Saaŋ 3
BQJDBL2

Saaŋ 3

3
Galolobor Yésu ni Nikodem
1Bajene ni gayoŋ Eᵽárisie yay afan Esúif yay ace, gajaol Nikodem. 2Nájoul ni fuh ak’atoh Yésu naagol : « Afanom, wóli jiffase búoh Aláemit aboñuli bi egitenóli gaffas, mata an áfuh ájuut akan ti aw waf wauwu waunderuti mee Aláemit m’balet búsolol. » 3Yésu naagol : « Maagen, ínje ilobi yo : An abbañut me abugi#3.3 An abbañut me abugi : Ni gugerekay, firim faufe fújue may fujogi ti nihi fuoh me an abugulati me fatiya., mát’áju ajuh Jávi Aláemit. » 4Nikodem naagol : « An bu nájue abugi áutten o báfanumer ? Ᵽan ᵽiaŋ abbañ anogen ni far jaol min abugi ? » 5Yésu naagol : « Maagen, ínje ilobi yo : An abuguti me ni mal, abuguti me ni Biinum Banabe, mát’áju anogen ni Jávi Aláemit. 6Wabugi me ni arafuhow, wo enil ; bare wabugi me ni Biinum Banabe, wo biinum bom.#3.6 Dóemme : an o arafuhow abuge, o ᵽan aroŋ buroŋ bajae ebao ; an abugi me ni Biinum Banabe, aĉila ᵽan ároŋum ni bo bándor. 7Jamb’ujahali min iogi me : Jiaro jibbañ jubugi. 8Erús yay bánoban bo ébahen me, neteh ebbañen. Ᵽan uun bateger yo, bare mat’uffas bay éᵽureul ni bay eom n’ejow. Mamu níh’íni mee may ni ánoan abugi ni Biinum Banabe. »
9Ñer Nikodem naagol : « Urú bu júe kano ? » 10Yésu naagol : « Aw aamme aligena ámah dáure Israel, uffasut dáuru ? 11Maagen, ínje ilobi yo : Wóli julobeullob wo jiffas me, jigiteneulgiten ᵽoᵽ wo jujuh me, bare buru jilet n’eyab gurimóli. 12Jíinenut me ínje baloberul mala waf waw waa babe n’ettam, bu jújue jíinen ínje baloberul ñer mala waa fatiya ? 13An ámusut ajiŋ bi fatiya émit, bare baje an aavulo ró, aamme ínje Añol Arafuhow.
14Ti Móis aŋar me enuhunjaŋ yay yaa mañ ahoh n’eom ailen bújoŋor ésuh yay baubu ni gafit gagu#3.14 Juluj Uᵽin 21.9, mo may Añol Arafuhow ajai me ehoh n’eom atebeni mee, 15min mbi ánoan áinen me ni o abaj buroŋ bábaerit. 16Aláemit namamaŋ bugan bugagu náar iki ájiil Añolol Erímbani yay, min mbi ánoan áinen me ni o jamb’ábbur bándor, bare abaj buroŋ babu bábaerit me. 17Maagen, let bi etaliŋ mof mamu Aláemit aboñulo mee Añolol, bare til bi eᵽagen mo. 18An áinen me ni o, mat’ataliŋi. Bare an áinenut me ni o, bataliŋol bubae, mata o áinenut n’Añol Aláemit Erímbani yay. 19Bataliŋ babu, bo buomme ube : gajaŋa gagu guĉiloĉih ni mof, bare bugan bugagu emoĉ yay gufaŋe n’gumaŋe, mata bakaneril buarat. 20Maagen, ánoan akane maarat, gajaŋa nalale bujuh ; mat’amaŋ go elof jambi bakanerol buraŋ. 21Bare til an ahu aamme ni maagen, o nah’alofgolof, mamu ᵽan jugi ŋanno ca búoh Aláemit áĉibbenol ni bakanerol. »
Saaŋ Batis o n’ebbañ alob mala Yésu
22Ᵽúrto, Yésu ni ulagorol n’gujow bi ni mof mamu maa Yúde ; nanamo bo ni bugo ró, náh’ábatise bugan bugagu. 23Saaŋ Batis, o náni babu n’ésuh yay yo guvoge me Ainon, yalof me yayu yo guvoge me Salim, náh’ábatise bo may, mata mal mimmeŋbommeŋ. Bugan bugagu nihi gújoul gutogol bo min ábatiseil. 24Ni tinah tautu, Saaŋ m’bajogeruti ᵽan áruri ni fipeh.
25Ni baj síceŋor tutor ulagora Saaŋ ni apalil Asúif ace mala mukanay mamu bi eᵽos enil ti bulagoil burorene yo me. 26N’gujow iki gutoh Saaŋ min guogol : « Afanóli, nuosene áine ahu aamen me n’aw ñagagu fal fafu faa Suruden, áine ahu o nulob me mola ? Yoo, o may umu n’gábatise bugan, ban ésuh yay ᵽe ubugi n’etey mbal aĉila. » 27Saaŋ naagil : « An ájuut abaj waf Aláemit m’basenutol wo. 28Buru faŋaul jimate no nioh me : “Injé ilet Kirista ahu, bare Aláemit naboñulomboñ iyabulol gayoŋ.” 29Aĉil me áyava ahu, o aamme ayaba ahu ; ban abuge ayaba ahu o nah’ailo me alofol, nah’ababaj ésumay yámah o baunerol. Esúmay yauyu eomme n’ínje, ban maer uyu to n’gárira yo. 30Aíne ahumu naate afaŋ najamoe, ínje niote ifaŋ níkasuloe. »
An ahu áᵽullo me n’émit
31« An ahu áᵽullo me fatiya nafafaŋ bugan bugagu ᵽe. Ahu áᵽullo me n’ettam, ettam yay eĉilol, ban nah’alolob mala buroŋ be. An ahu áᵽullo me n’émit nafafaŋ bugan bugagu ᵽe, 32ᵽan nah’agiten wo najuh me ni wo naun me, bare an mat’ayab gurimol. 33Bare an ayab go me ᵽan agiten mamu búoh Aláemit maagen nalobe. 34An ahu o Aláemit aboñ me, gurim Aláemit nah’alob, mata Aláemit nammeŋenolmeŋen Biinum Banabe. 35Ᵽaaya namamaŋ Añolol, ban nahahat waf waw ᵽe ni guñenol. 36An áinen me n’Añolol ᵽan abaj buroŋ bábaerit ; an alat me éinen n’Añolol, mat’abaj buroŋ baubu, bare til bitiña-fiiñ Aláemit bujae eya ni o. »

Wycliffe Bible Translators, Inc. All rights reserved.


Learn More About bqj Firim fafu fal Aláemit