KO SIOPE 36
36
1PEA toe fai ‘e ‘Ilaiū, ‘o ne pehē,
2Kātaki si‘i, ka u fakamatala atu;
He ‘oku kei toe ‘a e ngaahi lea ke fai ma‘a ‘Elohā.
3Te u ‘omi ‘eku ‘ilo mei he mama‘o,
Pea te u tuku kiate Ia na‘e ngaohi au ‘a hono totonu.
4Ko au ‘ē ‘oku ‘ikai loi ‘eku lea:
Ko ia ‘oku fai mo koe ‘oku tafesino‘ivai ‘ene ‘ilo.
5Vakai, ko ‘Ela ko e māfimafi,
Ka ‘oku ‘ikai te ne fakasīkaka‘i,
‘Oku ne māfimafi ko e mālohi hono loto.
6‘Oku ‘ikai te ne ta‘ofi ki he mo‘ui ‘a e kau angahala:
Pea ‘oku ne ‘ange ki he tu‘utāmaki ‘a e totonu fakalao.
7‘Oku ‘ikai te ne to‘o hono fofonga mei he vakai‘i ‘o e mā‘oni‘oni:
Ka ‘oku nau nofo mo e ngaahi tu‘i ‘i he taloni;
‘Io, ‘oku ne fokotu‘u kinautolu ‘o ta‘engata,
Pea ‘oku nau hākeaki‘i.
8Pea kapau ‘e ha‘i seini kinautolu,
Pea tou‘ia ‘i he kafa ‘a e tu‘utāmaki;
9‘Oku ne toki fakahā kiate kinautolu ‘enau fai anga,
Mo ‘enau ngaahi angahala, tokua kuo nau futa ‘aki.
10Pea ne tatala honau telinga ki he akonaki,
‘O ne tala ke nau foki mei he kovi.
11Kapau ‘oku nau ongo‘i, ‘o tauhi kiate ia,
Te nau faka‘osi honau taimi ‘i he lelei,
Mo honau ta‘u ‘i he ngaahi mālie.
12Ka ‘o kapau ‘oku ‘ikai te nau ongo‘i,
Te nau mole ‘i he velo,#36.12 Te… velo; pe ‘oku nau ‘oho ki he velo.
‘O nau hokotaki ko e ‘ikai ha‘anau poto.
13Ka ko e angahala ‘i loto ‘oku nau tauhi ‘a e ‘ita:
‘Oku ‘ikai te nau tangi ‘i he‘ene ha‘i kinautolu.
14‘Oku mate honau laumālie kei talavou,
Mo ‘enau mo‘ui hangē ha kau fakasōtoma.
15‘Oku ne ngāue‘aki ‘a e tu‘utāmaki ‘o e tu‘utāmaki ke nau mālohi ai,
Pea ‘oku ne tatala honau telinga ‘aki ‘a e mamahi.
16Tala atu, te ne fie taupoa‘i mo koe foki, mei he ngutu ‘o e faingata‘a,
Ki he ‘ata‘atā, ki he potu ‘oku ‘ikai hano ‘efihia;
Pea ko e teu ho tēpile ko e koto me‘a ngako.
17Ka ‘oku ne fonu ‘i he talatalaaki ‘oku fai ‘e he kakai kovi:
‘Oku molomolomuiva‘e ‘a e fakamaau ki he talatalaaki.
18He ‘oku ai ‘a e ‘ita:
Vakai na‘a taupoa‘i ai koe ki he ta‘efai ha toka‘i;
Pea ‘oua na‘a hē, ko ho‘o sio ki he lahi ‘o e fakamolemole‘anga.
19‘E lava koā ‘e ho‘o tangi#36.19 ‘Oku fihi ‘aupito. ‘Oku hiki ‘e he ni‘ihi: ‘e ho‘o koloá. ‘Oku pehē mo hono hiki ‘a e lea sino ‘i he veesi ‘oku hokó. ke fokotu‘u koe ki he ta‘eha mamahi?
Mo e ngaahi fu‘u feinga hoha‘a ‘o ho sino?
20‘Oua te ke fakavave‘i ‘a e pō ko ē,
‘A ia ‘e hiki ai ‘ani kakai mei he potu ‘oku nau ‘i ai.
21Tokanga: ‘oua te ke hinga ki he kovi:
He kuo ke fili mu‘a ki he me‘a ko ena ‘i he kātaki mamahi.
22Tala atu, ko ‘Ela ‘oku hākeaki‘i he fai‘aki hono ivi:
Ko hai ha faiako hangē ko ia?
23Ko hai kuo ne tu‘utu‘uni ki He‘ene ‘Afio ha hala ke ne fou ai?
Pea ko hai ‘e lava ke pehē kiate ia,
Kuo ke faihala!
24Manatu ke fakahīkihiki‘i ‘ene ngāue;
He ko e me‘a ia ‘oku hiva‘aki ‘e he kakai.
25‘Oku fie fakasio ki ai ‘e he tangata fua pē;
Neongo ko e me‘a vaivai, ka ‘oku ne hanga ki ai mei he mama‘o.#36.25 ka ‘oku ne hanga ki ai mei he mama‘o; pe ka ‘oku ‘ikai ke momo‘i mahino ia ki ha taha.
26Vakai, ko ‘Ela ‘oku hopo hake,
‘Oku ‘ikai te tau ma‘ilo ia:
Ko e lau ‘o hono ngaahi ta‘u ko e me‘a ta‘emahakulea.
27‘Oku ne misi hake ‘a e ngaahi tulutā vai,
‘Oku nau kakava mai ko e ‘uha,
‘O hoko ko hono fu‘u mao:
28‘A ia ‘oku fakatoo‘i ‘e he ngaahi ‘ao;
‘Oku nau fakatafe ki ha fu‘ufu‘unga kakai.
29‘Ā, hono mahino ki ha taha ‘a e folahi ‘a e ‘ao?
‘A e felasilasi hono Tāpanekale?
30Vakai ‘ene folahi ki ai ‘ene maama,
Mo ‘ene ‘ufi‘ufi ‘aki ‘a e huli‘i tahi na!#36.30 ‘Oku toe hiki: kilisi tahi.
31Seuke, ko e ngaahi me‘a ko ia ‘oku ne tautea#36.31 tautea; Ko hono faka-Hepeluú ia, ka ‘oku ngali tonu hono hiki ‘o: fafanga. ‘aki ‘ani kakai;
‘Oku ne foaki me‘akai ai ke lahi.
32‘Oku ne takai ‘a e maama fakanimaua
‘O ne faka‘atā atu hangē ha taha ‘oku fana ke tou‘ia.
33‘Oku tala ‘e hono longoa‘a ‘a e me‘a ni
‘Oku ai ha houhau kakaha ki he kovi.#36.33 ‘Oku ai… kovi; pe Na‘a mo e fanga manu ‘oku nau fakamelomelo ‘ene hā‘ele mai.
Currently Selected:
KO SIOPE 36: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
