KO 2 SĀMIUELA 22
22
Ko e Hiva Ma‘alali ‘a Tēvita
(Saame 18)
1PEA fai ‘e Tēvita ki he ‘Eiki ‘a e ngaahi lea ‘o e ta‘anga ni, ‘i he ‘aho na‘e fakahaofi ai ia ‘e Sihova mei he nima ‘o hono fili fua pē, kae‘uma‘ā mei he nima ‘o Saula: pea ne lau ‘o pehē.
2Ko hoku mo‘unga ‘a Sihova, mo e kolo kiate au;
Ko hoku hao‘anga foki–‘io, ‘o‘oku;
3Ko hoku ‘Otua Makatu‘u ia, ‘a ia ‘oku fai ki ai ‘eku falala;
Ko ‘eku pā, mo hoku nifo fakamo‘ui ia,
Ko hoku fu‘u taua mo hoku hola‘anga;
Ko hoku Taukapo;
‘Oku ke taukapo‘i au mei he fakamālohia.
4Ko Fakamālō‘ia–‘oku fai ki ai ‘eku tautapa–‘a e ‘Eiki:
Ko ia ‘oku fakahaofi au mei hoku ngaahi fili.
5He na‘e ha‘o au ‘e he ngaahi ngalu ‘o Mate,
Ko e ngaahi vaifā ‘o e pau‘u na‘e fakatupu ‘eku manavahē.
6Na‘e takai au ‘e he ngaahi kafa ‘a Hētesi:
Ko e ngaahi tauhele ‘a Mate na‘e fakafetaulaki mai.
7‘I he fa‘aki mai ‘a e faingata‘a na‘a ku tautapa kia Sihova,
‘Io na‘a ku tautapa ki hoku ‘Otua:
Pea ne ongo‘i hoku le‘o mei hono temipale na,
‘Io, na‘e a‘u ‘eku kalanga ki hono fofonga.
8Ngaue ai leva mo ngalulu ‘a e fonua,
Pea ngatōtō ‘a e ngaahi tefito ‘o e langi na:
‘Io, na‘e ngaueue, he kuo ne ‘ita.
9Na‘e ‘alu hake ha kohu mei hono ihu,
Pea keina atu ‘e ha afi mei hono ngutu:
Kae tutu ‘aki ‘ani maka ‘afu.
10Na‘a ne ofe‘i ‘a e langi, ‘o ne ha‘anu hifo:
Pea na‘e ‘i hono lalo va‘e ‘a e ‘ao fatu.
11Pea ne heka selupimi,#22.11 selupimi: Vakai ki he “Ngaahi Huluhulu”. ‘o ne puna mai:
‘Io, na‘e hā ia ‘i he kapakau ‘o e matangi.
12Pea ne ngaohi ‘a e fakapo‘uli ko hono tēniti takatakai,
Ko e fokotu‘unga ‘ao, ko e ‘ao matolu#22.12 matolu; ‘Oku ‘ikai mahino hono faka-Hepeluú, ka ‘oku pehē he ngaahi hiki fuoloa ‘e ni‘ihi (pea vakai kia Saame 18.11): fonu vai. ‘o langi.
13‘I he maama na‘e ‘iate ia
Na‘e tutu ha‘ane maka vela.
14Na‘e mana mei langi ‘a Sihova,
Pea ‘ai atu ‘e ‘Elioni ‘ene lea.
15Pea ne ‘ai atu ‘ene ngaahi ngahau, ‘o veteki kinautolu;
‘A e ‘uhila, ‘o nuiki kinautolu.
16Toki hā ‘a e ngaahi kilisitahi,
‘I he fai ‘a e valoki ‘a Sihova,
‘I he māfulu ‘a e manava ‘o hono fofonga.
17Na‘a ne mafao hifo mei ‘olunga, na‘a ne puke mai;
Na‘a ne toho au mei he ngaahi vai lahi.
18Na‘a ne fakahaofi au mei hoku fili fu‘u mamalu,
Meiate kinautolu na‘e fehi‘a kiate au,
He na‘a nau mālohi fau.
19Na‘a nau fakafetaulaki mai ‘i he taimi ‘o ‘eku ‘efitu‘ua;
Ka na‘e ‘i ai ‘a Sihova mooku pāletu‘a.
20Pea na‘a ne fakahū mai au ki he potu ‘atā fau;
Na‘a ne huhu‘i au koe‘uhi na‘a ne mamana kiate au.
21Kuo fai ‘e Sihova kiate au ke hoa mo e totonu ‘o ‘eku fai anga;
Kuo ne totongi kiate au ‘o taau mo e ma‘a ‘o hoku nima.
22He kuo u tauhi ‘a e ngaahi ‘alunga ‘o Sihova,
Pea kuo te‘eki ke u hiki kovi mei hoku ‘Otua.
23He ko ‘ene konisitūtone kotoa na‘e feangai mo au:
Pea ko ‘ene ngaahi lao–na‘e ‘ikai te u afe meiate kinautolu.
24Kuo ta‘emele foki ‘eku fakafe‘ao kiate ia,
Pea kuo u mata‘ofi au mei ha‘aku ni hia.
25Ko ia kuo totongi mai ‘e Sihova ke hoa mo e totonu ‘eku fai anga;
Ke tuha mo ‘eku ma‘a ‘i he‘ene vakai ‘a‘ana.
26‘I he fai mo e kakai lelei te ke takataka fai lelei,
‘I he fai mo ha‘a fita#22.26 ha‘a fita; Ko hono faka-Hepeluú ia, ka ‘oku ngali tonu hono hiki ‘o: kinautolu: (vakai kia Saame 18.25). ta‘emele te ke takataka ta‘emele;
27‘I he fai mo ha‘a ta‘efioa te ke takataka ta‘efioa,
Pea ka fai mo ha fa‘ahinga mamio te ke tau‘aki fangatua.
28Pea ko ha‘a ta‘eliekina te ke fakamo‘ui,
Ka ‘oku ke fofonga ki he hīkisia ke fakatōkilalo‘i.
29He ko koe, ‘Eiki, ‘eku maama:
‘Io, ‘e huluhulu ‘eku po‘uli ‘e Sihova.
30Seuke, ‘oku ou ‘ohofia#22.30 ‘oku ou ‘ohofia; ‘Oku hiki ‘e he ni‘ihi: te u ‘ohofia etc. ha kongakau ‘i he ‘afiona,
‘Oku ou hopokia ha puke ‘i he kau ‘a hoku ‘Otua.
31Ko e me‘a ki he ‘Otua–ko hono ‘alunga ‘oku haohaoa:
Ko e folofola ‘a e ‘Eiki kuo ‘osi-‘a-sivi ia;
Ko e fakaū ia ki he kakai ‘oku hūfanga kiate ia.
32He ko hai ha ‘Otua, ‘oka tuku ‘a Sihova?
Pea ko hai ha mo‘unga, ‘oka ne ta‘e‘oua hotau ‘Otua?
33Ko hoku mālohinga mālohi ‘a e ‘Otua:
‘Oku ne taki ‘a e haohaoa ‘i hono ‘alunga.#22.33 ‘Oku ne… ‘alunga; ‘Oku ‘ikai ke mahino ‘a hono faka-Hepeluú, ka ‘oku ngali tonu hono hiki ‘o ‘Okú ne fakahao atu au ‘i hoku halá (vakai kia Saame 18.32).
34‘Oku ne ngaohi hoku va‘e ke hangē ko e motu‘a tia:#Hap 3.19
‘O ne ‘ai ke u matu‘u ‘i hoku ngaahi potu mā‘olunga.
35‘Oku ne ako ki he tau hoku ‘ulu‘ulu nima;
Ko ia ai, ‘oku mateke ‘e hoku ongo nima ni ha kaufana ukamea.
36Pea kuo ke ‘omi kiate au ho pā fakamo‘ui.
Pea ko ho‘o fakaalaala kuo u hoko ai ‘o fu‘u lahi.
37Kuo ke fakalaulahi ‘a e potu ‘oku ou laka ai,
Ko ia kuo ‘ikai ke fengatāliaki ai ‘a hoku tunga‘i va‘e ni.
38Na‘a ku tuli hoku ngaahi fili, ‘o u faka‘auha foki;
Pea na‘e ‘ikai te u liu mai kae‘oua ke nau ‘osi.
39‘Io, kuo u faka‘osi mo have‘i kinautolu,
‘O ‘ikai te nau matu‘u hake:
‘Io, kuo nau tō ki hoku lalo va‘e.
40He na‘a ke no‘o ‘aki au ‘a e mālohi ki he tau:
Ko e kakai na‘e tu‘u mai kuo ke lolo ki lalo ‘iate au.
41Ko hoku ngaahi fili foki na‘a ke ‘ai ke nau sītu‘a,
Mo kinautolu na‘e fehi‘a kiate au te u faka‘auha.
42Na‘a nau tautapa, ka na‘e ‘ikai ha tokoni;
Na‘a nau fai kia Sihova, ka na‘e ‘ikai te ne tali.
43Pea u toki momosi kinautolu ke hangē ko e efu ‘o e fonua,
Na‘a ku laiki mo fakamafola hangē ko e pela ‘o e hala.
44Kuo ke fakahaofi au foki mei he ngaahi fakafekāke‘i ‘a hoku kakai;
Kuo ke tauhi au ke ‘ulu ki he tukui pule‘anga muli:
‘Oku nofo kiate au ha kakai ‘oku ‘ikai te u ‘ilo‘i.
45Ko e hako‘i kehe te nau fakamalua kiate au:
‘I he ongoongo atu au ki honau telinga te nau tali leva ‘eku fekau.
46Ko e hako‘i kehe te nau vaivai maha,
Pea te nau ha‘u tetetete pē#22.46 ha‘u tetetete pē; ‘Oku ngali tonu hono hiki ko iá, ka ko hono faka-Hepeluú ko e ha‘u mā‘u mahafu (vakai kia Saame 18.45). mei honau talitau‘anga.
47‘Oku mo‘ui ‘a Sihova;
Pea ‘oku fakamālō‘ia hoku Mo‘unga:
Pea ‘oku hākeaki‘i hoku ‘Otua-makatu‘u Fakamo‘ui‘anga:
48‘a e ‘Otua ‘oku ne fai sauni ma‘aku,
Mo ne lomi kakai ‘iate au.
‘Oku ke hamusi au mei he tangata fakamālohi.
49Mo ne fakahaofi au mei hoku ngaahi fili,
Mo ne fakamā‘olunga au ‘i he kakai ‘oku tu‘u mai:
50Ko ia ai, ‘e Sihova,
Te u fakafeta‘i ki he ‘afiona
‘I he ‘ao ‘o e ngaahi pule‘anga:
‘Io, te u hiva fakamālō ki ho huafa.
51‘a e ‘afiona ‘oku ne fakato‘omata‘u ‘a e fakamo‘ui ‘ene tu‘i:
Pea ‘oku ne fai ‘ofa ki he‘ene pani,
Kia Tēvita mo e hako ‘o‘ona,
‘E fai pē ‘o lauikuonga.
Currently Selected:
KO 2 SĀMIUELA 22: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
