Tõoma 8

1La Asolɩ daan sakɛ tɩ A'etɩɛnɩ kũm na masɛ mɛ.

Azezi karẽnbiisi nãmsgɔ yelle

La daar-ẽŋa tɩ ba pɔsɛ nãmsra Azezi nẽr-kʋʋŋɔ n boe Zerizalɛm na halɩ, tɩ ba wuu zoe wɩrgɛ Zude, la Samaari so'olʋm pʋam, la Azezi Tõntõnɩba pia la ayi la mã'a n weege. 2Tɩ nẽr-sɛba n zotɩ Nawẽnnɛ daan dɩkɛ A'etɩɛnɩ sẽŋɛ ka laagɛ, dee kɛlla zozo'e a kũm na ĩyã.

3La Asolɩ daan kɔ'ɔn nãmsra Azezi nẽr-kʋʋŋɔ la mɛ bɔɔra tɩ a sã'am ba wuu, kẽ'era yiɛ pʋam yõgra bʋraasɩ la pɔgsɩ botɩ ba tara ba sẽnna yʋ'ʋra.

Afilipi mõolɛ Nawẽnnɛ kõ-yẽlga Samaari

4Tɩ Azezi karẽnbi-sɛba n daan wɩrgɛ la daan sẽnna zẽ'esɩ wuu mõola Nawẽnnɛ kõ-yẽlga. 5Afilipi daan sẽŋɛ la Samaari tẽŋa ayɩla pʋam ka mõolɛ Krisi kõ-yẽlga la bɔ ba. 6La nẽr-kʋʋŋɔ la daan selsrɩ Afilipi n tɔgrɩ ba se'em na mɛ sõŋa sõŋa, ban wõm dee yẽ ẽn ɩtɩ bõn-yãlma la. 7La kʋlkã'arsɩ daan ẽn tĩi kaasɛ mɛ, yese dee basɛ ban tarɩ sɛba la. Tɩ nẽr-sɛba n de kɔɔrnɔ la wɔbsɩ zozo'e daan yẽ ĩmã'asʋm. 8Tɩ tẽŋa la nẽrba tara sũ-yẽlga zozo'e.

9La bʋraa n daan boe tẽŋa la pʋam tɩ a yʋ'ʋrɛ dɛna Asimõ. A daan de la tɩɩm dãana, tõnna tɩɩm tõoma botɩ Samaari so'olʋm nẽrba palẽŋa ẽgra. Dee pa'ala a mẽŋa tɩ ẽŋa de la nẽr-kãtɛ, 10tɩ nẽrba wuu sakra a yetɔga sõŋa, bõnbɩ'ɩsɩ la bõnkɛgsɩ wuu yɛta tɩ: «Bʋra-ẽna de la sɛka tɩ ba wi'iri tɩ wẽnnɛ pãn-kãtɛ la n sige.» 11Ẽn tõm a tɩɩm tõoma botɩ nẽrba la palẽŋa ẽgra yuuge la, ba sakɛ ẽ mɛ sõŋa sõŋa. 12La Afilipi n mõolɛ Nawẽnnɛ so'olʋm yelle, la Azezi-krisi yʋ'ʋrɛ bɔ ba la, ba daan bɔ a yetɔga la sɩra mɛ, botɩ a mise ba ko'om pʋam, bʋraasɩ la pɔgsɩ. 13Tɩ Asimõ mẽ sakɛ yetɔga la, botɩ ba mise ẽ ko'om pʋam, tɩ a dɩkɛ a mẽŋa lablɛ Afilipi, la ẽn yẽtɩ bõn-yãlma la yel-kɩrsɩ sɛba n ɩtɩ la, la ẽkɛ la a palẽŋa.

14Azezi Tõntõnɩba la n daan boe Zerizalɛm na wõm mɛ tɩ Samaari dõma to'oge Nawẽnnɛ yetɔga mɛ, tɩ ba tõm Apɩyɛɛrɩ la Azã ba zẽ'am. 15La ban paagɛ mĩ na, ba pʋ'ʋsɛ mɛ bɔ ba tɩ ba to'oge Nawẽnnɛ Sɩa. 16Se'ere n soe la, ba daan põn mise ba la ko'om pʋam la Zuudãana Azezi yʋ'ʋrɛ, dee tɩ Nawẽnnɛ Sɩa nãn ka sige ba nẽra nẽra zuo. 17Tɩ Apɩyɛɛrɩ la Azã dɩkɛ ba nu'usi paglɛ ba zuto, tɩ ba yãŋa to'oge Nawẽnnɛ Sɩa la.

18Asimõ n yẽ tɩ Azezi Tõntõnɩba la n dɩkɛ ba nu'usi paglɛ ba zuto, tɩ ba to'oge Nawẽnnɛ Sɩa la, a daan boorɩ tɩ a bɔ ba la ligri, 19yãŋa yele ba yetɩ: «Bɔ-ya mam pãn-ẽna wã tɩ nẽr-sɛka woo tɩ mam wʋn dɩkɛ m nu'usi paglɛ a zuo, a wʋn kɔ'ɔn to'oge Nawẽnnɛ Sɩa.»

20Tɩ Apɩyɛɛrɩ lerge ẽ yetɩ: «Fõn na fʋ ligri la wʋn sã'am, fõn tẽ'esɛ tɩ Nawẽnnɛ bɔ'a da'arɩ la ligri la ĩyã. 21Fʋ nẽŋa ka boe yel-bãna pʋam, la fʋ ka tarɩ pʋrɛ mĩ, se'ere n soe la, fʋ sũure ka masɛ Nawẽnnɛ nifum. 22Teege yɛm basɛ tõon-be'e-ẽna wã, dee sose Zuudãana, tɩ tã tɩ a basɛ fʋ tõon-be'ero tɩ fʋ tẽ'esrɩ fʋ sũurum na taalɛ. 23Mam yẽ tɩ fʋ tarɩ la sũ-toogo, tɩ tõon-be'ero lʋ fɔ.» 24Tɩ Asimõ lerge yetɩ: «Pʋ'ʋsɛ-ya Zuudãana bɔ ma tɩ bõn-sɛka tɩ ya yele mam na sɛla sɛla da paagɛ ma.»

25Apɩyɛɛrɩ la Azã daan tɔgɛ Zuudãana Azezi yetɔga la pa'alɛ nẽrba mɛ, dee daan lɛbra Zerizalɛm. La sore zuo, ba mõolɛ kõ-yẽlga Samaari tẽnsɩ zozo'e pʋam mɛ.

Afilipi la Etiopi bʋraa yelle

26Tɩ Nawẽnnɛ malɛka tɔgɛ bɔ Afilipi yetɩ: «Isge sẽŋɛ wẽntulle gɔbga bɔba, doose sorɔ-sɛka n ze'ele Zerizalɛm wɛ Gaza la, sorɔ-ẽŋa dolɩ la weego pʋam.» 27Tɩ a isge sẽŋɛ. La Etiopi bʋraa n daan dolɩ sore la, a de la nẽr-kãtɛ, a gu'uri la Etiopi pɔg-naba Akãndase bõntarsõm. A daan sẽŋɛ la Zerizalɛm ka pʋ'ʋsɛ Nawẽnnɛ, 28dee zẽa wiiri torko pʋam lɛbra kulla. A daan tarɩ la Nawẽnnɛ nõtɔ'ɔsa A'ezayi gõŋɔ karẽŋra.

29Tɩ Nawẽnnɛ Sɩa yele Afilipi yetɩ: «Sẽŋɛ lɛm torko wã.» 30Tɩ Afilipi zoe paagɛ, wõm tɩ a karẽŋrɩ la Nawẽnnɛ nõtɔ'ɔsa A'ezayi gõŋɔ. Tɩ Afilipi soke ẽ yetɩ: «Fõn wõnnɩ fõn karẽŋɛ se'em wã võorɛ mɛ bɩɩ?» 31Tɩ a lerge yetɩ: «Mam wʋn ẽŋɛ la wãne wõm, tɩ nẽra sãn ka pa'alɛ mam?» Dee sose Afilipi yetɩ, a zom zĩ'ire ẽŋa zẽ'am. Tɩ a zom zĩ'ire. 32Nawẽnnɛ gõŋɔ zẽ'e-sɛka tɩ a daan karẽŋrɩ la gʋlsɛ yele la wãna:

«A ãn wʋ pesgo

tɩ ba tarɩ wɛ tɩ ba kʋ,

dee ãna wʋ pebila

tɩ ba sɛɛrɩ a kõbrɔ

tɩ a ka kaasra,

dee mẽ põn ka ya'ara nõorɛ.

33Ba pɔ'ɔgɛ ẽ mɛ,

ka di a sarɩya sõŋa.

Tɩ nẽra ka bɔna wʋn tɔgɛ a yɩɩsɩ yelle,

se'ere n soe la,

ba yese a vɔm mɛ dũnia zuo.»

34Tɩ Etiopi bʋraa la soke Afilipi yetɩ: «Ãn yelle tɩ Nawẽnnɛ nõtɔ'ɔsa la tɔgrɩ wãna? A tɔgrɩ la a mẽŋa yelle bɩɩ, nẽra ayẽma yelle?» 35Tɩ Afilipi yãŋa dɩkɛ Nawẽnnɛ gõŋɔ la zẽ'e-sɛka tɩ a karẽŋɛ la pa'alɛ a võorɛ, dee doose bilam tɔgɛ Azezi kõ-yẽlga bɔ ẽ.

36La ban sẽnnɩ wɛ la, ba paagɛ la zẽ'a tɩ ko'om boe mĩ. Tɩ Etiopi bʋraa la yele Afilipi yetɩ: «Bɩsɛ, ko'om n wãna n boe kalam. Bẽm n wʋn gu mam ko'om misga?» [ 37Tɩ Afilipi yele ẽ yetɩ: «Fʋ sãn bɔ Azezi sɩra la fʋ sũure wuu, fʋ tã wʋn to'oge ko'om misga mɛ.» Tɩ a lerge yetɩ: «Mam sakɛ tɩ Azezi-krisi de la Nawẽnnɛ Dayʋa.»] 38Dee botɩ torko la ze'ele. Tɩ Afilipi la ẽŋa sige ko'om na pʋam, tɩ Afilipi mise ẽ ko'om pʋam. 39La ban ze'ele ko'om na pʋam dɔɔra la, tɩ Zuudãana Nawẽnnɛ Sɩa zẽkɛ Afilipi fõrgɛ. Tɩ Etiopi bʋraa la ka le yẽ ẽ, dee lebe dɔla a sore la wɛ'ɛsa la sũ-yẽlga.

40Tɩ nẽrba yẽ Afilipi Azɔtɩ tẽŋam, tɩ a dɔla tẽnsɩ la wuu pʋam mõola Nawẽnnɛ kõ-yẽlga halɩ ka paagɛ Sezaare.

Currently Selected:

Tõoma 8: gurDBL

Highlight

Copy

Want to have your highlights saved across all your devices? Sign up or sign in

Learn More About Farefare, Ninkaré