Azã 12
12
Amaari ka'agɛ tɩdarɛ kaam ẽŋɛ Azezi
(Amatie 26:6-13, Amarkɩ 14:3-9)
1Zɔɔg-basɛ kibsa daan deege la dabsa ayoobɩ la a paagɛ, tɩ Azezi sẽŋɛ Betani, ẽn vo'oge Alazaarɩ tẽn-sɛka la. 2Tɩ ba daan ẽŋɛ dia bilam bɔ ẽ, tɩ Amartɩ daan pʋta dia la. La Alazaarɩ daan lagɩm na nẽrba la zẽa la Azezi dita. 3Tɩ Amaari dɩkɛ tɩdarɛ ka-sõma ligri n zo'oge, tɩ ba wi'iri tɩ «naarɩ» n paagɛ lɩtrɩ pʋsʋka wa'am wa ka'agɛ ẽŋɛ Azezi nãma, dɩkɛ a zomto duuse ba. Tɩ yire la wuu lebge tɩdarɛ kaam na yũuŋo. 4Tɩ Azezi karẽnbia ayɩla yʋ'ʋrɛ n de Azudaasɩ Iskariyo, sɛka n wʋn wa pa'alɛ tɩ ba yõkɛ ẽ na, yetɩ: 5«Tɩ sãn koose nɩ tɩdarɛ kaam wã lig-kõba kɔbstã, tɩ kãn dɩkɛ ligri la bɔ nasdõma?» 6Ẽn yele bɛla la, dagɩ tɩ a fablɩ la nasdõma yelle, la de la ẽn de nayiga, la ẽŋa n tarɩ ba ligri tãmpɔkɔ, zũura sɛla tɩ ba sũm a pʋam na. 7Tɩ Azezi yetɩ: «Basɛ-ya pɔka la bãalam, tɩ a dẽŋɛ ẽŋɛ la ba wʋn ẽŋɛ mam se'em mam laarɛ daarɛ. 8Nasdõma boe la ya lɛ mɛ daarɛ woo, la mam kãn bɔna la ya daarɛ woo.»
9Tɩ Zifdõma zozo'e wõm tɩ Azezi boe la Betani. Tɩ ba sẽŋɛ mĩ, la dagɩ Azezi mã'a ĩyã tɩ ba sẽŋɛ, ba sẽŋɛ tɩ ba mẽ ka yẽ la Alazaarɩ tɩ Azezi daan vo'oge la. 10Tɩ kãabgɔ kẽma nẽŋadõma la bãm yetɩ, bãma mẽ wʋn kʋ Alazaarɩ mɛ, 11tɩ la de la ẽŋa ĩyã tɩ Zifdõma zozo'e basɛ bãma dee bɔ Azezi sɩra.
Azezi kẽ'erɩ Zerizalɛm la na'am
(Amatie 21:1-11, Amarkɩ 11:1-11, Aluki 19:28-40)
12Tɩ beere wiige, tɩ nẽr-kʋʋŋɔ la n wa'am kibsa la wõm tɩ Azezi sẽm Zerizalɛm. 13Tɩ ba kɔ karkɔnsɩ võorɔ tʋ'ʋsra ẽ, dee tɔgra ke'enke'em yetɩ:
«Ozaana! Pẽgɛ-ya nẽr-sɛka n sẽm na Zuudãana Nawẽnnɛ yʋ'ʋrɛ la,
ẽŋa n de Ɩsrayɛlɩ dõma naba la.»
14Tɩ Azezi yẽ bõn-biire bã ẽ wʋ lan gʋlsɛ Nawẽnnɛ gõŋɔ pʋam se'em yetɩ:
15«Siyõ nẽrba, da zɔta-ya dabeem.
Bɩsɛ-ya, ya naba n bã bõn-biire sẽna la.»
16La Azezi karẽnbiisi la daan nãn ka bãŋɛ yel-ẽŋa võorɛ. La Azezi n yãŋa wa yẽ na'am pãŋa Nawẽnnɛ zẽ'am na, tɩ ba tẽegɛ tɩ bõn-ẽŋa n gʋlsɛ a yelle, la ba daan ẽŋɛ la bɛla bɔ ẽ.
17La nẽr-sɛba n wa bɔna Azezi zẽ'am, wakat-sɛka tɩ a wi Alazaarɩ tɩ a vo'oge ze'ele yɔɔgɔ pʋam yese la, daan pa'alɛ nẽrba la ẽn daan ẽŋɛ se'em mɛ. 18Bɛla n soe tɩ nẽr-kʋʋŋɔ la tʋ'ʋsɛ ẽ, ban wõm tɩ a tõm na tõon-yãlm-ẽŋa la ĩyã. 19Bɛla tɩ Farisi dõma yɛta taaba yetɩ: «Ya yẽ ya, ya ka tã wʋn ẽŋɛ sɛla sɛla. Bɩsɛ-ya, nẽrba wuu dolɩ ẽ mɛ.»
Grɛkɩdõma eerɩ tɩ ba yẽ Azezi, tɩ Azezi tɔgra a kũm yelle
20La Grɛkɩdõma n daan boe nẽr-sɛba n sẽŋɛ Zerizalɛm kibsa tɩ ba pʋ'ʋsɛ Nawẽnnɛ na pʋam. 21Bãma n sẽŋɛ Afilipi n ze'ele Betisayida n boe Galile so'olʋm pʋam na zẽ'am, ka yele ẽ yetɩ: «Kɛ'ɛma, tõma boorɩ tɩ tɩ yẽ la Azezi.» 22Tɩ Afilipi sẽŋɛ ka yele A'ãndre, tɩ A'ãndre la Afilipi doose taaba sẽŋɛ ka yele Azezi. 23Tɩ Azezi lerge ba yetɩ: «Wakatɛ la paagɛ mɛ tɩ Nẽrsaala Dayʋa la wʋn yẽ a na'am pãŋa. 24Mam yetɩ ya la sɩra sɩra, tɩ ba sãn ka bʋrɛ ke-biire tɩ a yɛm bule yese dee tɩ a mẽŋa põ'ogɛ, ke-bi-ẽŋa ayɩla mã'a n wʋn bɔna, la ba sãn bʋrɛ ẽ tɩ a yɛm na bule yese dee tɩ a mẽŋa ki, a wʋn wɔm biɛ zozo'e. 25Nẽr-sɛka n nõŋɛ a vɔm, a wʋn koŋe vɔm, la nẽr-sɛka n ka nõŋɛ a vɔm dũnia wã zuo, a wʋn tara vɔm n ka ba'asrɩ. 26La nẽra sãn bɔɔra tɩ a tõm bɔ mam, dẽnɩ tɩ a dɔla mam. La mam n boe zẽ'e-sɛka la, mam tõntõnna mẽ wʋn bɔna la bilam. La nẽra sãn tõnna bɔ'ɔra mam, mam Sɔ wʋn pẽgɛ ẽ.
27Lɛɛlɛ wã mam sũure sã'am mɛ, la m wʋn yetɩ bẽm? Mam wʋn yetɩ: M Sɔ, sõŋɛ ma tɩ m põsɛ nãmsgɔ ẽna wã bɩɩ? Ayɛɩ, la de la yel-ẽna ĩyã tɩ mam wa'am tɩ m nãmsɛ.» 28A yele bɛla dee yetɩ: «Mam Sɔ, nã'asɛ fʋ yʋ'ʋrɛ.» Tɩ kõa ze'ele saazuum yetɩ: «Mam nã'asɛ m yʋ'ʋrɛ mɛ, la mam wʋn le nã'asɛ ẽ.»
29Tɩ nẽr-sɛba n ze bilam na wõm, yetɩ: «Saaga n dãmɛ.» Tɩ basɛba yetɩ: «Malɛka n tɔgɛ la ẽ.» 30Tɩ Azezi yele yetɩ: «La dagɩ mam ĩyã tɩ kõ-ẽŋa tɔgɛ, la de la yãma ĩyã. 31Lɛɛlɛ wã de la dũnia wã sarɩyadia wakatɛ. Lɛɛlɛ wã ba wʋn dige dũnia wã naba basɛ yẽŋa. 32La ba sãn wa zẽkɛ mam saazuum, mam wʋn tarɩ nẽrba wuu wa'am mam zẽ'am.» 33Azezi yele bɛla pa'alɛ la ẽŋa wʋn ki se'em. 34Tɩ nẽr-kʋʋŋɔ la lerge ẽ yetɩ: «La gʋlsɛ lɔɔ gõŋɔ pʋam pa'alɛ tõma yetɩ, Krisi wʋn bɔna la wakatɛ wuu, la bẽm tɩ fõn yetɩ, dẽnɩ tɩ ba zẽkɛ Nẽrsaala Dayʋa la saazuum? Ãne n de Nẽrsaala Dayɔ-ẽŋa?» 35Tɩ Azezi yele ba yetɩ: «Peelem ken bɔna la ya lɛ mɛ wakatɛ fẽe. Peelem wã n ken bɔna la ya wakat-sɛka la, sẽnna-ya tɩ lika da wa liŋe ya. Sɛka n sẽnnɩ lika pʋam ka mi ẽn we'esɩ zẽ'a. 36Wakat-sɛka tɩ peelem ken bɔna la yãma la, bɔ-ya sɛka n de peelem na sɩra, tɩ ya lebge peelem na kɔma.»
Azezi yele la bɛla dee fõrgɛ ba zẽ'am, sẽŋɛ ka sʋgɛ. 37Baa la Azezi n ẽŋɛ bõn-yãlma zozo'e nẽrba la nẽŋam na, ba ka bɔ ẽ sɩra. 38Bɛla tɩ Nawẽnnɛ nõtɔ'ɔsa A'ezayi n yʋʋn yele se'em na ẽŋɛ. A yʋʋn yetɩ:
«Zuudãana, ãne n bɔ tõma kõa la sɩra?
La Zuudãana la pãŋa puke pa'alɛ la ãne?»
39Ba ka tã wʋn bɔ sɩra, se'ere n soe la, A'ezayi yʋʋn le yetɩ:
40«Nawẽnnɛ pĩ ba nini mɛ,
tɩ ba da yẽta la ba nini na,
dee lige ba pʋtẽ'era,
tɩ ba da wõm a yetɔga la võorɛ.
Sãn dagɩ nɩ bɛla,
ba wʋn teege nɩ yɛm
tɩ a bɔ ba laafɛ.»
41A'ezayi yʋʋn yele la bɛla, se'ere n soe la, a yʋʋn yẽ la Azezi na'am pãŋa, tɩ a yʋʋn tɔgɛ a yelle. 42Baa la bɛla wuu, Zifdõma nẽŋadõma la pʋam nẽrba zozo'e bɔ ẽ sɩra mɛ, la Farisi dõma la ĩyã ba ka sakɛ yele, ba zotɩ mɛ tɩ ba wʋn dige ba ba wẽndeego la pʋam. 43Ba daan nõŋɛ la nẽrsaalba pẽka gãnna Nawẽnnɛ pẽka.
Azezi yetɔga n diti nẽrba sarɩya
44Azezi tɔgɛ ke'enke'em yetɩ: «Sɛka n bɔ'ɔrɩ mam sɩra, la dagɩ mam mã'a tɩ a bɔ'ɔrɩ sɩra, a bɔ'ɔrɩ la sɛka n tõm mam na sɩra. 45La sɛka n yẽ mam, yẽ la sɛka n tõm mam na. 46Mam de la peelem n wa'am dũnia zuo, tɩ nẽr-sɛka n bɔ'ɔrɩ mam sɩra kãn bɔna lika pʋam. 47La nẽra sãn wõm mam yetɔga, dee ka sakɛ yetɔga la, la dagɩ mam n wʋn di a sarɩya, se'ere n soe la, mam ka wa'am tɩ m di dũnia dõma sarɩya, mam wa'am tɩ m fãagɛ ba mɛ. 48Sɛka n zagsɛ mam, ka sakɛ mam yetɔga la, a tarɩ sɛka n wʋn di a sarɩya. La de la yetɔga la tɩ mam tɔgɛ la n wʋn pa'alɛ tɩ a ka tarɩ bʋʋrɔ dũnia ba'asgɔ daarɛ. 49Se'ere n soe la, mam ka tɔgrɩ la m mẽŋa pʋtẽ'erɛ. La de la mam Sɔ n tõm mam na mẽŋa n bɔ mam nõorɛ mam wʋn yele se'em, la mam wʋn tɔgɛ sɛla yelle. 50La mam mi tɩ sɛka n sakɛ a nõorɛ la tarɩ la vɔm n ka ba'asrɩ. La bõn-sɛba tɩ mam yetɩ la, la de la mam Sɔ n yele mam se'em na n bɛla tɩ mam yele.»
Currently Selected:
Azã 12: gurDBL
Highlight
Share
Copy
Want to have your highlights saved across all your devices? Sign up or sign in
© 2008, 2010, Wycliffe Bible Translators, Inc. All rights reserved.