2 Timoti 4

1Vi yeve ta̱ Yesu Kirisiti Kishi wi ta̱ a kuyaꞋanka aza a wuma ra̱ka̱ afada kanna ko yoku, ka̱ta̱ feu u yaꞋanka a̱kpisa̱ afada. Ili i nam pa, yi ta̱ a kuyaꞋan nannai ayin a na baci Yesu u ta̱wa̱i kulyaꞋa tsugono ci ni. Adama a nannai gogo na n shamgba ta̱ u Ka̱shile n Yesu Kirisiti Kishi, n dana wu n ciga ta̱ 2vu dana uma Arabali a Singai a kadanshi ka̱ Ka̱shile. LyaꞋa kelime n kuyaꞋan nannai ko vi n ka̱ba̱nga̱ ko babu ka̱ba̱nga̱. Ka̱ta̱ vi reme ka̱ɗu ayin a na baci vi a kudansuka ko kulapulaka uma a̱ ubuta̱ u kuyotsongusu. Kuyotsongusu ku nam pa ku yotsongu le unushi u le, ka̱ta̱ kpamu ku doku le utsura u ka̱ɗu. 3YaꞋan nannai adama a na ayin i ta̱ lo a̱ kuta̱wa̱ a na uma a kuꞋiwan kupana kuyotsongusu ku na ki derere. I ta̱ o kutono ili i na a cigakai ka̱ci ke le koci, i ta̱ kpamu a̱ kula̱nsa̱ka̱ ka̱ci ke le nlum n na n kudana le ili i na i a kuciga kupana. 4Uma a nam pa i ta̱ a kuꞋiwan kadanshi ka mayun, ka̱ta̱ o bono o tono arabali a aꞋuwa. 5Amma, sheshe mayin a̱ ubuta̱ wi ili dem. Ka̱ta̱ vu pana wovon u kusoꞋo atakaci adama a Vuzagbayin ba. YaꞋan ulinga u kutuka̱ n uma a̱ ubuta̱ u Yesu Kirisiti Kishi, nannai ɗa va kushatangu ulinga u na Ka̱shile ke nekei nu.

Kadanshi ka̱ Bulusu ku ukocishi

6Amma mpa, wuma u va̱ u yaꞋan ta̱ ɗe utsuwin tsa alyuka u Ka̱shile. Ayin a̱ ukpa̱ a̱ va̱ a yawa ta̱ ɗevu.#Mkc. 28:7. 7N yaꞋan ta̱ ɗe vishili adama a kasingai, n kotso ta̱ ɗe ilaɗi i malamanai i va̱, ali n gogo na mo okpo ta̱ kpamu n uneki u ka̱ɗu. 8Gogo na kpamu mi ta̱ ɗevu n kuciya̱ katsupu. Vuzagbayin wi ta̱ e kuneke mu oroliko† a na o kuyotsongu a na n yongoi n usuɓi. Vuzagbayin ɗa keyevikafada ka singai wi ta̱ kpamu e kuneke mu oroliko a nan lo a kanna ka gbayin ko kubono ka̱ ni. Katsupu ka nam pa kpamu adama a̱ va̱ a ɗa koci ba, amma adama a uma ra̱ka̱ a na i a kuvana kubono ku ni m ma̱za̱nga̱.

9N folono wu ta̱ yaꞋan gogoꞋo vu ta̱wa̱ ka̱ta̱ vi geshe ba. 10Dima u laza ta̱ ɗa u ka̱sa̱kpa̱i mu endeꞋen adama a na u ciga ta̱ ili ya aduniyan i nam pa. U bana ta̱ Tosolonika. Karisika u bana ta̱ Galatiya, Taitu kpamu u bana ta̱ Damatiya. 11Luka ɗa wi na nu mpa koci. Vi baci a̱ kuta̱wa̱ vi ɗika Marukusu i ta̱wa̱ koɓolo adama a na wi ta̱ a̱ kuɓa̱nka̱ mu. 12N suku ta̱ Tikiku a Afisu. 13Vi baci a̱ kuta̱wa̱, vu tuka̱ mu n ogbodo a na n ka̱sa̱kpa̱i u ka̱ja̱Ꞌa̱ ka̱ va̱ Kabu a̱ likuci i Taruwasa. Ka̱ta̱ feu vu tuka̱ mu n atagarda a̱ va̱, amma kpamu ka̱ta̱ vu kpa̱ɗa̱ kutuka̱ mu n epepa a̱ va̱ ba.

14Vuza wi ta̱ lo e ci ɗeke Isakandari kawakana. Vuma vu nam pa u yaꞋanka mu ta̱ iforotoi n a̱bunda̱i, amma Vuzagbayin wi ta̱ a kuyaꞋanka yi afada adama a ili i na u yaꞋankai mu. 15Ka̱ta̱ i yaꞋan mayin n a̱yi adama a na wi ta̱ a tsurala n ili i na tsu danai dem.

16Ko vuza te wi nu mpa a ayin a na a̱ gita̱i kubanka mu a̱ ubuta̱ wa afada ba. Yaba dem u ka̱sa̱kpa̱i mu. Ka̱ta̱ e keceke le unushi u nan lo ba. 17Amma ɗa Vuzagbayin u shamgbai nu mpa ɗa u nekei mu utsura, adama a na n dana Arabali a Singai a̱ ubuta̱ u na Aza̱ka̱yimbi a kupana. Ɗa Vuzagbayin wi isai mu a̱ ubuta̱ wu ukpa̱ u yoku. 18Mayun, Vuzagbayin wi ta̱ a kisa mu a̱ ubuta̱ u gbani-gbani n kavama dem, ka̱ta̱ u banka mu m ma̱ta̱na̱ o tsugono tsu gaɗi ci ni. Ka̱sa̱kpa̱ tsugbayin ci yongo tsu Ka̱shile, ko wanai. Ta nannai.

Ikya̱shi i Bulusu yu ukocishi

19Mi ta̱ a̱ kukya̱sa̱ Pirisila n Akila n aza a na i ida̱shi a kpaꞋa ku Unifara. 20Arasata wi ta̱ ɗe o Korintiya. Ana kpamu n lazai, n ka̱sa̱kpa̱ ta̱ Tarafima nu mɓa̱la̱ a̱ likuci i Militasu.

21YaꞋan gogoꞋo adama a na vi ciya̱ vi yawa punu na babu uta̱ni u yawa. Abulu wi ta̱ a̱ kukya̱sa̱ ɗa̱, ta kpamu nannai Budi, n Lainusu, n Kalodiya n aza a̱ tsu ra̱ka̱ i ta̱ ikya̱shi i ɗa̱.

22YaꞋan Vuzagbayin u tono n wuma u nu. Kasingai ka̱ Ka̱shile ko yongo n a̱ɗa̱ ra̱ka̱.

Currently Selected:

2 Timoti 4: asgNT

Highlight

Copy

Compare