyos din aanghel na ta en daka ayowanan,
olay intoy em-emeyam.
12Aklopen das sik-a ta adi maidosnog sikim sin bato.
13Din maangat ay layon ya eweg ay nagitaan et abakem ya igatin mo.
14Kanan Diyos, “Din manglaylayad en sak-en et isalakan ko,
ya ayowanak din mamigbig ay sak-en din Apo.
15Mo mankararag en sak-en et songbatak sisya,
kadkadwaek sin timpon di ligat na
et isalakan ko ya bindisyonak ta madayaw sisya.
16Gon-gonaak abe si ando ay biyag na
ta ganasena din pangisalakanak en sisya.”
Currently Selected:
Salmo 91: KD
Highlight
Copy
Compare
Share
Want to have your highlights saved across all your devices? Sign up or sign in
© 2000, 2017 Wycliffe Bible Translators, Inc. All rights reserved.
