2 Timoti 2

Kosoji ka singai ke Yesu Kishi

1Gogo na avu maku ma̱ va̱, shamgba n utsura a̱ ubuta̱ u kasingai u Yesu Kirisiti Kishi. 2Vu pana ta̱ akaka a̱ va̱, akaka a nan lo ta na uma n a̱bunda̱i o okpo ta̱ ngan ma a ɗa. Gogo na neke akaka a na pa a u uma a mayun a̱ ubuta̱ wi ili dem aza a na a kufuɗa a piꞋisaka uma o yoku feu.

3Reme ka̱ɗu vi yaꞋan atakaci koɓolo nu mpa, nannai ɗa vo kokpo kosoji ka singai ke Yesu Kirisiti Kishi. 4Vuza na baci wi a kuyaꞋan ulinga an kosoji u tsu ɓolongu u ɗa n ulinga u yoku kau ba. Ili i nam pa ya i tsu zuwa ta̱ kovonshi vi ni u pana uyoꞋo. 5Vuza u uwa baci ugulani u malazanai wi a kulyaꞋa kelime ali ka̱ta̱ u ciya̱ kuneꞋe ba, sai biꞋi u tono wila̱ wu ugulani wa. 6Kacimbi ka na ka yaꞋin ulinga ka̱u, u yotso ta̱ u ciya̱ u lyaꞋa mele ma̱ ni a cau. 7A̱ ubuta̱ u kusheshe ku ɗa̱ vu ka̱na̱ ili i na mi a kudansa. Vuzavaguɗu wi ta̱ a̱ kuɓa̱nka̱ wu vi yeve ili i nam pa ra̱ka̱.

8Ciɓa n Yesu Kishi ayin tutu. A matsa yi ta̱ e kefeku ko tsugono ka Dawuda ɗa kpamu u ɗenga̱i a kasaun. Na va ɗaɗa Arabali a Singai a na mi a kudana uma. 9Adama a na kpamu mi a kudana Arabali a Singai a nam pa, ɗa mi o kusoꞋo atakaci ali ɗa a shiyai mu n ikani an vuza vu unushi. Amma a kufuɗa a shiya kadanshi ka̱ Ka̱shile n ikani ba. 10Mpa n foɓuso ta̱ kululukpa̱ n ili dem i ɗa yi baci a̱ kuta̱ka̱ n wishi a̱ ubuta̱ u uma a na Ka̱shile ka zagbai o okpo uma a̱ ni, ka̱ta̱ kpamu a̱ ciya̱ tsugbayin tsu babu uteku a̱ ubuta̱ u Yesu Kirisiti Kishi.

11Kadanshi ka nam pa mayun ɗa:

Tsu kuwa̱ baci koɓolo n a̱yi,

ci ta̱ feu o kuyongo n wuma koɓolo n a̱yi.

12Tsu lulukpa̱ baci a̱ ubuta̱ wa atakaci,

ci ta̱ a kulyaꞋa tsugono n a̱yi.

Tsu nana yi baci,

wi ta̱ a kunana tsu feu.

13Ko ci shirikpa̱ka̱ yi baci kucina̱,

a̱yi wi a̱ kushirikpa̱ka̱ tsu ba,

adama a na u kunana ka̱ci ka̱ ni ba.

Vuza vu ulinga vu na Ka̱shile ku ushuki n a̱yi

14Ciɓaka yaba dem n ili i nam pa, ka̱ta̱ vu ɓarangu le n kula ku Ka̱shile a̱ ka̱sa̱kpa̱ kanananai a̱ ubuta̱ u kadanshi. Kanananai ka nan lo ka gaꞋan ba, adama a na ki ta̱ a kuvakangu aza a na a panai kaꞋa. 15YaꞋan ulinga ka̱u adama a na Ka̱shile ku ushuku n avu. Okpo vuza vu ulinga u singai, vuza vu na u kupana wono ba, vuza vu na kpamu u kupecuku kadanshi ka mayun ka̱ Ka̱shile derere. 16YaꞋan daꞋin n kadanshi ka kavama ka na ki a kucikpa Ka̱shile ba. Ili i nam pa i tsu zuwa ta̱ uma o goyo Ka̱shile. 17IcuꞋu i kadanshi i nam pa i tsu ka̱ra̱Ꞌa̱ ta̱ an kajakata ka na ka ci lyaꞋa ikyamba. Hamanaya n Filita o okpo ta̱ agisana a̱ icuꞋu i kadanshi i nam pa. 18Ele ɗa a̱ ka̱sa̱kpa̱i uye u mayun. Uma a nam pa a danai Ka̱shile ka̱ ɗengusa̱ tsu ta̱ ɗe a kasaun a̱tsu aza a na ci nekei a̱ɗu, nannai ɗa ta na ali ɗa a̱ la̱nga̱sa̱i uneki u ka̱ɗu u uma o yoku. 19Amma ili i mayun i Ka̱shile i tsu shamgba ta̱ n utsura an kenene ka katali n iɗani i nam pa: “Vuzavaguɗu u yeve ta̱ uma a na i a̱ ni,” ɗa kpamu a ɗanai, “Aza a na e yevei i ta̱ e kuɗeke kula ku Ka̱shile a̱ ka̱sa̱kpa̱ uye u kavama u le.”

20Punu a kpaꞋa ku gbayin, akpanu i ta̱ punu kakau, o yoku a yaꞋan ta̱ a ɗa n azanariya o yoku n azurufa, akpanu o yoku tamkpamu a yaꞋan ta̱ a ɗa nu nɗanga n ciꞋin. Akpanu a ikebe a ci yaꞋan ta̱ ulinga n a ɗa a ayin a̱ ka̱ɗiva̱ ku uzagbi, a na i babu ikebe a ci yaꞋanka ta̱ a ɗa ulinga u kupura̱ ka̱viri. 21Vu takpa baci ili i kavama a̱ ubuta̱ u wuma u nu, vi ta̱ o kokpo kakpanu ka na Ka̱shile ka kuyaꞋanka ulinga tsu na u cigai. Wuma u nu wi ta̱ o kokpo ciɗa, vi ta̱ kpamu o kokpo ufoɓushi mayin adama a na VuzakpaꞋa u yaꞋan ulinga n avu a̱ ubuta̱ wu ulinga u singai.

22YaꞋan daꞋin n ili i na i kutuka̱ n kusheshe ku a̱shawuya ku yakpa, amma vu tono ili i na i kuzuwa wu kuyaꞋan ili derere. Tono kuneke ku ka̱ɗu n ucigi m ma̱ta̱na̱, ka̱ta̱ vu pana uyoꞋo wa aza a na i e kuɗeke kula ku Vuzavaguɗu n a̱ɗu a ciɗa. 23N doku ta̱ kpamu n dana, ka̱ta̱ vu uwa a kuyaꞋan kanananai ka kavama ba, ka̱ta̱ kpamu a cina wu a kuyaꞋan kanananai n aza a na a̱ kpa̱ɗa̱i kuyeve ili ba. Adama a na ili i nam pa ya i tsu tuka̱ ta̱ n vishili. 24Ka̱ta̱ agbashi a Vuzavaguɗu a yaꞋan kanananai ba, amma o yongo m ma̱riki u uma dem. Ka̱ta̱ a fuɗa kuyotsongusu uma o yoku mayin, ka̱ta̱ kpamu e reme a̱ɗu a̱ ubuta̱ u uma a na i babu ma̱riki. 25O yotsongusu aza a na a iwain kadanshi ka mayun n ka̱ɗu ka̱ yuwu. U gaꞋan ba, Ka̱shile ki ta̱ a kusabaꞋa a̱ɗu a uma a nan lo, ka̱ta̱ ta na e neke a̱ɗu a̱ ubuta̱ u kadanshi ka mayun. 26Ayin a na lo, uma a i ta̱ a̱ kugita̱ kusheshe mayin ka̱ta̱ a laꞋaka a̱ ubuta̱ u maza ma Kalijani. Adama a na ali n gogo na Kalijani ka̱ ka̱na̱ le ta̱ an agbashi, wi ta̱ kpamu a kuzuwa le a yaꞋan ili i na u cigai dem.

Currently Selected:

2 Timoti 2: asgNT

Highlight

Copy

Compare