Azã 17
17
Azezi pʋ'ʋsɛ Nawẽnnɛ a nẽrba ĩyã
1Azezi n tɔgɛ bɛla kɩ'ɩlɩm na, a gorge bɩsɛ la saazuum yetɩ: «M Sɔ, mam daarɛ paagɛ ya, nã'asɛ mam n de fʋ Dayʋa la, tɩ mam mẽ nã'asɛ fɔ. 2La de la fõn bɔ mam nõorɛ tɩ m sɔna nẽrsaalba wuu, dee bɔ sɛba tɩ fõn bɔ mam na wuu vɔm n ka ba'asrɩ. 3La vɔm n ka ba'asrɩ la de la ba bãŋɛ fõn, fʋ yɩla mã'a n de Sɩra Dãana Nawẽnnɛ na, la ba bãŋɛ mam Azezi-krisi tɩ fʋ tõm na. 4Mam basɛ tɩ fõn yẽ nã'asgɔ tẽŋa wã zuo mɛ. Mam tõm tõon-sɛba tɩ fõn bɔ mam tɩ m tõm na ba'asɛ mɛ. 5Lɛɛlɛ wã, m Sɔ, botɩ m yẽ nã'asgɔ fʋ zẽ'am, wʋ mam n daan tarɩ na'am pãŋa fʋ zẽ'am se'em, lan dẽŋɛ dũnia n daan nãn ka nãam na.
6Mam botɩ sɛba tɩ fõn looge dũnia nẽrba pʋam bɔ mam na bãŋɛ fõn mɛ. Ba daan de la fõn nẽrba, tɩ fõn dɩkɛ ba bɔ mam, la ba sakɛ fʋ yetɔga la mɛ. 7Lɛɛlɛ wã ba bãŋɛ tɩ fõn bɔ mam sɛla la wuu ze'ele la fõn zẽ'am. 8Se'ere n soe la, mam tɔgɛ ba la yetɔg-sɛba tɩ fõn bɔ mam na, tɩ ba to'oge, dee bãŋɛ sɩra sɩra tɩ mam ze'ele la fõn zẽ'am. La ba bɔ sɩra tɩ fõn tõm mam.
9Mam pʋ'ʋsrɩ la bãma ĩyã, mam ka pʋ'ʋsrɩ dũnia nẽrba ĩyã, la de la nẽr-sɛba tɩ fʋ bɔ mam na ĩyã, se'ere n soe la, bãma de la fõn nẽrba. 10La mam bõnɔ de la fõn bõnɔ, tɩ fõn bõnɔ dɛna mam bõnɔ, la mam yẽ nã'asgɔ mɛ ba zẽ'am. 11Mam ka le bɔna dũnia zuo, la bãma boe la dũnia zuo dee tɩ mam sẽna fõn zẽ'am. M Sɔ n de pʋpeelem dãana, gu'ura ba la fʋ yʋ'ʋrɛ la tɩ fʋ bɔ mam na pãŋa, tɩ ba wʋn dɛna ayɩla wʋ mam la fõn n de ayɩla se'em na. 12Mam n daan boe la ba lɛ la, mam daan gu'uri ba la yʋ'ʋr-sɛka tɩ fõn bɔ mam na pãŋa. Mam bɩsɛ ba yelle mɛ sõŋa sõŋa, tɩ nẽra baa ayɩla ka bɔɩ, sãn dagna sɛka n de a sã'am, tɩ fõn gõŋɔ n yele se'em na ẽŋɛ la.
13La lɛɛlɛ wã mam sẽm na fõn zẽ'am, la mam tɔgrɩ la wãna mam nãn ken bɔna dũnia zuo, tɩ ba wʋn tara mam sũ-yẽlga, tɩ ba sũ-yẽlga zo'oge pãɩ. 14Mam tɔgɛ fõn yetɔga la bɔ ba mɛ, la dũnia nẽrba sisri ba mɛ, se'ere n soe la, ba dagɩ dũnia bõnɔ, wʋ mam mẽ dagɩ dũnia nẽra se'em na. 15Mam ka sosrɩ tɩ fʋ yese ba dũnia wã zuo, la de la tɩ fʋ gu ba la be'em dãana. 16La bãma dagɩ dũnia nẽrba, wʋ mam mẽ n dagɩ dũnia nẽra se'em na. 17Botɩ fõn sɩra la wʋn basɛ tɩ ba welge to'ore tara pʋpeelem dɛna fʋ nẽrba. Fõn yetɔga la n de sɩra. 18Mam mẽ tõm ba dũnia pʋam wʋ fõn tõm mam dũnia zuo se'em na. 19La bãma ĩyã tɩ mam welge m mẽŋa to'ore dɩkɛ m mẽŋa bɔ fõn, tɩ fõn sɩra la wʋn botɩ ba mẽ welge ba mẽŋa to'ore tara pʋpeelem dɛna fʋ nẽrba.
20La dagɩ bãma mã'a ĩyã tɩ mam pʋ'ʋsrɩ, la de la sɛba n wʋn wa bɔ mam sɩra ba yetɔga la ĩyã la mẽ yelle. 21Mam pʋ'ʋsrɩ fõn tɩ fʋ botɩ ba lagɩm dɛna bʋyɩla, wʋ fõn de mam Sɔ n boe la mam lɛ, tɩ mam mẽ bɔna la fõn se'em na, tɩ ba mẽ wʋn lagɩm dɛna bʋyɩla la tõma, tɩ dũnia nẽrba la wʋn bɔ sɩra tɩ fõn tõm mam. 22La mam bɔ ba na'am pãn-sɛka tɩ fõn bɔ mam na mɛ tɩ ba dɛna ayɩla, wʋ tõma n de ayɩla se'em na. 23Tɩ mam wʋn bɔna la ba, tɩ fõn bɔna la mam, tɩ ba wʋn sɩrɩ dɛna ayɩla, tɩ dũnia nẽrba wʋn bãŋɛ tɩ la de la fõn tõm mam, la fõn nõŋɛ ba wʋ fõn nõŋɛ mam se'em na.
24M Sɔ, mam boorɩ tɩ nẽr-sɛba tɩ fʋ bɔ mam na, mẽ bɔna la mam lɛ zẽ'e-sɛka tɩ mam wʋn bɔna la, tɩ ba wʋn yẽ mam na'am pãŋa, na'am pãn-sɛka tɩ fõn bɔ mam na, se'ere n soe la, fõn nõŋɛ mam mɛ, tɩ dũnia yʋʋn nãn ken ka bɔna. 25M Sɔ, fõn de sɛka n masɛ. Dũnia nẽrba ka bãŋɛ fõn, la mam nõo bãŋɛ fõn mɛ, la nẽr-bãma bãŋɛ mɛ tɩ la de la fõn tõm mam. 26Mam botɩ ba bãŋɛ fõn mɛ, la mam wʋn ken botɩ ba bãŋɛ fɔ, tɩ nõŋlʋm sɛka tɩ fõn nõŋɛ mam na, wʋn bɔna la ba, tɩ mam mẽ bɔna la ba.»
Currently Selected:
Azã 17: gurDBL
Highlight
Share
Copy
Want to have your highlights saved across all your devices? Sign up or sign in
© 2008, 2010, Wycliffe Bible Translators, Inc. All rights reserved.