Salmo 42
42
Ikalawang Aklat
Salmo 42–72
Salmo 42
Para sa direktor ng mga mang-aawit: Isang maskil ng mga anak ni Kora.
1Tulad ng usang sa tubig ng ilog
ay nasasabik,
O Diyos, ako sa inyoʼy nananabik.
2Akoʼy nauuhaw sa inyo, Diyos na buháy.
Kailan pa kaya ako makakatayo
sa presensya nʼyo?
3Araw-gabiʼy luha ko lang ang aking pagkain,
habang sinasabi sa akin
ng aking mga kaaway,
“Nasaan na ang Diyos mo?”
4Sumasama ang loob ko kapag naaalala ko
na dati ay pinangungunahan ko
ang maraming tao
na pumupunta sa bahay ng Diyos.
At kami ay nagdiriwang,
sumisigaw sa kagalakan
at nagpapasalamat sa inyo.
5Bakit nga ba ako nalulungkot at nababagabag?
Dapat magtiwala ako sa inyo.
Pupurihin ko kayong muli,
aking Diyos at Tagapagligtas!
6-7Nanghihina ang loob ko.
Akoʼy parang tinabunan nʼyo ng malalaking alon,
na umuugong na parang tubig sa talon.
Kaya dito ko muna kayo inaalala
sa paligid ng Ilog Jordan at Hermon,
sa Bundok ng Mizar.
8Sa araw, Panginoon, ipinapakita nʼyo
ang inyong pag-ibig.
Kaya sa gabi, umaawit ako
ng aking dalangin sa inyo,
O Diyos na nagbigay ng buhay ko.
9O Diyos, na aking batong kanlungan,
akoʼy nagtatanong,
“Bakit nʼyo ako kinalimutan?
Bakit kinakailangan pang magdusa ako
sa pang-aapi ng aking mga kaaway?”
10Para bang tumatagos na
sa aking mga buto
ang pang-iinsulto ng aking mga kaaway.
Patuloy nilang sinasabi,
“Nasaan na ang Diyos mo?”
11Bakit nga ba ako nalulungkot
at nababagabag?
Dapat magtiwala ako sa inyo.
Pupurihin ko kayong muli,
aking Diyos at Tagapagligtas!
Currently Selected:
Salmo 42: ASD
Highlight
Copy
Compare
Share
Want to have your highlights saved across all your devices? Sign up or sign in
Biblica® Open Ang Salita ng Diyos™
Karapatang-sipi © 2009, 2011, 2014, 2025 ng Biblica, Inc.
Biblica® Open Tagalog Contemporary Bible™
Copyright © 2009, 2011, 2014, 2025 by Biblica, Inc.
Ang “Biblica” ay ang tatak-pangkalakal na nakarehistro sa Biblica, Inc. sa United States Patent at Trademark Office.
Ginamit nang may pahintulot.
“Biblica” is a trademark registered in the United States Patent and Trademark Office by Biblica, Inc.
Used with permission.
Mga Awit 42
42
IKALAWANG AKLAT
(Mga Awit 42—72)
Panaghoy ng Isang Dinalang-bihag
Isang Maskil#MASKIL: Tingnan ang Awit 32. ng angkan ni Korah, upang awitin ng Punong Mang-aawit.
1Kung paanong batis ang siyang hanap ng isang usa;
gayon hinahanap ang Diyos ng uhaw kong kaluluwa.
2Nananabik ako sa Diyos, sa Diyos na buháy, walang iba;
kailan kaya maaaring sa presensya mo'y sumamba?
3Araw-gabi'y tumataghoy, gabi't araw tumatangis;
naging tanging pagkain ko'y mga luha sa paghibik.
Itong mga kaaway ko, sa tuwina'y yaong sambit,
“Nasaan ba ang iyong Diyos? Hindi namin namamasid.”
4Nagdurugo ang puso ko, kapag aking maalala
ang lumipas na kahapong lagi kaming sama-sama,
papunta sa templo ng Diyos na ako ang nangunguna;
pinupuri namin ang Diyos sa pag-awit na masaya!
5Bakit ako nanlulumo, bakit ako nagdaramdam?
Sa Diyos ako may tiwala, siyang aking aasahan;
Diyos na Tagapagligtas, muli ko siyang aawitan.
6Siya ay gugunitain ng puso kong tigib-hirap,
habang ako'y nasa Jordan, sa Hermon, at sa Mizar
di ko siya malilimot, gugunitain oras-oras.
7Ang dagat na kalaliman pakinggan at umuugong,
at doon ay maririnig, lagaslas ng mga talon;
ang katulad: nagagalit, malalaking mga alon,
na sa aking kaluluwa ay ganap na tumatabon.
8Nawa ang pag-ibig ni Yahweh ay mahayag araw-araw,
gabi-gabi siya nawa'y purihin ko at awitan;
dadalangin ako sa Diyos, na sa aki'y bumubuhay.
9Sa Diyos na sanggalang ko ganito ang aking wika,
“Bakit ako ay nilimot, nilimot mo akong kusa?
Bakit ako nagdurusa sa kamay ng masasama?”
10Kalooban ko'y nanghihina sa pagkutya ng kalaban,
habang sila'y nagtatanong,
“Ang Diyos mo ba ay nasaan?”
11Bakit ako nalulungkot, bakit ako nagdaramdam?
Sa Diyos ako'y may tiwala, siyang aking aasahan;
magpupuri akong muli, pupurihing walang humpay,
ang aking Tagapagligtas, ang Diyos na walang hanggan.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2005 Philippine Bible Society