Azã 20
20
Azezi vo'ore
(Amatie 28:1-8, Amarkɩ 16:1-8, Aluki 24:1-12)
1Lasrɩ daarɛ bulika yʋ'ʋŋɔ yʋ'ʋŋɔ, tɩ Amaari n ze'ele Magdala sẽŋɛ yɔɔm na. Ẽn paagɛ la, a yẽ tɩ kugre la bilge mɛ dee basɛ yɔɔgɔ la nõorɛ. 2Tɩ a zoe sẽŋɛ Asimõ-pɩyɛɛrɩ la karẽnbi-sɛka tɩ Azezi nõŋɛ la zẽ'am, ka yele ba yetɩ: «Ba dɩkɛ Zuudãana la yɔɔgɔ la pʋam yese mɛ, tõma ka mi ban bĩŋe ẽ zẽ'e-sɛka.»
3Tɩ Apɩyɛɛrɩ la karẽnbia ayɩla la yese wɛ'ɛsa yɔɔm na. 4Bãma bayi daan lagɩm zɔta mɛ wɛ'ɛsa, tɩ karẽnbia ayẽma la zoe gãŋɛ Apɩyɛɛrɩ dẽŋɛ paagɛ yɔɔm na, 5veese bɩsɛ, yẽ tãna la n gã mĩ, dee ka kẽ. 6Tɩ Asimõ-pɩyɛɛrɩ daan paam poorʋm wa kẽ yɔɔgɔ la pʋam, yẽ tãna la n gã mĩ. 7La tãn-sɛka tɩ ba daan dɩkɛ vile Azezi zuugo la gã mĩ mɛ, la a ka naagɛ la tãna basɛba la, a kilim mɛ gã ayẽma. 8Tɩ karẽnbia ayẽma la n dẽŋɛ paagɛ la, mẽ kẽ yɔɔgɔ la pʋam, yẽ bõn-sɛba n boe mĩ na, la a bɔ sɩra mɛ. 9La karẽnbiisi la daan nãn ka wõm Nawẽnnɛ gõŋɔ n yetɩ, dẽnɩ tɩ Azezi ki dee vo'oge la võorɛ. 10Tɩ karẽnbiisi bayi la daan lebe kule ba yiɛ.
Azezi dɩkɛ a mẽŋa pa'alɛ Amaari n ze'ele Magdala
(Amatie 28:9-10, Amarkɩ 16:9-11)
11La Amaari daan ze la yɔɔgɔ la nõorʋm yẽŋa kɛlla. A daan kellɩ mɛ dee veese tɩ a bɩsɛ yɔɔgɔ la pʋam, 12yẽ malɛkadõma bayi n yɛ fu-pɛɛlsɩ zẽa zẽ'e-sɛka tɩ ba daan bĩŋe Azezi kũm na. Ayɩla zĩ la a zuugo bɔba, tɩ ayɩla zẽa a nãma bɔba. 13Tɩ malɛkadõma la yele ẽ yetɩ: «Pɔka, bẽm n ẽŋɛ tɩ fõn kɛlla?» Tɩ a lerge ba yetɩ: «Ba dɩkɛ la mam Zuudãana, tɩ mam ka mina ban bĩŋe ẽ zẽ'e-sɛka.»
14Ẽn tɔgɛ bɛla la, dee gelge yẽ Azezi n ze, la a ka bãŋɛ tɩ la de la ẽŋa. 15Tɩ Azezi soke ẽ yetɩ: «Pɔka, bẽm tɩ fõn kɛlla? Ãne tɩ fõn eerɩ?» Tɩ a tẽ'esɛ tɩ a de la gaarɛ la dãana, yele ẽ yetɩ: «M kẽema, la sãn dɛna la fõn dɩkɛ ẽ, yele ma fõn bĩŋe ẽ zẽ'a tɩ m sẽŋɛ ka dɩkɛ ẽ.» 16Tɩ Azezi yele ẽ yetɩ: «Amaari.» Tɩ Amaari gelge tɔgɛ la Ebre yetɩ: «Rabuni.» A võorɛ de la karẽnsãama. 17Tɩ Azezi yele ẽ yetɩ: «Da kalʋm ma, mam nãn ka zom m Sɔ la zẽ'am. Sẽŋɛ m sɔbiisi la zẽ'am ka yele ba yetɩ: ‹Mam zonnɩ na mam Sɔ Nawẽnnɛ n de yãma Sɔ, la yãma Nawẽnnɛ na zẽ'am.› » 18Tɩ Amaari n ze'ele Magdala sẽŋɛ ka yele karẽnbiisi la yetɩ, ẽŋa yẽ Zuudãana la, dee yele ba Azezi n yele ẽŋa se'em.
Azezi dɩkɛ a mẽŋa pa'alɛ a karẽnbiisi
(Amatie 28:16-20, Amarkɩ 16:14-18, Aluki 24:36-49)
19La daar-ẽŋa daan de la Lasrɩ daarɛ wẽnsobre, tɩ Azezi karẽnbiisi la bɔna deem, la ba daan yʋ de-sɛka tɩ ba boe a pʋam na kʋlɩnsɩ mɛ, se'ere n soe la, ba daan zotɩ la Zifdõma nẽŋadõma. Tɩ Azezi wa'am wa ze'ele ba tẽŋasʋka yele ba yetɩ: «Sũ-mã'asʋm wʋn bɔna la ya.» 20Azezi n yele ba bɛla la, a pa'alɛ ba la a nu'usi, la a lʋgrɛ la. La karẽnbiisi la n daan yẽ Zuudãana Azezi la, ba sũure ẽŋɛ yẽlʋm mɛ zozo'e. 21Tɩ Azezi le yele ba yetɩ: «Sũ-mã'asʋm wʋn bɔna la ya. Mam mẽ tõnnɩ ya, wʋ mam Sɔ la n tõm mam se'em na.» 22Ẽn yele bɛla la, dee fʋʋsɛ ẽŋɛ ba zuo, yele ba yetɩ: «To'oge ya Nawẽnnɛ Sɩa. 23Nẽr-sɛka woo tɩ ya basɛ a tõon-be'ero taalɛ, a tõon-be'ero taalɛ ka le bɔna a zuo. La nẽr-sɛka woo tɩ ya zagsɛ ka basɛ a tõon-be'ero taalɛ, a tõon-be'ero taalɛ ken bɔna la a zuo.»
Azezi dɩkɛ a mẽŋa pa'alɛ Atoma tɩ ẽŋa sɩrɩ vo'oge mɛ
24Atoma n de Azezi karẽnbiisi pia la ayi la nẽra ayɩla tɩ ba wi'iri tɩ «Lɩɩba» la, daan ka boe ba zẽ'am Azezi n daan wa'am mĩ na. 25Tɩ karẽnbiisi basɛba la yele ẽ yetɩ: «Tõma yẽ Zuudãana la.» Tɩ a yele ba yetɩ: «Mam sãn ka yẽ kʋʋsa la tɩ ba ka a nu'usi, la yisa dɩkɛ m nu'ubiire kalʋm ba, la mam sãn ka kalʋm a lʋgrɛ la, mam kãn malɩn bɔ sɩra.»
26La bɛla poorʋm dabsa anii daarɛ, tɩ karẽnbiisi la daan le lagsɛ taaba deego la pʋam, tɩ Atoma bɔna la ba lɛ. La kʋlɩnsɩ la daan yʋ mɛ, tɩ Azezi wa'am wa ze'ele ba tẽŋasʋka yele ba yetɩ: «Sũ-mã'asʋm wʋn bɔna la ya.» 27Dee yele Atoma yetɩ: «Dɩkɛ fʋ nu'ubiire kalʋm mam nu'usi la, dee tẽegɛ fʋ nu'ugo kalʋm mam lʋgrɛ la bɩsɛ. Da kãn sẽ'ena, bɔ sɩra.» 28Tɩ Atoma lerge ẽ yetɩ: «Fʋ de la mam Zuudãana la mam Nawẽnnɛ.» 29Tɩ Azezi yele ẽ yetɩ: «La de la fõn yẽ mam na ĩyã tɩ fʋ bɔ sɩra? Sɛba n ka yẽ dee bɔ'ɔra sɩra la tarɩ zu-yẽlʋm.»
Bõn-sɛka n soe tɩ gõŋɔ wã gʋlsɛ
30Azezi daan tõm tõon-yãlma basɛba mɛ zozo'e a karẽnbiisi la zẽ'am, n ka gʋlsɛ ẽŋɛ gõn-ẽna wã pʋam. 31La bõn-bãna wã gʋlsɛ tɩ ya bɔ la sɩra tɩ Azezi n de Krisi, Nawẽnnɛ Dayʋa la, tɩ ya sãn bɔ ẽ sɩra, ya wʋn yẽ yõvore a yʋ'ʋrɛ ĩyã.
Currently Selected:
Azã 20: gurDBL
Highlight
Share
Copy
Want to have your highlights saved across all your devices? Sign up or sign in
© 2008, 2010, Wycliffe Bible Translators, Inc. All rights reserved.