Tito Is Mehitenged te Surat he Para ki Tito
Is Mehitenged te Surat he Para ki Tito
Is menge etew ziyà te Krita kenà memetau he ebmansu te keugelingen dan. Is menge etew he ed-ubpà dutun he pulu, utew menge teruen wey menge peg̵ulen. Duen duma kandan he neketuu ki Jesu Kristu piru duwazuwa is kebpenilbi zan te Megbevayà. Ne wazà heeyan mekeeles ki Pablo umba midsug̵ù din is egkeserig̵an he ebpekepengulu kandan he iyan si Tito su wey zin metevangi is menge tumutuu zutun su wey zan mekepenilbi te Megbevayà te paag̵i he ebpekepenunuat te Megbevayà.
Is egkehuna he ebeelan ni Tito zutun, ne iyan is kebpilì te menge etew he egkehimu he idsarig kandan is kebpengulu te zuma zan he menge tumutuu. Ne haazà sikandan kinahanglan he zait he edtehuzen wey kinahanglan daan he wazà egkesudii kandan.
Duen menge etew zutun te Krita he ebpemevayàbayà te mezaat he suat dan, kenè dan ebpemineg te tutuu he penurù su egkesuat sikandan he ebpekidibati. Ne midsug̵ù ni Pablo si Tito he penurua zin haazà he menge etew he medtuu zan wey ipesungkad dan is kineiya zan te Lalag te Megbevayà. Kayi he surat, duen menge sug̵ù diyà te menge tumutuu he impemesungkad: duen menge sug̵ù he sungkad te meg̵urang en he menge maama, sungkad te edliwezeenan en he menge vahi, sungkad te menguhed pa he menge maama wey menge vahi wey menge sug̵ù he sungkad te uripen.
Kayi he surat ibpekeg̵iyan ki Tito is menge etew ziyà te Krita te minsan pa te kenà iyan igkelibriya te etew te silut is ked-ulaulaha zin te meupiya su iyan dà is hizu te Megbevayà pinaag̵i te kebpelisa zin te menge salà te etew wey tenged te kebeg̵ayi zin te etew te beg̵u he untung pinaag̵i te Wag̵as he Mulin-ulin. Piru kinahanglan gihapun he ibpehuna zan diyà te g̵ehinawa zan is ked-ulaula te menge meupiya he menge vaal su wey zan mepenunuat is Megbevayà.
Currently Selected:
Tito Is Mehitenged te Surat he Para ki Tito: mbbNT
Highlight
Copy
Compare
Share
Want to have your highlights saved across all your devices? Sign up or sign in
© 2001, Wycliffe Bible Translators, Inc., All rights reserved.