Salmo 90
90
Si Diyos Ay Magay Pap-eng Na
1Sik-a ay Diyos di nangay-ayowan en dakami.
Kaman kan beey ay nansidsidoman mi
manipod ed nabaon enggana ed wani.
2Olay idi daan kan parsuaen din dontog ya am-in ay wada,
nawawada ka ay Diyos si eng-enggana.
3Mabalin mo ay ibaga sin ipogaw ta mantaoli da
sin tapok ay say napoan da.
4Din sinlibo ay tawen en sik-a
et kaman sin-agew anggoy di kaando na.
Kaman ed kogaban ay nalabas
ono din kaseyepan mi si owat piga ay oras.
5Mabalin ay pap-engem din biyag mi sina.
Maiarig sin iitaw ay sinkaattikan et mamaga
ono kaman logam ay tomobo sin agsapa.
6Gomabay et mansabong da,
ngem mo malabi, malaylay ya mango da.
7Palaloy egyat mi sin bonget mo,
matey kami begew sin dosa ay inkeddeng mo.
8Inpailam am-in ay basbasol mi sin sangoanam,
olay din naitatabon ay inpaksaw mi et inpabelam.
9Begew sin bonget mo, omaptik di biyag mis nan daga,
din tawen mi et kaman dagem ay si awni et mamaga.
10Pitopolo ay tawen di kaandon di biyag mis na.
Mo mabikas kami, emey ay otsinta.
Ngem olay mo intoy kaando na, pag ligat di iali da.
Sinkaattikan yan mapap-eng di biyag mi et pag kamin mamaga.
11Maga pay laeng di namadas sin am-in ay dosa ay inkeddeng mo,
magay inmegyat ay kosto
begew sin palalo ay bonget mo.
12Isonga ipabigbig mo ngarud en dakamis na
din kinaaptik di biyag mis nan daga
ta say lomaing kami ay mangosal ay kosto
sin am-in ay timpo ay indawat mo.
13Pig-an pay di kabayag di omibobongetam?
Maseg-ang ka koma ay Diyos en dakami ay baam.
14Inag-agew koma ay mapnek kami sin komakaman ay layad mo
ta say naragsak kami ay mankankanta sin kawada mi ay matmatago.
15Paad-adoem abe di agew ay en mi panlaylaydan
ay kaman din kaandon di timpo ay en mi nanligligatan.
16Ipailam din panakabalin mo en dakami ay baam
ya sin kapototan mi din nakaskasdaaw ay pigsam.
17Yahweh ay Diyos mi, maseg-ang ka ta bindisyonam dakami
ta say mayat di pantongpalan di am-in ay am-amagen mi.
Currently Selected:
Salmo 90: KD
Highlight
Copy
Compare
Share
Want to have your highlights saved across all your devices? Sign up or sign in
© 2000, 2017 Wycliffe Bible Translators, Inc. All rights reserved.
