KO 2 SĀMIUELA 23
23
Ko e Tala Tuku ‘a Tēvita
1PEA ko eni ‘a e lea tuku ‘a Tēvita:
Ngonengone ‘a e foha ‘o Sese ko Tēvita,
Ngonengone ‘a e tangata ne hiki ki ‘olunga,
Ko e pani ‘a e ‘Otua ‘o Sēkope,
Mo e mālie ‘i ‘Isileli ‘i he fai Saame.
2Laumālie ‘o Sihova ne folofola ‘i hoku loto,
Pea ko ‘ene fakapū ki tu‘a na‘e ‘i hoku ‘elelo.
3Na‘e pehē ‘a e ‘Otua ‘o ‘Isileli,
Ko Makatu‘u ‘o ‘Isileli ne folofola mai:
Ko ha pule ki ha tangata–ko ha faitotonu ena,
Ko ha pule ‘apasia ki he ‘Otua.
4Hangē leva ‘a e maama ‘o e pongipongi he ‘alu hake ‘a e la‘ā,
Ha pongipongi ta‘e‘ao‘aofia,
‘Atētea hili ‘a e ‘uha,
Fisiki ai ‘a e mohuku he fonua.
5He ‘ikai ‘oku pehē ‘a e tu‘u hoku fale ki he ‘Otua?
He kuo ne fai mo au ha fuakava ta‘engata,
Kuo ma‘u ‘i he me‘a kotoa, mo ma‘uma‘uluta:
He ko hoku fakamo‘ui kotoa mo e kotoa ‘o e ‘ofa–
He ‘ikai te ne fakamuka?#23.5 He ko hoku… fakamuka; ‘Oku hiki ‘e he ni‘ihi: He ko hoku fakamo‘ui ia, neongo ‘oku ‘ikai te ne fakamuka.
6Ka ko e faka-Pileali ‘oku hangē kotoa ko e talatala ‘oku fai ke teke,
He tala‘ehai ko e nima ‘oku puke ‘aki:
7Ka ko e tangata ‘oku ala ki ai,
Ke ne teu mu‘a ‘aki ‘a e ‘aione mo e ‘esia ‘o e tao lahi;
Pea ‘e mātu‘aki tutu ‘i he potu ‘oku ‘i ai.#23.7 ‘Oku ‘ikai ke mahino ‘a e faka-Hepelū ‘o e veesi 6-7.
8Ko e ngaahi hingoa eni ‘o e kau helo na‘e ‘ia Tēvita: ko ‘Iasopeami ko e hako ‘o Hakamoni ko e ‘ulu ia ‘o e ngaahi kapiteni.#23.8 ‘Oku maveuveu kotoa ‘a e ngaahi vēsí ni. Ko hono faka-Hepelū totonu ‘o e ko e ‘ulu ia ‘o e ngaahi kapitení ‘oku ngali tonu angé ko e ko e taki ia ‘o e vahe tolú, ka ‘oku pehē ‘i he hiki fuoloa ‘e taha: ko e taki ia ‘o Toko Tolú. Na‘a ne ‘ohofi ‘aki hono tao#23.8 Na‘á ne… tao: ‘Oku ‘ikai ke mahino ‘a hono faka-Hepeluú, ka ‘oku ngali tonu pē ‘a hono hiki ko iá (vakai kia 1 Kal 11.11). ha toko valungeau ‘o tāmate‘i kotoa.
9Pea hoko mo ia ‘a ‘Eliesa foha ‘o Tōtai, ko e hako‘i ‘Ahoa‘a, ko e taha ‘i he Tolu‘i Helo na‘e ‘ia Tēvita, he‘enau luki ki he kau Filisitia kuo fakatefua ki ai ke tau, pea kuo ‘alu hake ‘a e kau ‘Isileli; 10tu‘u ia ‘o ne taa‘i ‘a e kau Filisitia kae‘oua ke mamate hono nima, ‘o pipiki ki he heletā: pea fai ‘e Sihova ha fakamo‘ui lahi ‘i he ‘aho ko ia; pea foki ‘a e kakai, ‘o muimui kiate ia ke vete pē.
11Pea hoko mo ia ‘a Sama foha ‘o ‘Ake ko e ha‘a Hālali. Pea kuo fakatefua mai ‘a e kau Filisitia ke pāpani, pea na‘e ai ha konga vao na‘e ‘akau ‘aki ‘a e letili; pea na‘e feholaki ‘a e kakai mei he ‘ao ‘o e kau Filisitia. 12Ka ka fakama‘u hifo ‘e ia ‘i he loto kongavao, ‘o ne fakahaofi ia, ‘o te‘ia ‘a e kau Filisitia: pea na‘e fai ‘e Sihova ha fakamo‘ui lahi.
13Pea ‘alu hifo ha toko tolu ‘i he Tolungofulu‘i Kapiteni, ‘o nau a‘u kia Tēvita ki he ‘ana ‘Atulami fe‘unga mo e ututa‘u;#23.13 fe‘unga mo e ututa‘ú; ‘Oku ‘ikai ke mahino ‘a hono faka-Hepeluú, ka ko ko hono ‘uhingá nai ko e ofi he kamata‘anga ‘o e ututa‘ú. pea ‘oku ‘apitanga ‘a e pāpani Filisitia ‘i he lautoka ‘o Lefaimi. 14Pea ko e taimi ko ia na‘e ‘i he talitau‘anga ‘a Tēvita, pea ko e le‘o ‘a e kau Filisitia na‘e ‘i Pētelihema. 15Pea holi ‘a Tēvita, ‘o ne pehē, Taumaiā ke ‘omi haku inu mei he vaikeli ‘o Pētelihema, ‘a ia ‘i he matanikolo! 16Pea fakapuke ‘e he Tolu‘i Helo ki he tau Filisitia, ‘o nau touvai mei he vaikeli ‘i Pētelihema, ‘a ia ‘i he matanikolo, ‘o nau fetuku ‘o ‘ave kia Tēvita: ka ka ‘ikai loto ia ke inu, ka ne hua‘i pē kia Sihova. 17‘O ne pehē, Molekemama‘o, ‘Eiki, ha‘aku fai pehē: ka u inu koā ‘a e toto ‘o e kakai na‘e ‘alu ‘aki ‘enau mo‘ui? Ko ia na‘e ‘ikai te ne loto ke inu ia. Ko e me‘a ia na‘e fai ‘e he Tolu‘i Helo.
18Pea ko ‘Apisai, ko e tokoua ‘o Sioape, ko e tama ‘a Seluvaia, ko e ‘ulu ia ‘o e Toko Tolu. Pea ‘ohofia ‘e ia ‘aki hono tao ha toko tolungeau, mo tāmate‘i, pea na‘e tu‘u hono hingoa ‘i he Toko Tolu.#23.18 Toko Tolu; Ko hono faka-Hepeluú ia, ka ‘oku pehē ‘i he hiki fuoloa ‘e taha: Toko Tolungofulu. 19‘Ikai na‘e ongoongoa taha ia ‘i he Toko Tolu?#23.19 Toko Tolu; Ko hono faka-Hepeluú ia, ka ‘oku pehē ‘i he hiki fuoloa ‘e taha: Toko Tolungofulu. ko ia na‘a ne hoko ko honau kapiteni: ka na‘e ‘ikai te ne a‘u ki he Toko Tolu ko ē.
20Pea ko Penaia foki foha ‘o Sihoiata, ko e hako ‘o ha tangata to‘a ‘o Kapesili, kuo fai me‘a lalahi–na‘e taa‘i ‘e ia ha ongo loto fakalaione ‘o Moape: kae‘uma‘ā na‘a ne ‘alu hifo, ‘o taa‘i ha laione ‘i he lepa ‘i ha ‘aho na‘e sinou. 21Ko ia foki na‘a ne taa‘i ‘a e motu‘a ‘Isipite, ‘a ia ko e tangata faka‘ofo‘ofa; pea na‘e to‘o ‘e he ‘Isipite ha fu‘u tao; ka ka ‘alu hifo ia ki ai ‘aki ha tokotoko pē, ‘o ne heu‘i ‘a e tao mei he nima ‘o e ‘Isipite, ‘o ne tāmate‘i ia ‘aki hono tao ‘o‘ona. 22Ko e ngaahi me‘a ia na‘e fai ‘e Penaia foha ‘o Sihoiata, pea na‘e tu‘u hono hingoa ‘i he Tolu‘i Helo. 23Na‘a ne ongoongoa ange ‘i he kau Tolungofulu, ka na‘e ‘ikai te ne a‘u ki he Tolu ko ē. Pea na‘e fakakau ia ‘e Tēvita ki he‘ene fakataha tokoni.
24Ko ‘Asaeli ko e tokoua ‘o Sioape; ko e taha ia ‘i he kau Tolungofulu, ko ‘Elanani foha ‘o Toto ko e Pētelihema; 25ko Sama ko e Hāloti, ko ‘Ēlika ko e Hāloti; 26ko Hēlesi ko e Pāleti, ko ‘Ila foha ‘o ‘Īkesi ko e Tekoa; 27ko ‘Apiesa ko e ‘Anatoti, ko Mepunai ko e Husa; 28ko Salamona ko e ‘Ahoa‘a, ko Mahalai ko e Nētofa; 29ko Hēlepi foha ‘o Pā‘ana ko e Nētofa, ko ‘Ītai foha ‘o Lipai mei Kipea-ha‘a-Penisimani; 30ko Penaia ko e Pilatoni, ko Hītai mei he ngaahi tele‘a ‘o Kaasi; 31ko ‘Apialiponi ko e ‘Alapā, ko ‘Asimaueta ko e Palahumi; 32ko ‘Elihapa ko e Sa‘aliponi, ko e hako ‘o ‘Iaseni, ko Sionatane;#23.32 ‘Oku maveuveu ‘a e tohi ‘i he potu ni. 33ko Sama ko e Hālali, ko ‘Ahiami foha ‘o Sālali ko e ‘Ālali; 34ko ‘Elifeleti foha ‘o ‘Āhasipai, ko e hako‘i Maaka; ko ‘Eliami foha ‘o e Kilo ko ‘Ehitofeli; 35ko Hēselo ko e Kāmeli, ko Pa‘alai ko e ‘Ālapi; 36ko ‘Īkali foha ‘o Nētane mei Sopa, ko Pani ko e Kata; 37ko Sēleke ko e ‘Āmoni, ko Nahalai ko e Piheloti, ko e fua mahafu ‘a Sioape 38Ko e tama ‘a Seluvaia; ko ‘Ila ko e Sēteli, ko Kālepi ko e Sēteli; 39ko ‘Ūlaia ko e Heti: kātokatoa ko e toko tolungofulu mā toko fitu.
Currently Selected:
KO 2 SĀMIUELA 23: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
