KO HOSEA 4
4
Ko Hono Talatalaaki‘i ‘e Sihova ‘a ‘isileli
1HA‘A ‘Isileli, fanongo ki he folofola ‘a Sihova: tala atu ‘oku ai ‘a e hopo ‘a Sihova mo e nofo he fonua ni, he ‘oku ‘ikai ha mo‘oni, pea ‘oku ‘ikai ha meesi, pea ‘oku ‘ikai ha ‘ilo ‘o e ‘Otua ‘i he fonua ni. 2Ko e takuanoa pē ‘a e Huafa, mo e loi, mo e fakapō, mo e kaiha‘a, mo e tono ‘unoho; ‘oku nau pā atu, pea ‘oku felave ‘a e fakapō mo e fakapō. 3Ko ia ‘oku tangilāulau ‘a e fonua, pea ‘oku ngaluvai ‘a e me‘a kotoa pē ‘oku nofo ai, ‘a e manu ‘o e vao, mo e manupuna ‘o e ‘atā; pea na‘a mo e ika ‘i he tahi ‘oku nau mole.
Ko Hano Talatalaaki‘i ‘e Sihova ‘a e kau Taula‘eikí
4Ka neongo ia, kae ‘oua ‘e fai ‘e ha taha ha fakapoto, pea ‘oua ‘e fai ‘e ha taha ha valoki; he ko ho kakai ‘oku hangē ko e kau tu‘u ki he taula‘eiki.#4.4 he ko… taula‘eiki: ‘Oku ngali tonu hono hiki ‘o: ‘oku hangē homou kakaí ko kinautolu ‘oku nau lāunga‘i ‘a e kau taula‘eikí. 5Ko ia, te ke humu ‘aho; pea ‘e humu foki mo koe ‘a e palōfita, po‘uli; pea te u faka‘auha ho‘o fa‘ē. 6‘Oku faka‘auha hoku kakai ko e masiva poto; he ko koe kuo ke fakatale‘i ‘a e poto, ko ia te u fakatale‘i koe mei ho‘o taula‘eiki kiate au: pea kuo ke fakangalongalo‘i ‘a e lao ‘a ho ‘Otua; te u fakangalongalo‘i ‘e au foki ho‘o fānau.
7Ko ‘enau faka‘a‘au leva ke lahi, pea pehē mo ‘enau hia: ko honau lāngilangi te u liliu ko e mā. 8‘Oku nau me‘akai ‘aki ‘a e angahala ‘a hoku kakai, pea ‘oku holi ‘a e loto takitaha ke ai ha‘anau faikovi. 9Ko ia ‘e hoko tatau pē ki he taula‘eiki mo e kakai; pea te u ‘eke kiate ia hono ngaahi ‘alunga, pea te u fakafoki kiate ia ‘ene ngaahi fai anga. 10Pea te nau kai, kae ‘ikai mākona; te nau fe‘auaki, kae ‘ikai te nau mafola: he kuo nau tuku ‘a e tokanga kia Sihova.
Ko hano Fakata‘e‘aonga‘i ‘e Sihova ‘a e Lotu Fakahītení
11Ko e fai fe‘auaki, mo e inu uaine, kae‘uma‘ā ‘a e uaine fo‘ou, ‘oku mole ai ‘a e loto. 12‘Oku huhū hoku kakai ki he‘enau potu‘i ‘akau, pea ‘oku tala me‘a ki ai honau va‘akau: he kuo fakahee‘i kinautolu ‘e he laumālie anga fe‘auaki, pea kuo nau fai kovi mei he fatafata ‘o honau ‘Otua. 13‘Oku nau feilaulau mei he ngaahi tumutumu‘i mo‘unga, pea ‘oku nau tutu ‘inisēnisi ‘i he ngaahi fo‘i mā‘olunga, ‘i he lalo ‘oke‘oke, mo e popilā, mo e ‘oke; he ‘oku sai tokua honau malumalu: ko ia ‘oku fai fe‘auaki ai ho‘omou fānau fefine, pea ‘oku tonoa ai ‘a e ngaahi uaifi ‘o ho‘omou fānau tangata.
14‘E ‘ikai te u ‘eke ki ho‘omou fānau fefine ‘enau fe‘auaki, pe ki he ngaahi uaifi ‘o ho‘omou fānau tangata ‘enau tonoa; he na‘a mo e fa‘ahinga ko ē ‘oku nau afe mo e pa‘umutu,#4.14 pa‘umutu; Na‘e nofo ‘a e kau fefiné ni ‘i he ngaahi temipale Kēnani, ‘a ia na‘e fai ai e lotu ki he ngaahi ‘otua na‘e pule tokua ki he fanafanaú mo e mahu ‘a e kelekelé. Na‘e tui ‘a e kakaí ko e nonofo mo e kakai fefine ko iá ‘e fanafanau ai ‘enau monumanú mo foha ‘enau ngoué. pea ‘oku nau ō mo e kau fefine tapu ki he feilaulau#4.14 pe feilaulau angahala. –‘a! ko e kakai ‘oku ‘ikai ‘ilo ‘a e taau kuo pau ke mafuli.
15Ka neongo ho‘o fai fe‘auaki, ‘a koe ‘Isileli, kae ‘oua ‘e faihala ‘e Siuta: pea ‘oua te mou omi ki Kilikali, pea ‘oua te mou ‘alu hake ki Pete-‘āveni,#4.15 Pete-‘āveni; Ko e ‘uhinga ‘o e hingoá ni ko e “fale ‘o e kovi” pe “fale ‘o e lotu ‘aitoli”, pea ‘oku sio ia ‘i he kupu ko ení ki he kolo ko Pēteli, ‘a ia ko hono ‘uhingá ko e “fale ‘o e ‘Otuá.” Vakai ai pē ki he 5.8; 10.5 and 10.8. pea ‘oua te mou fuakava, “Tangi ‘a e mo‘ui ‘a Sihova.” 16He kuo hoko ‘a ‘Isileli ‘o pau‘u, ‘o hangē ha pulu pau‘u: ko e taimi ni ‘e fafanga kinautolu ‘e Sihova hangē ha lami ‘i ha potu fu‘u ‘atā. 17Kuo pīkitai ‘a ‘Ifalemi ki he ngaahi ‘aitoli; tuku ai pē ā. 18Ko honau uaine lelei kuo kovi; ‘oku nau fe‘auaki fie fe‘auaki: ko si‘i ngaahi pā ‘o e pule‘anga ‘oku nau mātu‘aki ‘ofa ki he mā. 19Kuo kofu ‘aki ia ‘e he matangi ‘i hono kapakau; pea ‘e fakamaa‘i kinautolu koe‘uhi ko ‘enau ngaahi feilaulau.#4.19 ngaahi feilaulau; ‘Oku ‘ikai ke mahino ‘a hono faka-Hepelū ‘o e veesi 17-19. ‘Oku pehē ‘i hono ngaahi hiki fuoloa ‘e ni‘ihi: ngaahi ‘ōlita.
Currently Selected:
KO HOSEA 4: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
