2 Timoti 1

Kuɓa̱yuwa̱

1Mpa ɗa Bulusu, vuzavusuki vu na Yesu Kirisiti Kishi u suki, adama a na ta Ka̱shile ka cigai wo okpo nannai. U yaꞋan ta̱ nannai adama a na n dana uma dem a na Ka̱shile ka yaꞋin uzuwakpani u kuneke wuma a̱ ubuta̱ u Yesu.

2Mi ta̱ a kuɗanaka wu Timoti, avu vu na vi maku mu ucigi ka̱u.

Ka̱shile Esheku a̱ tsu a ɗa, Yesu Kishi kpamu a̱yi ɗa Vuzagbayin vu tsu. Kusheshe ku va̱ ku ɗaɗa o yotsongu wu kasingai n asuvayali e le, ka̱ta̱ kpamu e neke wu wuma u ma̱ta̱na̱.

LyaꞋa kelime n kuneke ka̱ɗu

3N ci ciɓa wu ta̱ ayin tutu kanna n kayin dem mi baci a kuyaꞋan kavasa. Mi baci a kavasa n ci cikpa ta̱ Ka̱shile adama a̱ nu. Ka̱shile ka nam pa ka ɗaɗa mi a kuyaꞋanka tsugbashi n asuvu a singai uteku u na ikaya i va̱ i yaꞋin. 4N ciga ta̱ kudoku kene wu kpamu ka̱u, adama a na n ciɓa ta̱ a na vu shika̱i n kujilya ayin a na tsu pecemgbenei. Tsu gasa baci koɓolo kpamu mi ta̱ a kuyaꞋan ma̱za̱nga̱ ka̱u. 5N yeve ta̱ a na vu nekei ka̱ɗu mayun u Vuzagbayin, adama a na vu neke ta̱ ka̱ɗu uteku u na a̱na̱vu Afiniki u nekei ka̱ɗu, n uteku u na kpamu akaya a̱ nu vuka Losu u nekei ka̱ɗu feu. 6Adama a nannai n dana wu, yaꞋan ulinga ka̱u adama a na kuneꞋe ku na Ka̱shile ke nekei ku tsurakpa, ana n zuwakai nu ekiye. 7Adama a na Ka̱shile ka yaꞋan a̱ɗu a̱ tsu a pana wovon u uma ba, amma u neke tsu ta̱ a̱ɗu a utsura a na i tukpa nu ucigi, ɗa kpamu wi a̱ kuɓa̱nka̱ tsu tsu fuɗa tsu ka̱na̱ ka̱ci ka̱ tsu.

8Vu dana uma o yoku ukuna u Vuzagbayin ka̱ta̱ vu pana wovon wi ili i na uma a kudana adama a nan lo ba. Ka̱ta̱ feu vu pana wono u va̱ e keteshe a̱ ubuta̱ u uma adama a na a̱ ka̱na̱i mu adama a̱ Kishi ba. Amma n utsura u na Ka̱shile ke nekei nu, kucikpa vu soꞋo atakaci koɓolo nu mpa adama a Arabali a Singai. 9Ka̱shile ki isa tsu ta̱ ɗa u zagbai tsu ci yongo n wuma u ciɗa. M mani-mani kafu aduniyan a̱ gita̱ ɗa u sheshei kuyaꞋan nannai. U ciga ta̱ wo yotsongu ucigi u ni n kasingai wa̱ tsu a̱ ubuta̱ u Yesu Kishi. U zagba tsu adama a na ci yaꞋan ta̱ ili i ma̱riki i na i yawai u zagba tsu ba.

10Ka̱shile ka zuwa ta̱ ili i na mi a kadanshi yo okpoi uɓa̱yuwi e keteshe a ayin a na Yesu Kishi u ta̱wa̱i ɗa u koɗoi utsura wu ukpa̱, ɗa u yotsongi tsu uye u wuma u na wi babu uteku. A̱yi ɗa Kishi ka̱ tsu, ɗa kpamu Arabali a Singai a. 11Gogo na kpamu Ka̱shile ka zagba mu ta̱ n dana ili i nam pa. U zagba mu ta̱ mo okpo vuzavusuki, ɗa kpamu u zuwai mu mo okpo malum ma Arabali a Singai a nam pa. 12Adama a nannai ɗaɗa mi o kusoꞋo atakaci a̱ ubuta̱ wu ugbashi. Amma m pana wono ba, adama a na n yeve ta̱ vuza na n nekei ka̱ɗu, n yeve ta̱ kpamu wi ta̱ a kufuɗa wo foɓo ili i na n nekei ni, wi ta̱ kpamu o kufoɓo i ɗa ali sai kanna ka na u kubono.#1:12 Uye u yoku u kuyeve ili i na Bulusu u ɗanai u ɗaɗa “wi ta̱ a kufuɗa kula̱na̱ ili i na u nekei mu”. Na va ɗaɗa Kishi ke neke ta̱ Bulusu aza a na a isai Yesu usavu koɓolo n ulinga u Ka̱shile, gogo na a na Bulusu wi a ukuna u kukuwa̱, u neke ta̱ ka̱ɗu n ulinga u na u gita̱i u kulyaꞋa ta̱ kelime adama a na Kishi ka̱ kula̱na̱ ta̱ u ɗa.

13Reme gbam-gbam ili i na n yotsongushi nu, i ɗa yo okpo agisana o kuyotsongusu ku singai. Ka̱ta̱ kpamu vi ciɓa vi neke ka̱ɗu u Yesu Kishi ka̱ta̱ vi ciga uma adama a̱ ni. 14Ka̱ta̱ vi inda ili i na u nekei nu. Ayinviki a̱ Ka̱shile i ta̱ ida̱shi n a̱tsu, wi ta̱ a̱ kuɓa̱nka̱ wu vi yaꞋan ili i nam pa.

15Tsu na vi yevei, uma a̱ tsu a na i ɗe a iɗika i Asiya a̱ shirikpa̱ mu ta̱ kucina̱ ɗa a iwain kuɓa̱nka̱ mu, ali Fijala n Hamajana dem a yaꞋin nannai.

16N ciga ta̱ Ka̱shile ko yotsongu asuvayali a̱ ni a kubana u Unifara koɓolo n limata i ni ra̱ka̱, adama a na u tsu ta̱wa̱ ta̱ we ene mu ka̱ta̱ u doku mu utsura u ka̱ɗu. U pana wono ba ko a na mi ugbashi. 17Ana u ta̱wa̱i Roma,† u la̱nsa̱ ta̱ ubuta̱ dem sai ana we enei mu. 18Adama a nannai n ciga ta̱ Vuzagbayin u yotsongu yi asuvayali a kanna ka na Kishi u kubono. Avu feu vi yeve ta̱ a na Unifara u ɓa̱nka̱i mu a Afisu n a̱bunda̱i.

Currently Selected:

2 Timoti 1: asgNT

Highlight

Copy

Compare