Azã 13
13
Azezi peege a karẽnbiisi nãma
1Lan dẽŋɛ Zɔɔg-basɛ kibsa la, Azezi mi mɛ tɩ ẽŋa wakatɛ paagɛ mɛ tɩ ẽŋa wʋn fõrgɛ dũnia sẽŋɛ a Sɔ zẽ'am. La a daan nõŋɛ a nẽrba la n boe dũnia mɛ, a nõŋɛ ba la halɩ nõŋlʋm zõnzõnnɔ.
2Azezi la a karẽnbiisi la daan boe mĩ dita la zaanõorɛ dia. La Asũtãana daan põn botɩ Asimõ dayʋa Azudaasɩ Iskariyo tẽ'esɛ a sũurum tɩ ẽŋa wʋn pa'alɛ tɩ ba yõkɛ Azezi. 3La Azezi daan mi tɩ ẽŋa ze'ele la Nawẽnnɛ zẽ'am wa'am, la ẽŋa lebrɩ la Nawẽnnɛ zẽ'am, la a mi tɩ ẽŋa Sɔ Nawẽnnɛ dɩkɛ sɛla woo ẽŋɛ la ẽŋa nu'usum. 4Tɩ a isge dia la zẽ'am yɛɛgɛ a fu-sɛka n boe zuum na, dee dɩkɛ tãnnɛ lʋ a sɩa. 5Yãŋa pʋrgɛ ko'om ẽŋɛ laaga pʋam, pɛɛra a karẽnbiisi la nãma, dɩkɛ tãnnɛ la n lʋ a sɩa la duusra ba.
6Tɩ a daan paagɛ Asimõ-pɩyɛɛrɩ zẽ'am, tɩ a soke ẽ yetɩ: «M Zuudãana, fõn yetɩ fʋ peege la mam nãma?» 7Tɩ Azezi lerge ẽ yetɩ: «Fõn ka mi mam ɩtɩ se'em wã võorɛ lɛɛlɛ, la fʋ wʋn wa bãŋɛ.» 8Tɩ Apɩyɛɛrɩ yele ẽ yetɩ: «Ayɛɩ! Fõn kãn peege mam nãma.» Tɩ Azezi lerge ẽ yetɩ: «Mam sãn ka peege fo, fʋ ka le tara pʋrɛ la mam.» 9Tɩ Asimõ-pɩyɛɛrɩ yele ẽ yetɩ: «M Zuudãana, da peege m nãma la mã'a, po peege m nu'usi la m zuugo.» 10Tɩ Azezi yele ẽ yetɩ: «Sɛka n sɔ ĩyã ka le bɔɔra tɩ a sɔ, sãn dagna a nãma mã'a tɩ a wʋn peege, se'ere n soe la, a ĩyã wuu dẽkɛ mɛ sõŋa sõŋa. Ya dẽkɛ mɛ ãna sõŋa sõŋa, la, la dagɩ ya wuu.» 11Azezi daan mi sɛka n yetɩ a pa'alɛ tɩ ba yõkɛ ẽ na mɛ, bɛla ĩyã tɩ a yetɩ, dagɩ ya wuu n ãn sõŋa.
12La Azezi n peege ba nãma kɩ'ɩlɩm na, a le yɛ la a fuugo la, lebe ka zĩ'ire dia la zẽ'am, yele ba yetɩ: «Yãma bãŋɛ mam n ẽŋɛ se'em na võorɛ? 13Yãma wi'iri mam tɩ Karẽnsãama, la Zuudãana, ya yele sõŋa. Mam de la bɛla. 14Mam n de ya Zuudãana, la ya Karẽnsãama la sãn peege ya nãma, yãma mẽ masɛ mɛ tɩ ya pɛɛra taaba nãma. 15Se'ere n soe la, la de la mãmsgɔ tɩ mam ẽŋɛ bɔ ya, tɩ ya mẽ ɩta wʋ mam n ẽŋɛ ya se'em na. 16Mam yetɩ ya la sɩra sɩra, tɩ tõntõnna ka gãnnɩ a zuudãana, la sɛka tɩ ba tõm na ka gãnnɩ sɛka n tõm ẽ na. 17Yan mi bõn-bãma la, ya sãn ẽŋɛ bɛla, ya de la zu-yẽlʋm dõma. 18La dagɩ ya wuu yelle tɩ mam tɔgrɩ, mam mi sɛba tɩ mam looge la mɛ, la dẽnɩ tɩ bõn-sɛba n gʋlsɛ Nawẽnnɛ gõŋɔ pʋam na ẽŋɛ. La yetɩ: ‹Nẽr-sɛka n diti la mam na, wẽrgɛ mɛ zɛbra la mam.› 19Mam dẽŋɛ yɛta ya mɛ lɛɛlɛ wã, tɩ la nãn ka ẽŋɛ. Tɩ la sãn wa ẽŋɛ, ya wʋn bɔ sɩra tɩ mam de la sɛka tɩ mam de la. 20Mam yetɩ ya la sɩra sɩra, tɩ sɛka n to'orɩ sɛka tɩ mam tõm na, a to'orɩ la mam. La sɛka n to'orɩ mam na, a to'orɩ la sɛka n tõm mam na.»
Azezi yetɩ nẽra n wʋn pa'alɛ tɩ ba yõkɛ ẽŋa
(Amatie 26:20-25, Amarkɩ 14:17-21, Aluki 22:21-23)
21Azezi n tɔgɛ bɛla la, sũ-sã'aŋɔ n tarɩ ẽ zozo'e, tɩ a yetɩ: «Mam yetɩ ya la sɩra sɩra, tɩ ya nẽra ayɩla n wʋn wa pa'alɛ tɩ ba yõkɛ mam.» 22Tɩ a karẽnbiisi la daan bɩsra taaba, ka mina ẽn tɔgrɩ nẽr-sɛka yelle. 23La Azezi karẽnbiisi la ayɩla, sɛka tɩ a nõŋɛ la daan zĩ la Azezi sakʋkɔ. 24Tɩ Asimõ-pɩyɛɛrɩ kãbsɛ ẽ tɩ a soke Azezi bãŋɛ la de la ãn yelle tɩ a tɔgrɩ la. 25Tɩ karẽnbi-ẽŋa dente Azezi, soke ẽ yetɩ: «Zuudãana, ãn de ẽ?» 26Tɩ Azezi lerge yetɩ: «A de la sɛka tɩ mam wʋn suke borborɩ girgo bɔ ẽ na.» A dɩkɛ borborɩ girgo la suke bɔ la Azudaasɩ n de Asimõ Iskariyo dayʋa. 27Tɩ Azudaasɩ to'oge borborɩ la, tɩ Asũtãana kẽ a sũurum. Tɩ Azezi yele ẽ yetɩ: «Fõn yetɩ fʋ ẽŋɛ se'em na, ẽŋɛ ẽ tɔtɔ.» 28La sɛba n daan lagɩm bɔna mĩ dita la, nẽra nẽra ka bãŋɛ se'ere n soe tɩ a yele ẽ bɛla. 29La Azudaasɩ n daan zɛɛrɩ ligri tãmpɔkɔ la, nẽrba basɛba tẽ'esɛ tɩ Azezi yele ẽ tɩ a sẽŋɛ ka da la bõn-sɛba tɩ ba boorɩ tɩ ba dɩkɛ ẽŋɛ kibsa la, bɩɩ a bɔ nasdõma sɛla. 30Azudaasɩ n daan to'oge borborɩ la, dee kɔ'ɔn yese. La daan de la yʋ'ʋŋɔ.
Azezi bɔ a karẽnbiisi nõor-paalga
31Azudaasɩ n yese la, tɩ Azezi yetɩ: «Lɛɛlɛ wã Nẽrsaala Dayʋa la wʋn yẽ a na'am pãŋa, la Nawẽnnɛ wʋn yẽ nã'asgɔ a ĩyã. 32Nawẽnnɛ sãn yẽ nã'asgɔ a ĩyã, Nawẽnnɛ mẽŋa wʋn nã'asɛ ẽ. Lɛɛlɛ wã tɩ a wʋn nã'asɛ ẽ. 33M kɔma, mam ken bɔna la ya la wakatɛ fẽe mã'a. La ya wʋn ɛ mam, la mam yetɩ ya lɛɛlɛ wã wʋ mam n daan yele Zifdõma se'em na: Ya ka tã wʋn wa'am zẽ'e-sɛka tɩ mam we'esɩ la.
34Mam bɔ'ɔrɩ ya la nõor-paalga: Nõŋɛ-ya taaba. Wʋ mam n nõŋɛ ya se'em na, ya mẽ nõŋɛ taaba bɛla. 35Ya sãn nõŋɛ taaba, nẽrba wuu wʋn bãŋɛ tɩ ya de la mam karẽnbiisi.»
Azezi dẽŋɛ tɔgɛ tɩ Apɩyɛɛrɩ wʋn sɩ'ɩsɛ ẽŋa
(Amatie 26:31-35, Amarkɩ 14:27-31, Aluki 22:31-34)
36Tɩ Asimõ-pɩyɛɛrɩ soke Azezi yetɩ: «Zuudãana, fõn we'esɩ la bɛ?» Tɩ a lerge ẽ yetɩ: «Mam n we'esɩ zẽ'a na, fʋ ka tã wʋn doose mam sẽŋɛ lɛɛlɛ wã. La fʋ wʋn wa doose mam poore wa'am.» 37Tɩ Apɩyɛɛrɩ soke ẽ yetɩ: «Zuudãana, bẽm ẽŋɛ tɩ mam kãn tã'agɛ doose fõn sẽŋɛ lɛɛlɛ wã? Mam sakɛ tɩ m ki mɛ fõn ĩyã.» 38Tɩ Azezi lerge ẽ yetɩ: «Fõn wʋn sakɛ tɩ fʋ ki mam ĩyã? Mam yetɩ fʋ la sɩra sɩra, tɩ lan dẽŋɛ nõ-rɔɔgɔ n wʋn kaasɛ, fʋ wʋn sɩ'ɩsɛ nõorɛ atã tɩ fõn ka mi mam.»
Currently Selected:
Azã 13: gurDBL
Highlight
Share
Copy
Want to have your highlights saved across all your devices? Sign up or sign in
© 2008, 2010, Wycliffe Bible Translators, Inc. All rights reserved.