Efeze Kete tënë na ndö ti Mbeti so Paul atokua na Eglize ti Efeze
Kete tënë na ndö ti Mbeti so Paul atokua na Eglize ti Efeze
Na sese ti Azii, so a iri ni laso Turkii, *a-Eglize ayeke ando daa mingi; azo ti Rome ayeke iri ni ando Azii. Mbeti so a tokua na Eglize ti Efeze so ayeke ndali ti a-Eglize ni kue. Paul laa asu mbeti so na ndembe so lo yeke na da ti kanga (3.1; 4.1). Azo so lo su mbeti ni na ala ayeke azuife pepe; me azo ti amara nde so ama na be na Christ. Mbeti ni abongbi atanga ti afango ye ti Paul so lo fa na ya ti a-Eglize ni so.
Kota tënë ti ya ti mbeti ni ayeke so: Nzapa aleke na be ti lo ti sara mbeni ye ndali ti dunia so nga ndali ti aye so kue lo sara na ya ti dunia ni, ataa na yayu wala na sese. Ye so lo leke na be ti lo ayeke daa ngu na ngu, me angba ando na hondengo ni. Jésus Christ laa asara si azo ahinga ni, lo sara si ye ni asi. Ye ni asara si azo aduti na beoko na popo ti ala, asara nga si beoko aduti na popo ti azo na Nzapa. Na ya ti ye so Nzapa aleke na be ti lo, tënë ti Eglize ayeke kota mingi. Tongana Paul ayeke tene tënë ti Eglize, andaa lo ye ti tene tënë ti aye so asi na ya ti a-Eglize nde nde; me aye ni ahon tënë ti Eglize ti ndo oko. Tongana Paul ayeke tene tënë ni, lo mu tapande ti tere ti zo na tapande ti da ti haka na Eglize. Eglize ayeke tongana tere ti Christ, tere ni ayeke kono lakue; Eglize ayeke tongana da so Christ wani laa ato nda ti lekengo ni; azo ti Christ angba ti leke da ni lakue. Beoko ti Christ na Eglize ayeke tongana beoko ti koli na wali, beoko ni ayeke tongana mbeni ye ti ndima.
Akota ye so ayeke na ya ti mbeti so:
Na kota gere 1 asi na 3, Paul asara tënë ti beoko ni ngangu mingi; azo awara lege ti duti na beoko, ngbanga ti so Jésus aka tere ti lo na kuâ na ndö ti keke ti kroa. Azo ti Christ kue, ataa ala yeke azuife wala azo ti amara nde, ala kue aga mara oko; ala yeke wara gi oko anzoni ye ti Nzapa so lo yeke mu na azo. Christ amingo tënë ti kengo tere na popo ti azo, lo sara si songo aga na popo ti azo so akangbi, lo sara si azo kue aduti na siriri.
Na kota gere 4 asi na 6, Paul amu wango na azo ti Christ ti sara ye na lege ti mabe, ti duti na beoko nga na siriri so Nzapa ayeke mu. Ayeke nzoni lege ti dutingo ti ala ayeke nde na ti azo ti siokpari. Na pekoni, lo mu awango na azo ti ya ti sewa (5.21 – 6.9). Titene zo ama ya ti awango ti Paul mbirimbiri, ayeke nzoni lo hinga lege ti dutingo ti azo ti ngoi ti Paul nzoni si. Azo ti ngoi ni abaa ti ala atene, ayeke nzoni awali ama yanga ti akoli ti ala, akoli ayeke amakonzi ti awali ti ala. Paul asara tënë mingi na akoli, lo tene: tongana akoli ayeke amakonzi, alingbi ala sara ye tongana ti Christ so amu fini ti lo ndali ti azo. So ayeke lani fini tënë ndali ti akoli ti ye awali ti ala tongaso (5.25-33). Na ngoi ni so, so ayeke nga fini tënë ti tene na akota zo so mbeni makonzi ayeke na ndö ti ala, lo yeke na yayu.
Currently Selected:
Efeze Kete tënë na ndö ti Mbeti so Paul atokua na Eglize ti Efeze: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010