Salmo 89
89
Din Intolag Diyos En David
1Apo Diyos, kanayon to ay ikansiyon ko
din adi manbalbaliw ay layad mo
ya din kinamatalek mo.
2Din layad mo, magay panbalbaliwana.
Matalek ka si eng-enggana
ay kaman ed daya ay komakaman sin kad-ana.
3Kanam, “Waday intolag ko sin pinilik,
siya nay inkarik sin baak ay si David:
4Awni et isaad ko din polim ay manturay si eng-enggana.”#89:4 Din intolag Diyos ay nay et madtengan sin 2 Samuel 7:16.
5Idaydayaw daka koma ed daya
sin nasinop ay nasantoan ay paparsua,
tan nakaskasdaaw din inam-amag mo ya matalek ka.
6Tan sino di makaison sik-a
sin amin ay wadad daya?
7Mas kaeegyat ya nangatngato ka
mo din nasinop ay nasantoan ay parsua,
isonga egyatan ya patgen daka.
8Yahweh ay Diyos ay Kangatoan ay Turay,
magay makaison sik-a.
Sin amin ay banag et matalek ka.
9Iturayam din kaeegyat ay baybay et patalnaem din dalloyona.
10Din dragon ay si Rahab#89:10 Si Rahab ay nay et kaeegyat kano ay dragon ed nabaon ay nanbeey sin baybay. Simbolon di am-in ay lawa ya golo. et pinis-it mo.
Begew sin panakabalin mo,
inabak mo din kalaban mo.
11Okam ed daya ya nan daga,
tan inamag mo nan lobong ya din amin ay wada.
12Din wada ed amyanan ya abagatan, pinarsuam daida.
Din dontog ay Tabor ya Hermon et manragsak da.
Kaman dan ipogaw ay mangikankanta
sin pangdayaw dan sik-a.
13Palalo ay napigsa ka.
14Din turay mo, kinalinteg di naisaadana.
Din amin ay amagem, ipaila da
ay managlayad ya matalek ka.
15Ay apaw di ragsak da
din manaydayaw en sik-a babaen si kankanta
ya din mabindisyonan begew sin kawadam en daida.
16Gapon sik-a, maninsin-agew ay manragsak da,
et din kinalinteg mo, idaydayaw da.#89:16 Di esa abe ay kaiologan nina sin Hebreo et: et begew sin kinalinteg mo, maipangato da.
17Tan sik-a di poon di bikas mi,
begew sin seg-ang mo, mangabak kami.
18Nasantoan ay Diyos mi ay Israelita, sik-a din ari mi
ay manalaknib en dakami.#89:18 Di esa abe ay kaiologan nina sin Hebreo et: …sik-a di namili sin manalaknib en dakami, tan dinotokam din ari mi.
19Waday kaman iitaw ay inpailam sin matalek ay baam,
et siya na din kanam,
“Binadangak di esay soldado ay napigsa,
pinilik et inpangatok sisya.
20Insaad ko ay ari si David ay baak.
Sinoyatak din toktok na sin nasantoan ay lanak,
say mangipaila ay sisyay dinotokak.
21Et kanayon ay papigsaek to
babaen sin bikas ya panakabalin ko.
22Din lawlawa di ogali na ay kalabana
et adi da makaabak en sisya.
23Gemkek din kalabana sin sangoanana
et peslek din mangililiget en sisya.
24Mantoltoloy din kinapodnok ya layad kon sisya
et begew en sak-en, maipangatos sisya.
25Paannawaek din lak-am di iturayana
et lomabes sin baybay di pap-eng na.
26Awni et bigbigenas sak-en ay Ama ya Diyos na,
manalaknib ya mangisalakan en sisya.
27Din kalintegan di besag ay anak,
idawat kon to en sisya.
Panbalinek ay kangatoan ay ari isnan daga.
28Adi manbalbaliw din layad kon sisya,
ya komakaman din intolag ko si eng-enggana.
29Mantoltoloy din panturayan di poli na
enggana ay mamaga din daya.
30-31Ngem mo sigaan din poli na din linteg ko
et adi da tongpalen din bilbilin ko,
32dosaek et soplitek daida
begew sin basbasol da.
33Ngem din layad kon sisya, magay panbaliwana
et tongpalek din inkarik en sisya.
34Tongpalek din intolag kon sisya,
magay ibabawik ay karik en sisya, ay olay esa.
35Nasantoanak et tongpalek din karik.
Adiak polos man-etek en David.
36-37Mantoltoloy din panturayan di poli na,
magay pap-eng na
ay kaman din agew ya bowan ed daya.”
38Ngem binaybay-am sisya ya dinokogam ed wani.
Palaloy bonget mo sin ari ay en ka pinili.
39Inbabawim din intolag mo en sisya
et kinaan mo din turay na.
40Pinadadael mo amin din alad di siyodad na,
et dadlon binakas din kalabana
din makneg ay beey ay pankamangan di ipogaw na.
41Amin ay malabas et akewen da din sanikwa na.
Laslasoyen aben di katokmang na.
42Nangabakem din kalabana
et pinaragsak mo amin daida.
43Nanbalinem din armas na ay magay silbi na,
adi kan binadangan sin kalabana.
44Kinaan mo din madaydayaw ay saad na,
intep-am sin lota din korona na.
45Nanbalinem ay nakay ay nasapsapa
et kababain di kasasaad na.
46Pig-an pay ay dengngem din kararag ko
ya makaan din palalo ay bonget mo?
47Nemnemem koma ay aptik di biyag mis na,
pinarsuam amin ay ipogaw ay way gedeng di biyag da.
48Sinoy natago ay magay kateyana
ya makalisi sin kaiponponana.
49Into pay din magay balbaliw na ay layad mo ed idi
yan matalek ka ay nangikari en David adi?
50Nemnemem koma din panglaslasoy dan dakami ay ipogaw mo
ya din pangoy-oyaw di kaipoipogaw ay ninam-os ko.
51Apo Diyos, laslasoyen din mangiliget en sik-a
nan pinilim ay ari olay intoy emeyana.
52Madaydayaw si Diyos si eng-enggana.
Amen! Amen!
Currently Selected:
Salmo 89: KD
Highlight
Copy
Compare
Share
Want to have your highlights saved across all your devices? Sign up or sign in
© 2000, 2017 Wycliffe Bible Translators, Inc. All rights reserved.
