KO 1 TU‘I Ko e Talateu
Ko e Talateu
Ko e ‘Uluaki Tohi ‘o e Ngaahi Tu‘í ko hono hoko atu ia ‘o e hisitōlia ‘o e ha‘a tu‘i ‘Isilelí ‘a ia na‘e kamata ‘i he ongo Tohi Sāmiuelá. ‘E lava ke vahevahe ki he ngaahi konga ‘e tolu: 1) Ko e hoko ‘a Solomone ko e tu‘i ‘o ‘Isileli mo Siuta, pea mo e hala ‘a ‘ene ‘eiki ko Tēvitá. 2) Ko e pule mo e ngaahi me‘a na‘e lava ‘e Solomoné. ‘Oku mahu‘inga makehe ai ‘a hono langa ‘o e Temipalé ‘i Selusalemá. 3) Ko hono vaeua ‘o e fonuá ‘o pule‘anga tokelau mo pule‘anga tonga, pea mo e ngaahi talanoa ki he ngaahi tu‘i ‘o e ongo pule‘anga ko iá ‘o a‘u mai ki he vaeua‘angamālie ‘o e senituli hiva kimu‘a ‘ia Kalaisí (K.M.).
‘Oku fakamatala‘i mai ‘i he ongo tohi ‘o e Ngaahi Tu‘í ‘a e pule ‘a e tu‘i takitaha ‘o fakatatau ki he‘ene tauhi ki he ‘Otuá, pea ‘oku lau ai ‘oku fakatefito ki he‘ene tauhi ko iá ‘a e lavame‘a ‘a e fonuá. Pea ‘i he lau ‘a e ongo Tohi Tu‘í kuo pau ke iku ‘a e tauhi ‘aitolí mo e talangata‘á ki ha matu‘utāmaki ‘a e fonuá. ‘I he lau ‘a e ongo Tohi Tu‘í ko e ngaahi tu‘i ‘o e pule‘anga tokelaú na‘e ‘ikai ke sia‘a, ka ‘oku ‘i ai pē tokua ‘a e ngaahi tu‘i ‘e ni‘ihi ‘o e pule‘anga tongá na‘e sia‘a.
‘Oku ‘ilonga ‘i he ‘Uluaki Tohi ‘o e Ngaahi Tu‘í ‘a e kau palōfita ‘a e ‘Eikí, ‘a e kau tangata lea fakafofonga loto to‘a ‘a e ‘Otuá, ‘a ia na‘a nau fakatokanga ki he kakaí ke ‘oua na‘a nau lotu ki he ngaahi ‘aitoli pea ‘oua te nau talangata‘a ki he ‘Otuá. Ko e palōfita ‘ilonga taha ‘iate kinautolú ko ‘Ilaisiā, pea ‘oku kehe atu pē mo e talanoa ki he‘ene fakakikihi mo e kau taula‘eiki ‘a Pealí (vahe 18).
Ko e Kakano ‘o e Tohí
Ko e ngata‘anga ‘o e pule ‘a Tēvitá (1.1–2.12)
Ko e hoko ‘a Solomone ‘o tu‘i (2.13-46)
Ko e pule ‘a Solomoné (3.1-11.43)
a. Ko e ngaahi ta‘u kimu‘á (3.1–4.34)
e. Ko hono langa ‘o e Temipalé (5.1–8.66)
f. Ko e ngaahi ta‘u kimuí (9.1–11.43)
Ko e mavaeua ‘a e pule‘angá (12.1–22.53)
a. Ko e angatu‘u ‘a e ngaahi ha‘a he tokelaú (12.1–14.20)
e. Ko e ngaahi tu‘i ‘o Siuta pea mo ‘Isilelí (14.21–16.34)
f. Ko e palōfita ko ‘Ilaisiaá (17.1–19.21)
h. Ko e tu‘i ‘Isileli ko ‘Ēhapi (20.1–22.40)
i. Ko Sihosafate ko e Tu‘i Siuta mo ‘Ahasia ko e Tu‘i ‘Isileli (22.41-53)
Currently Selected:
KO 1 TU‘I Ko e Talateu: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.