KO SIOPE 37
37
1‘Ā ‘OKU tatū hoku mafu he me‘a, ko ē,
‘O ne teka mei hono potu.
2Mou fanongoa ki he longolongo ‘ita hono le‘o,
Pea mo e muhu ‘oku ‘alu atu mei hono fofonga.
3‘Oku ne tuku atu ki he lalo langi kātoa,
Mo ‘ene ulo ki he ngaahi tapatapa ‘o e fonua.
4‘Oku toupili ‘i mui ‘a e ‘u‘ulu ‘o e mana;
‘Oku ne felasilasi ‘aki ‘a e le‘o ‘o ‘ene fotu:
Pea ‘oku ‘ikai te ne ta‘ofi ‘enau tapa hili ‘a e ongo mai ‘a e mana.
5‘Oku felasilasi ‘a ‘Ela: ‘oku fakaofo hono fu‘u le‘o;
‘Oku ne fai me‘a lalahi ‘oku ‘ikai te tau ma‘ilo.
6He ‘oku ne folofola ki he sinou,
Tō ki he fonua;
Pehē ki he tu‘u mo tō,
Pehē ki he fu‘u lōvai–ko ‘ene tōtōivi ia.
7‘Oku ne sila‘i ai ‘a e nima ‘o e tangata fua pē;
Ke ‘ilo kotoa pē ‘e he tangata me‘a vaivai
‘a e ngāue ‘a ‘Ene ‘Afio.#37.7 ‘Oku ngali tonu ‘a hono hiki ‘o e vēsí ni ‘o: ‘Okú ne ta‘ofi ‘etau ngāue kotoa pē; ‘okú ne fakahaa‘i mai e me‘a ‘okú ne lavá. Ka ‘oku pehē ‘i he faka-Hepeluú: ‘Okú ne ta‘ofi ‘etau ngāue kotoa pē; ‘okú ne fakahaa‘i mai eni ki he fa‘ahinga kuó ne ngaohí.
8Pau ai ke hū ‘a e fanga manu ki honau toitoi‘anga,
Pea ke ne tatali ‘i hono nofo‘anga.
9‘Oku ha‘u ‘a e ‘ahiohio mei he Loki:
Mo e momoko mei he ngaahi pupunga ‘o e Noate,#37.9 ‘Oku fihi e vēsí ni.
10Mei he hō ‘a ‘Ela ‘oku tuku mai ‘a e ‘aisi;
Pea ‘oku fefeka ‘a e vai laulahi.
11‘Oku ne fa‘olaki ki he ‘ao ha tokonaki vai;
‘Oku ne folahi atu ‘ene ‘ao maama,
12Pea ko e me‘a ko ia ‘oku takamilo holo ko ‘ene faka‘uli,
Ke nau fai ‘a e me‘a kotoa kuo ne tu‘utu‘uni kiate kinautolu
‘I he funga ‘o maama nofo‘anga.
13Pe ko ha tā, pe koe‘uhi ko si‘ono fonua,
Pea ko ‘ene ‘ofa–ka ‘oku ne faka‘au ai pē ia.
14Fanongo ki he me‘a ko eni, Siope;
Tu‘u, ‘o fakalaulauloto ki he ngaahi ngāue fakaofo ‘a ‘Ela.
15‘Oku ke ‘ilo koā ‘oka fai tu‘utu‘uni ‘a ‘Ela ki he ngaahi ‘ao ‘a‘ana
Ke tapa mai ‘ene maama?
16‘Oku ke ‘ilo ki he tautau ‘a e ngaahi ‘ao matolu ke tō lotomālie?
‘A e fu‘u ngāue fakaofo ‘a‘ana ‘oku haohaoa ‘i he ngaahi fa‘ahinga poto.
17‘A koe ‘oku māfana ho kofu,
‘Oka tofu ‘a e fonua he‘ene tuku ke angi ‘a e matangi tonga,
18Te ke lava ke kau mo ia ‘i he haha ‘o e langi ke manifi,
Kae mālohi hangē ha sio‘ata ukamea?
19Fakahinohino mai pe ko e hā ha fakatau folofola te mau fai ki He‘ene ‘Afio?
‘Oku ‘ikai te mau lava ke fa‘u ha lea koe‘uhi ko e po‘uli.
20‘E fai koā kiate ia ha fu‘u fakamatala?
“Tokua ‘oku ou fie lea”–
‘E faka‘amu koā ha tangata ke fōngia ia?
21Pea ko eni ‘oku ‘ikai ke lava ke sio ki he la‘ā:
Ka ‘oku ngingila pē ‘i he femamēnite;
Pea ka laka ange ha matangi te ne tafi ia.
22‘I he angi ‘a e tokelau, te ne hoko mai ko e koto koula:
‘Oku ‘ia ‘Ela ha lāngilangi fakailifia.
23Ko Sātai ‘oku ta‘emahakulea;
Ko e fungani ‘i he ivi mo e fai fakakonisitūtone.
Pea ‘i he lahi ‘o ‘ene faitotonu ‘oku ‘ikai te ne fai fakamālohi.
24Ko ia ‘oku ‘apasia kiate ia ‘a tangata me‘a vaivai:
‘Oku ‘ikai te ne toka‘i ‘a e ‘atamai poto fua pē.
Currently Selected:
KO SIOPE 37: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
