KO 1 TU‘I 1
1
Ko e Toulekeleka ‘a Tēvita
1PEA ko Kingi Tēvita kuo motu‘a mo a‘ua‘u: pea nau ta‘ota‘o ‘aki ha ngaahi kofu, kae ‘ikai te ne māfana ai. 2Pea fakatau folofola ki ai ‘ene kau tamaio‘eiki, Ke mau kumi mu‘a ma‘a e ‘afio ‘a e tu‘i ha ki‘i fefine tāupo‘ou ke ne fakafe‘ao ki he Feitu‘u na, mo ‘utangi ia; pea ke ne tokoto ‘i ho fatafata, kae ma‘u māfana ai ‘a e ‘afiona. 3Ko ia na‘a nau kumi ha fefine hōihoifua ‘i he feitu‘u kotoa pē ‘o ‘Isileli, pea nau ‘ilo ‘a ‘Apisaki ko e fefine Sūnemi, pea nau ‘omi ia ki he tu‘i. 4Pea na‘e hōihoifua ‘aupito ‘a e ta‘ahine, pea na‘a ne nofo ki he tu‘i ko hono ‘utangi, pea ne tauhi ia; ka na‘e ‘ikai ala ‘a e tu‘i kiate ia.
5Toki mākeke hake ‘a ‘Atunaisa ko e tama ‘a Hākiti, ‘o ne pehē, Ko au te u tu‘i; pea ne ma‘u mai ha‘ane ngaahi sāliote, mo e kau heka hoosi, mo e toko nimangofulu ke lele mu‘omu‘a. 6Pea kuo te‘eki fakamamahia ia ‘e he‘ene ‘eiki talu ‘ene tupu, ha‘ane pehē, Ko e hā kuo ke fai pehē ai? Pea ko e tangata manumanumelie ‘aupito; pea na‘e tō ‘i he tu‘a ‘o ‘Apisalome.#2 Sām 3.4 7Pea na‘a nau fa‘ufa‘u fono mo Sioape tama ‘a Seluvaia, mo ‘Āpaiata ko e taula‘eiki: pea na‘a nau kau mo ‘Atunaisa, ‘o tokoni ki ai. 8Ka ko e taula‘eiki ko Sātoki, mo Penaia foha ‘o Sihoiata, mo e palōfita ko Nētane, mo Simi, mo Le‘i, mo e kau Helo ‘a Tēvita, na‘e ‘ikai te nau kau mo ‘Atunaisa.
9Pea feia ‘e ‘Atunaisa ha feilaulau sipi mo pulu, mo e kafi tali ‘eiki, fe‘unga mo e maka ko Soheleti, ‘a ia ‘oku ‘i he ve‘e ‘Enilokeli; pea ne tala ki hono ngaahi tokoua ‘i he fale‘alo, pea ki he kau tangata Siuta, ko e kau tamaio‘eiki ‘a e tu‘i: 10ka ko Nētane ko e palōfita, mo Penaia, mo e kau Helo, mo hono tokoua ko Solomone, na‘e ‘ikai te ne tala ki ai.
11Pea lea ‘a Nētane kia Patisepa ko e fa‘ē ‘a Solomone, ‘o pehē, ‘Ikai kuo ke fanongo koā kuo tu‘i ‘a ‘Atunaisa tama ‘a Hākiti, ka ‘oku ‘ikai ke mea‘i ‘e hotau ‘eiki ko Tēvita?#2 Sām 12.24 12Pe‘i ha‘u mu‘a ka u fale‘i koe, ka ke fakahaofi ho‘o mo‘ui ‘a‘au mo e mo‘ui ‘a ho‘o tama ko Solomone. 13‘Alu, pea ke hū atu kia Kingi Tēvita, pea ke pehē ki ai, ‘Ēī, ‘ikai na‘e fuakava ‘a e ‘afiona ki ho‘o kaunanga ko au, ‘o pehē, Ko ho‘o tama pē ko Solomone te ne hoko kiate au ‘i he tu‘i, pea ko ia ia ‘e nofo ‘i hoku taloni? Pea ko e hā ai kuo tu‘i ‘a ‘Atunaisa? 14Pea ko eni, lolotonga ‘oku mo alea ai mo e tu‘i kuo u a‘u atu mo au ‘i ho tu‘a, pea te u fakapapau ho‘o lea.
15Pea hū atu ‘a Patisepa ki he tu‘i ki he loki: pea kuo motu‘a ‘aupito ‘a e tu‘i, pea kuo fai ‘e ‘Apisaki ko e Sūnemi ‘a e tauhi ‘o e tu‘i. 16Pea tulolo ‘a Patisepa, ‘o fai ‘ene faka‘apa‘apa ki he tu‘i. Pea folofola ‘a e tu‘i, Ko e hā ‘au?
17Pea fakatau folofola ki ai ‘a e fefine, ‘Ēī, na‘a ke fuakava ki ho‘o kaunanga ko au, ‘ia Sihova ko ho ‘Otua, Ko ho‘o tama ko Solomone te ne hoko kiate au ‘i he tu‘i, pea ko ia ia ‘e nofo ‘i hoku taloni. 18Kae vakai kuo tu‘i ‘a ‘Atunaisa, pea ‘oku ‘ikai ke mea‘i ‘e he ‘afio ‘a e tu‘i: 19pea kuo ne fai feilaulau pulu mo e kafi tali ‘eiki mo e sipi, ko e me‘a lahi, pea kuo ne tala ki he fale‘alo kotoa, pea kia ‘Āpaiata ko e taula‘eiki, pea kia Sioape ko e ‘eikitau: ka ko ho‘o tamaio‘eiki ko Solomone kuo ‘ikai te ne tala ki ai. 20Pea ko koe, ‘Ēī, ‘oku hanga ki ai ‘a e mata ‘o ‘Isileli kātoa, ke fakamahino kiate kinautolu pe ko hai ‘e fetongi koe ‘i he taloni ‘o e ‘afio ‘a e tu‘i. 21Na‘a faifai, ka ‘iloange kuo toka ‘a e ‘afio ‘a e tu‘i mo ‘ene ngaahi kui, pea lau au mo ‘eku tama ko Solomone ko e ongo hia.
22Pea ‘iloange, lolotonga ‘ena alea mo e tu‘i, mo e hū mai ‘a e palōfita ko Nētane. 23Pea nau fakahā ki he tu‘i, ‘o pehē, Ko Nētane ‘ena ko e palōfita. Pea hū mai ‘a Nētane ki he ‘ao ‘o e tu‘i, ‘o ne tō fo‘ohifo ki he kelekele, ‘o fai ‘ene faka‘apa‘apa ki he tu‘i. 24Pea fakatau folofola hake ‘e Nētane, ‘Ēī, kuo ke folofola koā, ‘E hoko kiate au ‘a ‘Atunaisa ‘i he tu‘i, pea ko ia ia ‘e nofo ‘i hoku taloni? 25He kuo ne ‘alu hifo he ‘aho ni, pea kuo ne feia ha feilaulau pulu, mo e kafi tali ‘eiki, mo e sipi, ko e me‘a lahi ‘aupito; pea kuo ne tala ki he fale‘alo kotoa, pea ki he hou‘eiki tau,#1.25 ki he hou‘eiki tau; Ko hono faka-Hepeluú ia, ka ‘oku pehē he hiki fuoloa ‘e taha: kia Sioape ko ho‘o ‘eikitaú. pea ki he taula‘eiki ko ‘Āpaiata: pea ko kinautolu ena ‘oku nau kai mo inu ‘i hono ‘ao, ‘o nau pehē, 26Ke lākoifie ‘a Kingi ‘Atunaisa. Ka ko au, ‘io, ‘a ho‘o tamaio‘eiki ko au, mo e taula‘eiki ko Sātoki, mo Penaia ko e foha ‘o Sihoiata, mo ho‘o tamaio‘eiki ko Solomone kuo ‘ikai te ne tala ki ai. 27Ko e me‘a fai ‘e he ‘afiona ‘apē, ka na‘e ‘ikai te ke fakahā ki ho‘o kau tamaio‘eiki pe ko hai ‘e fetongi ‘a e ‘afio ‘a e tu‘i, ‘o nofo ‘i he taloni?
28Pea tali ‘e Kingi Tēvita, ‘o ne pehē, Ui mai ‘a Patisepa. Pea ne hū mai ki he tu‘i, ‘o ne tu‘u ‘i hono ‘ao. 29Pea fuakava ‘a e tu‘i ‘o pehē, Tangi mo‘oni ‘a e ‘Eiki, ‘a ia kuo ne huhu‘i ‘eku mo‘ui mei he faingata‘a kotoa– 30hangē ko ‘eku fuakava kiate koe ‘ia Sihova ko e ‘Otua ‘o ‘Isileli, ‘o pehē, Ko ho‘o tama pē, ‘a Solomone, te ne hoko kiate au ‘i he tu‘i, pea ko ia ia ‘e fetongi au ‘i he nofo ki hoku taloni: tala atu, ‘e pehē ‘eku fai he ‘aho ni.
31Pea tulolo ‘a Patisepa, ‘o fo‘ohifo ki he kelekele, ‘o ne fai ‘ene faka‘apa‘apa ki he tu‘i, ‘o ne fakatau folofola hake, Ke lākoifie ma‘u ai pē ‘a e ‘afio ko Kingi Tēvita.
32Pea folofola ‘a Kingi Tēvita, Ui mai ‘a e taula‘eiki ko Sātoki, mo e palōfita ko Nētane, mo Penaia foha ‘o Sihoiata. Pea na‘a nau omi ki he ‘ao ‘o e tu‘i. 33Pea folofola ‘a e tu‘i kiate kinautolu, ‘Alu mo kimoutolu ‘a e kau tamaio‘eiki ‘a homou ‘eiki, pea mou fakaheka hoku foha ko Solomone ki he miuli fefine ‘oku ‘a‘aku, pea mou ‘ohifo ia ki Kīhoni: 34pea ke pani ia ‘i ai ‘e he taula‘eiki ko Sātoki mo e palōfita ko Nētane ke Tu‘i ‘Isileli: pea mou ifi ‘a e talupite, ‘o mou pehē, Ke lākoifie ‘a Kingi Solomone! 35Pea te mou muimui hake kiate ia, pea te ne hū mai, ‘o nofo ki hoku taloni, pea te ne fetongi au ‘i he tu‘i; he ko ia ia kuo u tu‘utu‘uni ke ‘eiki ki ‘Isileli pea ki Siuta.
36Pea tali ‘a Penaia foha ‘o Sihoiata ki he tu‘i, ‘o ne pehē, ‘Ēmeni. ‘Ofa ke pehē mo e folofola ‘a Sihova ko e ‘Otua ‘o e ‘afio ‘a e tu‘i. 37Hangē ko e kau ‘a Sihova mo e ‘afio ‘a e tu‘i, ke pehē mo ‘ene kau mo Solomone, pea ke ne ‘ai hono taloni ke mā‘olunga ‘i he taloni ‘o e ‘afio ko Kingi Tēvita.
38Ko ia na‘e ‘alu hifo ‘a e taula‘eiki ko Sātoki, mo e palōfita ko Nētane, mo Penaia foha ‘o Sihoiata, mo e ha‘a Kēleti mo Pēliti; pea nau fakaheka ‘a Solomone ki he miuli ‘a Kingi Tēvita, pea nau fakahā‘ele ia ki Kīhoni. 39Pea to‘o ‘e Sātoki ko e taula‘eiki ‘a e nifo‘i manu ‘ainga lolo mei he Tēniti, ‘o ne pani ‘a Solomone. Pea nau ifi ‘a e talupite; pea kalanga ‘a e kakai kotoa, Ke lākoifie ‘a Kingi Solomone! 40Pea muimui hake kiate ia ‘a e kakai kotoa ‘oku nau ifi fangufangu mo mavava–ko e mavava ka ko ha mavava–pea na‘e pā ‘a e kelekele ‘i he longoa‘a.
41Pea na‘e ongo mai kia ‘Atunaisa mo kinautolu kuo ne tala ‘a ia na‘a nau ‘iate ia, pea kuo toki ‘osi ‘enau kai. Pea ‘i he fanongo leva ‘e Sioape ki he le‘o ‘o e talupite, na‘a ne pehē, Ko e hā ha maveuveu ‘a e kolo? 42Lolotonga ‘ene kei lea, ‘iloange na‘e a‘u mai ‘a Sionatane ko e foha ‘o e taula‘eiki ko ‘Āpaiata: pea pehē ‘e ‘Atunaisa, Hū mai, he ko e tangata to‘a koe, pea ‘oku ha‘u mo koe ha ongoongo lelei.
43Pea tali ‘e Sionatane, ‘o ne pehē kia ‘Atunaisa, Tā ko e mo‘oni, ko hotau ‘eiki ko Kingi Tēvita kuo ne fakanofo ‘a Solomone ke tu‘i, 44pea kuo fekau ‘e he ‘afio ke ō mo ia ‘a e taula‘eiki ko Sātoki, mo e palōfita ko Nētane, mo Penaia foha ‘o Sihoiata, mo e ha‘a Kēleti mo Pēliti, pea kuo nau fakaheka ia ki he miuli ‘a e tu‘i: 45pea ko Sātoki ko e taula‘eiki mo Nētane ko e palōfita, kuo na pani ia ‘i Kīhoni ke tu‘i: pea kuo nau foki hake mei ai mo e mavava, pea ko ia ‘oku fekālanga‘i ai ‘a e kolo. Ko e longoa‘a ia na‘a mou fanongo ki ai. 46Kae‘uma‘ā foki ‘oku nofo ‘a Solomone ‘i he taloni ‘o e pule‘anga. 47Kae‘uma‘ā foki na‘e ha‘u ‘a e kau tamaio‘eiki ‘a e tu‘i ke tala monū ki hotau ‘eiki ko Kingi Tēvita, he‘enau pehē, ‘Ofa ange ho ‘Otua ke ne ngaohi ‘a e huafa ‘o Solomone ke lahi ange ‘i ho‘ou, pea mo hono taloni ke mā‘olunga ‘i ho‘ou taloni: pea fai ‘e he tu‘i ‘ene hū ‘i he mohenga. 48Kae‘uma‘ā foki na‘e pehē ‘a e folofola ‘a e tu‘i, Mālō mo Sihova ko e ‘Otua ‘o ‘Isileli, ‘a ia kuo ne tuku mai he ‘aho ni ha taha ke nofo ‘i hoku taloni, ‘o sio ki ai hoku mata foki.
49Pea manavahē ‘a e kakai na‘e keinanga mo ‘Atunaisa, pea nau tu‘u, ‘o ‘alu takitaha ‘i hono hala. 50Pea manavahē ‘a ‘Atunaisa telia ‘a Solomone, ‘o ne tu‘u ‘o ‘alu, ‘o piki ki he nifo‘i ‘ōlita. 51Pea na‘e fakapā kia Solomone, ‘o pehē, Ta ‘oku manavahē ‘a ‘Atunaisa kia Kingi Solomone, he vakai kuo ne puke ki he nifo‘i ‘ōlita,#1.51 nifo‘i ‘ōlita; Ko e tomo hake ‘a e tuliki ‘e fā ‘o e ‘ōlitá, ‘o fōtunga ia ‘o hangē ha me‘a tui ‘o ha pulú. Pea ka ‘ilonga ha taha ‘e piki he me‘a ko iá na‘e tapu ke tāmate‘i. he‘ene pehē, Ke fuakava mu‘a kiate au ‘e Kingi Solomone, ‘Ilo ‘e ia ‘o kapau te ne tāmate‘i ‘ene tamaio‘eiki ‘aki ‘a e heletā.
52Pea folofola ‘a Solomone, Kapau te ne nofo ‘o angalelei, ‘e ‘ikai tō kelekele hano tu‘oni lou‘ulu ‘e taha; ka ‘o kapau ‘e ‘ilo ‘iate ia ha kovi, te ne pekia. 53Pea fekau ‘e Kingi Solomone, ‘o nau ‘ohifo ia mei he ‘ōlita. Pea ne a‘u mai, ‘o fai ‘ene hū kia Kingi Solomone: pea folofola ‘a Kingi Solomone kiate ia, ‘Alu ki ho ‘api.
Currently Selected:
KO 1 TU‘I 1: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
