KO 2 SĀMIUELA 21
21
1PEA na‘e hoko ha honge ‘i he taimi ‘o Tēvita, ‘o tolu ta‘u hokohoko; pea huhū ‘a Tēvita ki he fofonga ‘o Sihova. Pea folofola ‘a Sihova, Koe‘uhi pē ko Saula mo hono fale toto‘ia ‘i he‘ene tāmate‘i ‘a e kau Kipione. 2Pea ui mai ‘e he tu‘i ‘a e kau Kipione, ‘o ne pehē kiate kinautolu, (pea ko eni ko e kau Kipione na‘e ‘ikai ko e ha‘a ‘Isileli kinautolu, ka ko e toenga ‘Āmoli; pea ne fuakava kiate kinautolu ‘e ha‘a ‘Isileli, ka ka fakatotolo kinautolu ‘e Saula ke tāmate‘i, ‘i he‘ene mamahi‘i ‘a ha‘a ‘Isileli mo Siuta):#Sios 9.3-15 3‘io, na‘e folofola ‘a Tēvita ki he kau Kipione, Ko e hā te u fai ma‘amoutolu? pea te u holo ‘aki ‘a e hā ka mou tāpuaki‘i ‘a e tofi‘a ‘o Sihova?
4Pea tali ki ai ‘a e kau Kipione, Ko ‘eku me‘a mo Saula mo hono fale ‘oku ‘ikai ‘aonga ki ai ‘a e siliva mo e koula; ‘e ‘ikai ‘aonga ke tāmate‘i ha tangata ‘Isileli. Pea ne folofola ange, Ha me‘a pē ‘oku mou lau te u fai ma‘amoutolu.
5Pea nau fakatau folofola ki he tu‘i, Ko e tangata pē na‘a ne faka‘osi‘osi kimautolu, ‘a ia na‘a ne puleaki‘i kimautolu ke mau ‘auha ai, ‘o ‘ikai hamau taha ‘e nofo ‘i he ngaahi feitu‘u ‘o ‘Isileli 6–ke tuku mai ha tu‘unga me‘a ‘e toko fitu ‘i hono hako, ke mau kalusefai kia Sihova ‘i Kipea na‘e kau kia Saula ko e fili ‘e Sihova. Pea folofola ‘a e tu‘i, Te u ‘atu kinautolu.
7Ka na‘e mamae‘i ‘e he tu‘i ‘a Mefiposeti foha ‘o Sionatane foha ‘o Saula, koe‘uhi ko e fuakava ‘ia Sihova na‘e ‘iate kinaua, ‘io, ‘ia Tēvita mo Sionatane foha ‘o Saula.#1 Sām 20.15-17; 2 Sām 9.1-7 8Ka ka puke ‘e he tu‘i ‘a e ongo tama ‘a Līsipa ‘ōfefine ‘o ‘Aia, ‘a ia na‘a ne fā‘ele‘i kia Saula, ko ‘Alamoni mo Mefiposeti; pea mo e tama ‘e toko nima ‘a Maikale ‘ōfefine ‘o Saula,#21.8 Maikale; ‘Oku tu‘u ia 1 Sām 18.19 ko Mēlapi, pea ‘oku matamata ko e totonú ia. ‘a ia na‘a ne fā‘ele‘i ki he Mīhola ko ‘Ātalieli foha ‘o Pasiliai:#1 Sām 18.19 9pea ne tuku kinautolu ki he nima ‘o e kau Kipione, pea nau kalusefai kinautolu ‘i he mo‘unga ‘i he ‘ao ‘o Sihova, pea nau tō fakataha tatau pē, pea na‘e tāmate‘i kinautolu ‘i he taimi ututa‘u, ‘i he ngaahi ‘uluaki ‘aho ‘i he kamata ke utu ‘a e ta‘u pa‘ale.
10Pea na‘e to‘o ‘e Līsipa ‘ōfefine ‘o ‘Aia ha tangai, ‘o ne folahi ma‘ana ‘i he maka, mei he kamata‘anga ‘o e ututa‘u pa‘ale kae‘oua ke mahua mai ‘a e vai kiate kinautolu mei langi, ‘o ‘ikai te ne tuku ‘a e manupuna ‘o e ‘atā ke tu‘u kiate kinautolu ‘i he ‘aho, pe ko e manu kaivao ‘i he po‘uli.
11Pea na‘e fakahā kia Tēvita ‘a e me‘a ‘oku fai ‘e Līsipa ‘ōfefine ‘o ‘Aia, ko e sinifu ‘a Saula. 12Pea ‘alu ‘a Tēvita, ‘o ne to‘o ‘a e ngaahi hui ‘o Saula mo e ngaahi hui ‘o hono foha ko Sionatane mei he kainanga ‘o Siepesi-Kiliati, ‘a ia na‘a nau kaiha‘asi ia mei he mala‘e ‘o Petesani, ‘i hono tautau ai ‘e he kau Filisitia ‘i he taimi na‘a nau taa‘i ai ‘a Saula ‘i Kilipoa: 13pea ne fakahā‘ele mei ai ‘a e ngaahi hui ‘o Saula mo e ngaahi hui ‘o hono foha ko Sionatane; pea nau tānaki mo e ngaahi hui ‘o kinautolu na‘e kalusefai. 14Pea nau telio ‘a e ngaahi hui ‘o Saula mo hono foha ko Sionatane ‘i he fonua ‘o Penisimani, ‘i Siela ‘i he fa‘itoka ‘o ‘ene ‘eiki ko Kisi: pea nau fai hono kotoa ‘o e me‘a na‘e tu‘utu‘uni ‘e he tu‘i. Pea hili ia na‘e ‘ikai tekaki ‘e he ‘Otua ‘enau hūfia ‘a e fonua.
Ko e ngaahi Fepaki mo e Kau Saiāniti Filisitia
(1 Kal 20.4-8)
15Pea kuo ai foki ha tau ‘a e kau Filisitia ki ‘Isileli; pea ‘alu hifo ‘a Tēvita fakataha mo ‘ene kau tamaio‘eiki, ‘o ne taa‘i ‘a e kau Filisitia: pea ongosia ai ‘a Tēvita. 16Pea ko ‘Isipi-pēnopi, ko e taha ‘o e fānau ‘a e saiāniti, ‘a ia ko e mamafa ‘o hono tao ko e sikeli kapa ‘e tolungeau, kuo ne ‘ai teu fo‘ou, ‘o ne lau te ne taa‘i ‘a Tēvita. 17Ka ka ‘aofia ia ‘e ‘Apisai tama ‘a Seluvaia, ‘o ne taa‘i ‘a e Filisitia, ‘o tāmate‘i. Toki fuakava ki ai ‘a e lahi ‘o Tēvita, ‘o pehē, ‘E ‘ikai te ke toe ‘alu mo kimautolu ki he tau, na‘a mate ‘a e maama ‘o ‘Isileli.#1 Tu‘i 11.36; Saame 132.17
18Pea hili ia na‘e toe fai tau mo e kau Filisitia ‘i Kopo. Toki taa‘i ‘e he Husa ko Sipekai ‘a Safi, ‘a ia ko e taha ‘i he hako ‘o e saiāniti.
19Pea na‘e toe fai ‘a e tau ‘i Kope mo e kau Filisitia; pea ko ‘Elanani foha ‘o Siali-tangata-lalanga#21.19 Siali-tangata-lalanga; Ko hono faka-Hepeluú ia, ka ‘oku ngali tonu hono hiki ‘o ft: foha ‘o Siali (vakai kia 1 Kal 20.5. ko e Pētelihema, na‘a ne taa‘i ‘a e Kati ko Kolaiate, ‘a ia na‘e tatau ‘a e ‘esia ‘o hono tao lahi mo e ‘akau ‘a e tangata lalanga.
20Pea na‘e toe fai ‘a e tau ‘i Kati, pea na‘e ‘i ai ha tangata na‘e hangē ha fu‘u kafa-ofa, pea ko hono louhi‘i nima mo e louhi‘i va‘e na‘e toko ono, ‘o uofulu mā fā fakataha; pea ko ia foki na‘e fanau‘i ki he saiāniti. 21Pea ‘i he‘ene luki ki ‘Isileli, na‘e taa‘i ia ‘e Sionatane foha ‘o Simi ko e tokoua ‘o Tēvita.
22Ko e toko fā ni na‘e fanau‘i ki he siaianiti#21.22 na‘e fanau‘i… siaianiti; ‘Oku hiki ‘e ni‘ihi: na‘e fanau‘i kia Lafa. ‘i Kati; pea na‘a nau tō ‘i he nima ‘o Tēvita mo e nima ‘o ‘ene kau tamaio‘eiki.
Currently Selected:
KO 2 SĀMIUELA 21: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
