Azã 15
15
Viinye tɩa, la a wila yelle
1Azezi zãsʋm ba yetɩ: «Mam de la viinye tɩa mẽŋa mẽŋa. La mam Sɔ Nawẽnnɛ n de viinye tɩa la dãana. 2Wil-sɛka n puse mam zuo dee ka wɔnna biɛ, a wãarɩ ẽ mɛ basra. La wil-sɛka woo n wɔnnɩ biɛ, a yorsrɩ ẽ mɛ tɩ a ãna sõŋa malɩn wɔnna biɛ zɔ'ɔra. 3Yãma põn ãna sõŋa mɛ, yetɔg-sɛba tɩ mam tɔgɛ bɔ ya la ĩyã. 4Bɔna-ya la mam lɛ, tɩ mam wʋn bɔna la ya. Wʋ tɩa wille n ka tã wʋn wɔm biɛ a to'ore tɩ a sãn ka bɔna la tɩa la, bɛla, ya mẽ sãn ka bɔna la mam, ya ka tã wʋn wɔm biɛ.
5Mam n de tɩa la, tɩ yãma dɛna wila la. Sɛka n boe la mam, tɩ mam bɔna la ẽ, ẽŋa dãana tõnnɩ tõon-sõma zɔ'ɔra mɛ, se'ere n soe la, ya ka tã wʋn ẽŋɛ sɛla sɛla, tɩ ya sãn ka bɔna la mam. 6Nẽra sãn ka bɔna la mam lɛ, ba wʋn lobe ẽ basɛ wʋ tɩa wille la, tɩ a kʋɩ. La ba vaarɩ wil-sɛba n kʋɩ la ɩta la bugum pʋam, tɩ bugum dita ba. 7Ya sãn bɔna la mam, tɩ mam yetɔga la bɔna ya pʋam, ya sose yan boorɩ sɛla wuu, tɩ ya wʋn yẽ. 8Ya sãn tõm tõon-sõma zo'oge pa'alɛ tɩ yãma de la mam karẽnbiisi, bɛla ya wʋn nã'asɛ mam Sɔ.
9Mam nõŋɛ ya wʋ mam Sɔ n nõŋɛ mam se'em na. Tara-ya mam nõŋlʋm na ya sũure pʋam. 10Ya sãn sakɛ mam nõorɛ la, ya wʋn tara mam nõŋlʋm na ya sũure pʋam, wʋ mam sakɛ m Sɔ nõorɛ tara a nõŋlʋm se'em na. 11Mam tɔgɛ ya wãna tɩ ya tara la mam sũ-yẽlga, tɩ ya sũ-yẽlga wʋn zo'oge pãɩ.
12Mam nõorɛ n wãna: Nõŋɛ-ya taaba, wʋ mam n nõŋɛ ya se'em na. 13Nẽra ka boe n tarɩ nõŋlʋm gãnna nẽra n sakɛ tɩ a ki a sɩrdõma ĩyã. 14Ya sãn ẽŋɛ mam n yele ya se'em na, ya de la mam sɩrdõma. 15Mam ka le wi'ira ya tɩ m tõntõnɩba, se'ere n soe la, tõntõnna ka mi a zuudãana n ɩtɩ sɛla. Mam wi'iri ya tɩ m sɩrdõma, se'ere n soe la, mam botɩ yãma bãŋɛ bõn-sɛba tɩ mam Sɔ yele mam na wuu mɛ. 16Dagɩ yãma n looge mam, mam n looge ya, dɩkɛ m tõonɛ na ẽŋɛ ya nu'usum tɩ ya sẽŋɛ ka tõm tõon-sõma wʋ tɩa n wɔnnɩ biɛ la, tɩ ya tõon-sõma la wʋn bɔna wakatɛ wuu. Bɛla, bõn-sɛka woo tɩ ya wʋn sose mam Sɔ la, la mam yʋ'ʋrɛ, a wʋn bɔ ya. 17Mam n bɔ ya nõorɛ tɩ ya ẽŋɛ se'em de la ya nõŋɛ taaba.»
Dũnia nẽrba sise Azezi la a karẽnbiisi
18Tɩ Azezi le yele yetɩ: «Dũnia nẽrba sãn sise ya, ya bãŋɛ tɩ ba dẽŋɛ sise la mam. 19Ya sãn de nɩ na dũnia n soe ya, dũnia nẽrba wʋn nõŋɛ nɩ ya, se'ere n soe la, ya de la dũnia bõnɔ. La mam loose ya la dũnia pʋam yese, la dagɩ dũnia n soe ya, bɛla tɩ dũnia nẽrba sisra ya. 20Tẽegɛ-ya yetɔg-sɛka tɩ mam yele ya tɩ: ‹Tõntõnna ka gãnna a zuudãana la.› Ba sãn nãmsɛ mam, ba mẽ wʋn nãmsɛ yãma mɛ. La ba sãn sakɛ mam yetɔga, ba wʋn sakɛ yãma mẽ yetɔga. 21La ba wʋn ẽŋɛ ya bõn-bãma wuu mam yʋ'ʋrɛ ĩyã, se'ere n soe la, ba ka mi sɛka n tõm mam na. 22Mam sãn ka wa'am nɩ, la mam sãn ka tɔgɛ nɩ la ba lɛ, ba tõon-be'ero taalɛ ka boe ba zuo. La lɛɛlɛ wã, ba ka tã wʋn yetɩ bãma tarɩ bʋʋrɔ. 23Sɛka n sisri mam na, a mẽ sisri mam Sɔ la mɛ. 24Mam sãn ka tõm nɩ tõon-sɛba tɩ nẽra baa ayɩla nãn ka tõm ba tẽŋasʋka, ba tõon-be'ero taalɛ ka boe ba zuo. La lɛɛlɛ wã, ba yẽ mam tõoma mɛ, dee sise mam na m Sɔ la. 25Bɛla pʋam tɩ bõn-sɛka n gʋlsɛ Nawẽnnɛ gõŋɔ pʋam na ẽŋɛ. La yetɩ: ‹Ba sise mam na zãŋa.›
26Sõŋra la wʋn wa'am ya zẽ'am, a de la sɩra Sɩa tɩ mam wʋn tõm, tɩ a ze'ele mam Sɔ Nawẽnnɛ zẽ'am wa'am ya zẽ'am. Ẽŋa wʋn tɔgɛ mam yelle bɔ ya. 27La yãma mẽ wʋn tɔgɛ mam yelle, se'ere n soe la, halɩ pĩ'iluŋo tɩ ya boe la mam lɛ.
Currently Selected:
Azã 15: gurDBL
Highlight
Share
Copy
Want to have your highlights saved across all your devices? Sign up or sign in
© 2008, 2010, Wycliffe Bible Translators, Inc. All rights reserved.