Tõoma 13

Ba tõm Abarnabasɩ la Asolɩ tɩ ba sẽŋɛ ka mõolɛ Nawẽnnɛ yetɔga

1Azezi nẽr-kʋʋŋɔ n boe Antɩyɔsɩ la pʋam, Nawẽnnɛ nõtɔ'ɔsrɩba, la karẽnsãandõma n daan boe mĩ. Ba de la Abarnabasɩ, la Asimeyõ tɩ ba wi'iri tɩ nẽr-sabga, la Alusiyusi n ze'ele Sirɛnɩ, la Amanayɛnɩ tɩ ba daan uge ẽ la naba A'erɔdɩ, la Asolɩ. 2La daarɛ ayɩla ba daan lʋ la nõorɛ pʋ'ʋsra dee pẽgra Nawẽnnɛ, tɩ Nawẽnnɛ Sɩa yele ba yetɩ: «Looge-ya Abarnabasɩ la Asolɩ tɩ ba tõm tõon-sɛka tɩ mam looge ba tɩ ba tõm na.» 3Tɩ ba lʋ nõorɛ dɩkɛ nu'usi paglɛ ba zuto pʋ'ʋsɛ, dee basɛ ba tɩ ba sẽŋɛ.

Asolɩ la Abarnabasɩ boe Sipri so'olʋm mõola Nawẽnnɛ yetɔga

4La Nawẽnnɛ Sɩa n tõm ba la, ba sẽŋɛ la Selesi tẽŋam ka kẽ õorŋɔ bilam sẽŋɛ Sipri so'olʋm tɩ ko'om gilge la. 5La ban paagɛ Salamini tẽŋam na, ba daan mõolɩ Nawẽnnɛ yetɔga mɛ Zifdõma wẽndeto pʋam. Ba daan tarɩ la Azã-markɩ tɩ a sõŋra ba.

6La ba daan doose la Sipri so'olʋm la pʋam ka paagɛ Pafɔsɩ. Bilam ba yẽ la tɩɩm dãana n parɩm tɩ ẽŋa de la Nawẽnnɛ nõtɔ'ɔsa. A de la Zifu, a yʋ'ʋrɛ de la Abar-zezi. 7A daan boe la tẽŋa la gɔmna Asɛryusi-polusi n de yɛm dãana la zẽ'am. Tɩ gɔmna la daan botɩ ba wi Abarnabasɩ la Asolɩ, a daan boorɩ tɩ a wõm na Nawẽnnɛ yetɔga. 8La tɩɩm dãana la yʋ'ʋrɛ la Grɛkɩ de la A'elimasɩ. A daan sɩ'ɩsrɩ Asolɩ la Abarnabasɩ yetɔga la mɛ, dee daan ɛɛra tɩ a gu gɔmna la tɩ a da sakɛ Nawẽnnɛ yetɔga la. 9Tɩ Nawẽnnɛ Sɩa bɔna la Asolɩ yʋ'ʋrɛ ayẽma n de Apolɩ la pãŋa, tɩ a bɩsra tɩɩm dãana la zĩi, 10yele ẽ yetɩ: «Fʋ tarɩ la yɛmkẽgsɩga la pã'asgɔ, fʋ de la Asũtãana bia, fʋ de la tõon-sõma wuu bɛ. Fõn dɩkrɩ Zuudãana Nawẽnnɛ sɩra la mɛ tɩ a lɛbgra põmpɔrŋɔ. 11Lɛɛlɛ wã, bãŋɛ tɩ Zuudãana pãŋa wʋn botɩ fʋ fɔ mɛ. Fʋ kãn le yẽ peelem halɩ ka paagɛ wakat-sɛka.» La bilam zẽ'am tɩ tɩɩm dãana la kɔ'ɔn fɔ, ba'abra ɛɛra nẽra tɩ a ve'ege ẽ. 12La gɔmna la n yẽ lan ẽŋɛ se'em na, a bɔ yetɔga la sɩra mɛ, se'ere n soe la, Zuudãana zãsŋɔ la daan kẽ a sũure mɛ.

Apolɩ la Abarnabasɩ boe Antɩyɔsɩ n boe Pisidi so'olʋm

13Apolɩ la a taaba la ze'ele la Pafɔsɩ kẽ õorŋɔ sẽŋɛ Pɛrzɩ n boe Pãnfili so'olʋm pʋam na. Tɩ Azã-markɩ basɛ ba bilam dee lebe Zerizalɛm. 14Tɩ ba daan ze'ele Pɛrzɩ sẽŋɛ Antɩyɔsɩ n boe Pisidi so'olʋm pʋam na. Tɩ Zifdõma vo'osgo daarɛ paagɛ, tɩ ba kẽ ba wẽndeem zĩ'ire. 15La ban karẽŋɛ Nawẽnnɛ lɔɔ, la Nawẽnnɛ nõtɔ'ɔsrɩba gõnnɔ kɩ'ɩlɩm na, tɩ wẽndeego la nẽŋadõma tõm nẽrba tɩ ba sẽŋɛ ka yele ba yetɩ: «Tɩ sɔbiisi, ya sãn tara yetɔga n wʋn bɔ nẽrba la bʋraanɛ, ya tɔgɛ.»

16Tɩ Apolɩ isge yɩbsɛ la nu'ugo yele ba yetɩ: «Ɩsrayɛlɩ nẽrba, la yãma sɛba n po nanna Nawẽnnɛ, selse-ya. 17Nawẽnnɛ tɩ Ɩsrayɛlɩ dõma pʋ'ʋsrɩ wã, ẽŋa n yʋʋn looge tɩ yaabdõma, ban yʋʋn boe Ezipti na, ẽŋa n botɩ ba yɩrgɛ zo'oge. La ẽŋa n yʋʋn tõm pãŋa tõoma tarɩ ba yese Ezipti. 18La ban boe weem yʋʋma pinaasɩ la, a ẽŋɛ sũ-mã'asʋm la ba mɛ. 19Dee yʋʋn sã'am buuri bayopɔɩ Kanaan so'olʋm pʋam, dee bɔ ba tẽŋa la tɩ ba sɔna. 20Bɛla wuu yuuge masɛ wʋ yʋʋma kɔbsnaasɩ la pinuu.

La bɛla poorʋm a bɔ ba la nẽŋadõma, tɩ ba sɔna ba wa paagɛ Nawẽnnɛ nõtɔ'ɔsa Asãmwɛlɩ wakatʋm. 21Tɩ ba yãŋa sose yetɩ, bãma boorɩ la naba. Tɩ Nawẽnnɛ bɔ ba Akisi dayʋa Asayuli n de Abẽnzamẽ buuri nẽra, tɩ a di na'am yʋʋma pinaasɩ. 22Tɩ Nawẽnnɛ yʋʋn to'oge Asayuli na'am na, dee botɩ Adavidi dɛna naba. Nawẽnnɛ yʋʋn tɔgɛ Adavidi yelle yetɩ: ‹Mam yẽ la Azese bia Adavidi n ãn mam sũure yẽlʋm. Ẽŋa n wʋn ẽŋɛ mam n boorɩ se'em na wuu.› 23La de la ẽŋa buuri nẽra ayɩla n de Azezi tɩ Nawẽnnɛ botɩ a dɛna Fãagra bɔ Ɩsrayɛlɩ dõma, wʋ ẽn yʋʋn bĩŋe a nõorɛ se'em na. 24Ẽŋa n daan nãn ka wa'am na, Azã n daan mõolɩ a wa'aŋɔ yelle bɔ Ɩsrayɛlɩ nẽrba wuu yetɩ, ba teege yɛm basɛ tõon-be'ero tɩ ba mise ba ko'om pʋam. 25La Azã n daan boe mĩ tɩ a tõm a tõoma ba'asɛ la, a soke ba yetɩ: ‹Yãma tẽ'esɛ tɩ mam de la ãne? Yãma n tẽ'esɛ tɩ mam de nẽr-sɛka la, mam dagɩ ẽŋa. La selse-ya, ẽŋa boe la mam poorʋm sẽna, mam ka masɛ tɩ m pirge a tagra.›

26M sɔbiisi, yãma n de Abraham yɩɩsɩ, la yãma sɛba n po nanna Nawẽnnɛ, la de la tõma ĩyã tɩ Nawẽnnɛ tõm fãarɛ kõa wã. 27La Zerizalɛm nẽrba, la ba nẽŋadõma daan ka bãŋɛ Azezi n de nẽr-sɛka. La ba ka bãŋɛ Nawẽnnɛ nõtɔ'ɔsrɩba yetɔga la tɩ ba karẽŋrɩ vo'osgo daarɛ wuu la võorɛ. La ban di Azezi sarɩya la, nõtɔ'ɔsrɩba la n yʋʋn yele se'em na ẽŋɛ mɛ. 28Baa ban ka yẽ bõn-sɛka n wʋn botɩ ba kʋ ẽ na, ba sĩm mɛ dee yele Apilatɩ yetɩ, a basɛ tɩ ba kʋ ẽ. 29La ban daan ẽŋɛ sɛla wuu wʋ lan põn gʋlsɛ a yelle se'em ba'asɛ la, ba sike ẽ dɔ-puurŋa la zuo mɛ laagɛ. 30Tɩ Nawẽnnɛ daan botɩ a vo'oge. 31La a dɩkɛ a mẽŋa mɛ pa'alɛ sɛba n daan doose ẽ Galile sẽŋɛ Zerizalɛm na dabsa faa, bãma n de a kaset-dõma Ɩsrayɛlɩ nẽrba la tẽŋasʋka.

32La tõma mõolɩ la kõ-yẽlga la bɔ yãma: Nawẽnnɛ n yʋʋn bĩŋe a nõorɛ la tɩ yaabdõma la, 33a ẽŋɛ bõn-ẽŋa bɔ la tõma n de ba yɩɩsɩ la. La de la a vo'oge Azezi mɛ. La ãn wʋ lan gʋlsɛ yõoma gõŋɔ yõoma bʋyi dãana la pʋam yetɩ:

‹Fʋ de la mam bia.

Zĩna mam n lebge fʋ sɔ.›

34Nawẽnnɛ yʋʋn yetɩ, ẽŋa wʋn vo'oge ẽ tɩ a kãn põ'ogɛ. Bɛla tɩ a yʋʋn yetɩ:

‹Mam wʋn bɔ ya bõn-sõma sɩra sɩra tɩ mam põn bĩŋe nõorɛ la Adavidi la.›

35Bɛla ĩyã tɩ la yele yõoma gõŋɔ pʋam zẽ'a ayẽma yetɩ:

‹Fʋ kãn basɛ fʋ pʋpeelem dãana tɩ a põ'ogɛ.›

36Wakat-sɛka tɩ Adavidi yʋʋn vɔa la, a tõm Nawẽnnɛ yɛm n boorɩ se'em mɛ, dee ki tɩ ba laagɛ ẽ a yaabdõma yɔɔm, tɩ a ĩyã põ'ogɛ. 37La Nawẽnnɛ n vo'oge sɛka la ka põ'ogɛ. 38Bɛla, m sɔbiisi, yãma masɛ tɩ ya bãŋɛ tɩ la de la Azezi ĩyã tɩ tõma mõolɛ pa'alɛ yãma tɩ Nawẽnnɛ wʋn basɛ tõon-be'ero taalɛ. Se'ere n soe la, Amoyisi lɔɔ yʋʋn ka tã wʋn basɛ tɩ ya yelle masɛ Nawẽnnɛ zẽ'am, 39la nẽr-sɛka woo n bɔ Azezi sɩra, a yelle masɛ Nawẽnnɛ zẽ'am mɛ. 40Bɛla, guuse-ya tɩ lan gʋlsɛ se'em Nawẽnnɛ nõtɔ'ɔsrɩba gõnnɔ pʋam na da paagɛ ya. 41La yetɩ:

‹Bãŋɛ-ya tɩ yãma sɛba n de sɩ'ɩsrɩba la,

ya palẽŋa wʋn ẽkɛ mɛ tɩ ya ki.

Se'ere n soe la,

tõon-sɛka tɩ mam wʋn tõm ya zamãana wã pʋam na,

ya kãn nan tɩ la wʋn sɩrɩ ẽŋɛ,

baa nẽra sãn tɔgɛ pa'alɛ ya.› »

42La Apolɩ la Abarnabasɩ n daan isge tɩ ba yese la, tɩ nẽrba la sose ba yetɩ, ba le wa'am vo'osgo daarɛ wa tɔgɛ yetɔg-sɛba tɩ ba tɔgɛ la. 43La ban yese tɩ ba fõrgɛ la, tɩ Zifdõma zozo'e, la nẽrba basɛba n dagɩ Zifdõma dee sakɛ dɔla Nawẽnnɛ lɔɔ tɩ a bɔ Zifdõma, daan dɔla Apolɩ la Abarnabasɩ. Tɩ Apolɩ dõma pa'alɛ ba yetɩ, ba mõrgɛ bɔna Nawẽnnɛ yel-sõnnɛ na pʋam.

44Tɩ vo'osgo daarɛ le paagɛ, tɩ nẽrba lagsɛ zozo'e wʋ la de la tẽŋa la nẽrba wuu la, tɩ ba selse Nawẽnnɛ yetɔga. 45La Zifdõma n yẽ nẽr-kʋʋŋɔ la n zo'oge la, tɩ ba ẽŋɛ sũure sɩ'ɩsɛ Apolɩ n tɔgɛ se'em na, dee tɔgra tɔg-be'ero. 46Tɩ Apolɩ la Abarnabasɩ daan kãbɛ sũure tɔgɛ ba yetɩ: «Tõma wʋn dẽŋɛ nɩ tɔgɛ Nawẽnnɛ yetɔga wã bɔ la yãma. La yãma n zagsɛ la, yãma pa'alɛ tɩ ya ka masɛ tɩ ya yẽ vɔm n ka ba'asrɩ. Bɛla ĩyã tõma wʋn basɛ yãma, dee sẽŋɛ la bu-zãŋsɩ zẽ'am. 47Se'ere n soe la, Zuudãana Nawẽnnɛ bɔ tõma nõorɛ yetɩ:

‹Mam looge fo tɩ fʋ ãna wʋ peelem bɔ bu-zãŋsɩ,

botɩ nẽrba yẽ fãarɛ dũnia zẽ'esɩ wuu.› »

48La bu-zãŋsɩ la n wõm bɛla la, ba sũure ẽŋɛ yẽlʋm mɛ halɩ, tɩ ba pẽgra Nawẽnnɛ yetɔga la. La nẽr-sɛba n masɛ tɩ ba yẽ vɔm n ka ba'asrɩ la daan sakɛ bɔ Azezi sɩra mɛ.

49Tɩ Zuudãana yetɔga la saagɛ tẽŋa la wuu. 50Tɩ Zifdõma daan sa'asɛ pɔgsɩ n pʋ'ʋsrɩ Nawẽnnɛ, dee dɛna yʋ'ʋrɛ dõma, la tẽŋa la nẽrzuto, botɩ ba nãmsɛ Apolɩ la Abarnabasɩ dige ba ba tẽŋa la pʋam tɩ ba yese. 51Tɩ Apolɩ la Abarnabasɩ pɩɩsɛ ba nãma tẽntõnnɔ basɛ, pa'alɛ tɩ tẽŋa la nẽrba ka ẽŋɛ sõŋa, dee wɛ'ɛsa Ikonim. 52La Azezi karẽnbiisi la n boe Antɩyɔsɩ la daan tarɩ sũ-yẽlga zo'oge mɛ, dee tɩ Nawẽnnɛ Sɩa bɔna la ba.

Currently Selected:

Tõoma 13: gurDBL

Highlight

Copy

Want to have your highlights saved across all your devices? Sign up or sign in

Learn More About Farefare, Ninkaré