KO 1 TU‘I 3
3
Ko e Kole Poto ‘a Solomone
(2 Kal 1.3-12)
1PEA mali ‘a Solomone ki he fāmili ‘o Felo ko e Tu‘i ‘Isipite, ‘o ne to‘o ‘a e ‘ōfefine ‘o Felo, ‘o ‘omi ia ki Kolo-‘o-Tēvita, kae‘oua ke ‘osi ‘a e langa ‘o hono fale mo e fale ‘o e ‘Eiki, mo e ‘ā ‘o Selusalema takatakai. 2Ko hono me‘a pē na‘e kei feilaulau ‘a e kakai ‘i he ngaahi sia, he kuo te‘eki langa ha fale ‘i he huafa ‘o Sihova ‘o a‘u ki he taimi ko ia. 3Pea na‘e ‘ofa ‘a Solomone ki he ‘Eiki, he‘ene fou ‘i he ngaahi tu‘utu‘uni ‘a Tēvita ko ‘ene tamai: ko hono me‘a pē ‘ene fai feilaulau mo tutu ‘inisēnisi ‘i he ngaahi sia.
4Pea hā‘ele ‘a e tu‘i ki Kipione ke fai feilaulau ai: he ko e sia lahi ia: ko e afe‘i feilaulau-mōifua na‘e feia ‘e Solomone ‘i he ‘ōlita ko ē. 5‘I Kipione na‘e hā ‘a e ‘Eiki kia Solomone ‘i ha vīsone po‘uli: pea folofola ‘a e ‘Otua, Fai mai ha‘o kole pe ko e hā te u ‘atu.
6Pea pehē ‘e Solomone, Kuo ke fai ki ho‘o tamaio‘eiki ko Tēvita ko ‘eku tamai ha ‘ofa lahi, ke tuha mo ‘ene taka ‘i ho ‘ao ‘i he mo‘oni, mo e mā‘oni‘oni, mo e loto totonu, ‘i he‘ene fakafeangai ki he ‘afiona; pea kuo ke tauhi ma‘ana ‘a e fu‘u ‘ofa ni, ho‘o tuku hono foha ke nofo ‘i hono taloni, hangē ko ia he ‘aho ni. 7Pea ko eni, ‘Eiki ko hoku ‘Otua, kuo ke fakanofo ho‘o tamaio‘eiki ko au ke fetongi ‘eku tamai ko Tēvita ‘i he tu‘i: ka ko au ko e momo‘i tamasi‘i; hono kuo u ‘ilo ke hū ki tu‘a mo hū mai? 8Ka ko ho‘o tamaio‘eiki ko au ‘oku ou lotolotoi ‘i ho kakai kuo ke fili, ko e fu‘u kakai, ‘oku ‘ikai lava hono lau, pe hano tohi, ko ‘enau tokolahi. 9Ko ia ke ke foaki ki ho‘o tamaio‘eiki ko au ha loto tokanga, ke fakamaau ho kakai ni, ‘o sivi ‘a e lelei mo e kovi; he ko hai ‘oku fe‘unga ke fakamaau ho kakai ni kuo pehē fau?
10Pea na‘e tau lelei ‘a e lea ko ia ki he finangalo ‘o ‘Ātonai, ‘a e kole ‘e Solomone ‘a e me‘a ko ia. 11Pea folofola ‘a e ‘Otua kiate ia, Ko e me‘a ‘i ho‘o kole ‘a e me‘a ni, ‘o ‘ikai te ke kole ma‘au ke ke mo‘ui fuoloa, ‘o ‘ikai te ke kole ma‘au ha fu‘u koloa, ‘o ‘ikai te ke kole ke ‘auha ho ngaahi fili; ka kuo ke kole ma‘au ‘a e poto ‘i he fanongo ki he fakamaau; 12vakai kuo u fai ki ho‘o lau; vakai kuo u ‘atu ha loto poto mo vavanga, ko ia kuo ‘ikai ha taha ‘i mu‘a ‘e tatau mo koe, pea ‘e ‘ikai tu‘u hake ha taha pehē ‘amui. 13Kae‘uma‘ā foki kuo u ‘atu kiate koe ‘a e me‘a na‘e ‘ikai te ke kolea, ‘a e fu‘u koloa mo e ongoongo fakatou‘osi, ko ia ‘e ‘ikai ha taha ‘i he ngaahi tu‘i ‘e tatau mo koe lolotonga ho‘o mo‘ui. 14Pea kapau te ke fou ‘i hoku ngaahi ‘alunga, ‘o tauhi ‘eku ngaahi tu‘utu‘uni mo fekau, ‘o hangē ko e fou ai ‘a Tēvita ko ho‘o tamai, pea te u toki fakalahi ho ngaahi ‘aho.
15Pea ‘ā ‘a Solomone, pea tā ko e misi: pea ne ha‘u ki Selusalema, ‘o ne tu‘u ‘i he ‘ao ‘o e ‘A‘ake ‘o e Kovinānite ‘o ‘Ātonai, ‘o ne feia ‘ani feilaulau-mōifua, ‘o ne fai mo e ngaahi feilaulau-‘ofa, ‘o ne kātoanga‘i ‘ene kau tamaio‘eiki kotoa pē.
Ko e Fakamāu‘i ‘e Solomone ha Kē Faingata‘a
16Toki omi ki he tu‘i ha ongo fafine fe‘auaki, ‘o na tutu‘u ‘i hono ‘ao 17Pea pehē ‘e he finemotu‘a ‘e taha, ‘Ēī, ‘oku ai ha me‘a ‘oku ma felelei mai ai. Ko au mo e finemotu‘a ni ‘oku ma fale taha; pea u fā‘ele ‘i he fale ‘oku ne ‘i ai. 18Pea kuo ma pō tolu, pea fā‘ele mo e finemotu‘a ni foki; pea na‘a ma fakataha pē, he na‘e ‘ikai ha kehe ‘i he fale mo kimaua: na‘a ma toko ua matematē pē ‘i he fale. 19Pea na‘e pekia ‘a e tama ‘a e finemotu‘a ni ‘i he pō, he ne ne ta‘omi ia. 20Pea tu‘u hake ia ‘i he tu‘uapō, ‘o ne to‘o ‘eku tama mei hoku tafa‘aki, lolotonga na‘e mohe ho‘o kaunanga ko au, ‘o ne ‘ai ia ‘i hono fatafata; 21ka ko ‘ene tama kuo mate na‘a ne ‘ai hoku fatafata ‘o‘oku. Pea ‘i he‘eku tu‘u hengihengi ke fakahuhu ‘eku tama, tā kuo pekia: ka ‘i he‘eku vakai ia pongipongi, tā na‘e ‘ikai ko ‘eku tama ia na‘a ku fā‘ele‘i.
22Pea lea mai ‘a e finemotu‘a ‘e taha, ‘Ikai; ka ko e tama mo‘ui ‘oku ‘aku, ka ‘oku ‘a‘au ‘a e tama mate. Kae lea mai ē, ‘Ikai; ko ha‘au ia ‘a e mate, ka ko ‘eku tama ‘a e mo‘ui. Na‘e pehē ‘ena fakamatala ‘i he ‘ao ‘o e tu‘i.
23Pea folofola ‘a e tu‘i, ‘Oku pehē ‘e ē, Ko ‘eku tama ē ‘a e mo‘ui, pea ko ha‘au ‘a e mate: ka ‘oku pehē ‘e ē, ‘Ikai; ka ko ha‘au ‘a e mate, pea ko ‘eku tama ‘a e mo‘ui. 24Pea folofola ‘a e tu‘i, ‘Omi ha heletā. Pea nau ‘omi ha heletā ki he ‘ao ‘o e tu‘i. 25Pea folofola ‘a e tu‘i, Fahi ua ‘a e tamasi‘i ‘oku mo‘ui, ‘o ‘ange ke na takitaha ‘a e konga.
26Pea fakatau folofola ki he tu‘i ‘a e finemotu‘a na‘e ‘ana ‘a e tamasi‘i ‘oku mo‘ui, he na‘e ngaue hono fatu telia ‘ene tama, ‘o ne pehē ‘e ia, Fakamolemole ‘a e ‘afiona: tuku kiate ia ‘a e tamasi‘i ‘oku mo‘ui, ‘o ‘oua ‘aupito ‘e tāmate‘i.
Kae lea mai ē, ‘Oua ‘e ‘a‘aku, pe ‘a‘au: fahi ua pē.
27Toki tali ‘e he tu‘i, ‘o ne pehē, ‘Ange kiate ia ‘a e tamasi‘i ‘oku mo‘ui, ‘o ‘oua ‘aupito ‘e tāmate‘i: ko ‘ene fa‘ē mo‘oni ia.
28Pea fanongo ‘e ‘Isileli kātoa ki he fakamaau kuo fai ‘e he tu‘i; pea nau manavahē ke ‘i he ‘ao ‘o e tu‘i: he na‘a nau vakai kuo ‘iate ia ‘a e poto ‘o e ‘Otua ke fai fakamaau.
Currently Selected:
KO 1 TU‘I 3: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
