Ioni 1
1
Pai Vi‑putu
Yawai Ana Vona Vi‑tomotau
1Naona Vona mamaei, e Vonana Yaubada nui imamaei, kadu Vonana vivane Yaubada.#Ioni 17:5; 1Io 1:1-2; SiV 19:13. 2Naona Vonana Yaubada nui imamaei.
3Dewa habuhabuna Vonana wayahina ivin'‑omo, ka aituhu Vonana eha, dewa habuhabuna eha.#1Ko 8:6; Kol 1:16-17; Ebe 1:2. 4Yawai‑hoina Vonana nihenina mamaei, ka yawai‑nana Maheta veneka.#Ioni 5:26. 5Kadu Maheta‑nana novanovana nihenina tapa‑yayai, kate novanovana eha ana pata Maheta‑nana na‑weu.#Ioni 3:19.
Yaubada Ioni Tau Bapitaiso Vi‑tunei
6Ka Yaubada onoto aitam vi‑tunei, ana wava Ioni.#Mat 3:1; Luk 1:13-17, 76. 7Tauna aitam tau hae Maheta wayahina, ka omo tomotau hae‑nana inononi, e munia Maheta‑nana ivitumahanei. 8Ka Ioni eha Maheta‑nana, kate Ioni omo vi‑tau hae Maheta‑nana wayahina. 9Ka tuta‑nana wayahina, Maheta‑ohota a vin'‑omo tanopia avaha vi‑maupwanina. Ka tauna habuhabuka vo‑vi‑maheteka.#Ioni 8:12.
10Vonana avaha omo tanopia, ka tanopia mamaei. Ka tanopi‑nana a vevewana vin'‑omo Vonana wayahina, kate tau ma' tanopi eha it'‑anamane tauna koiaka. 11Ka kadu tauna omo yana yoko wayahia, kate taui eha ita‑nau‑kaiwe. 12Kate aituhu aviyaivia inau‑kaiwei kadu ivitumahanei vivane tauna Tau Ito‑yavuha‑nana, akanai tauna awaehei taui Yaubada natunatuna. 13Iuna taui itupua‑havine, ka tupua‑havinena eha ta‑vin'‑omo tomotau dayahi wayahina, kadu eha ta‑vin'‑omo tomotau yai nuanua wayahina, ka kadu eha ta‑vin'‑omo onoto ya bagibagi wayahina. Eha‑ohota. Tupua‑havine‑nana vin'‑omo Yaubada wayahina.#Ioni 3:3-6; Ioni 2:11; 1Pi 1:23.
14Ka Vonana vi‑tomotau, ka nonova itoai nui amamaei. Yaubada didigana Natu‑hoina vene‑tamani, ka itoai avaha didigana adueyei. Ka am‑venena awawaehina kadu vona‑vavaha Vonana inau‑vi‑anai.#Pili 2:7.
15Ka Ioni Vonana haeyei, ka vi‑hone movina ananina wayahina, ka ivona, “Onoto‑nana wayahina avonavona tutana ahaeyei, ‘Vivane aitam onoto muniua omomo, kate tauna vane‑tawaneu, iuna tauna avaha mamaei, ka munia yauke atupua aomo.’”
16Ka tauna yan' am‑venena awawaehina ananina wayahina nau‑iaiava ivin'‑omo‑nananena, ka itoka tomotau habuhabuka avaha kavaniahei. 17Iuna Yaubada ya veimea vin'‑omo wayahikaia Mosese wayahina. Kate Yaubada yan' am‑venena awawaehina kadu ya vona‑vavaha vin'‑omo wayahikaia Iesu Tau Ito‑yavuha wayahina.#NiT 34:28; Rom 6:14. 18Ka eha aitam koiaka Yaubada ana dune ta‑dueye, kate Natu‑hoina, tauna nau‑vana Amana madina wayahina, avaha Yaubada viwaveneka.#NiT 33:20; Ioni 6:46; 1Ti 6:16.
Ioni Tau Bapitaiso Yana Hae
(Mateu 3:1‐12; Marika 1:1‐8; Luke 3:15‐17)
19Ka me Iudea yai tau eta‑naonao Ierusalem nihenina imamaei. Ka tutana Ioni vi‑putu naunau‑wahe, taui tau vi‑nomu tupwai, kadu Levi yana yoko tupwai ivi‑tunei iomo Ioni wayahina, e ivi‑tanaiei, “Wamke koiaka?”#1:19 Levi aitam dede me Isiraeli nihenina, ka nonova Yaubada Levi yana dede vi‑nua‑dadanei, taui ai heta ivi‑tau paisewa ya Manua Vito‑pota nihenina.
20Ka Ioni nau‑pata ahiahina kadu mahemaheina venei, ivona, “Yauke eha Tau Ito‑yavuha‑nana.”
21Wayahina, ivi‑tanaiei, ivona, “Aituhu deina, koiaka wamke? Kaiwadi, wamke vivane Elidia, tauna na‑omo, ika?”
Ka ivona, “Yauke eha.”
Kadu ivi‑tanaiei, “Kadi wamke Tau Apa‑taputapu‑nana, tauna wayahina Mosese vonavona?”
Ka Ioni vona‑nau‑pata, ivona, “Yauke eha.”#V.V 18:15, 18; Mat 11:14.
22Wayahina, pai nau‑yehata ivi‑tanaiei, ivona, “Kaiwadi, wamke koiaka? Aviani yam vona taum wayahim, e itoai ama pata amavina, e ama tau vi‑tune amataedai?”
23Wayahina, Ioni yai vi‑tanai‑nana nau‑patei, e si‑vin'‑omanei tau apa‑taputapu ana wava Isaia ya iginuma wayahina, ivona, “Yauke aitam onoto anata nihenina avi‑honehone, avonavona,
‘Nau‑wawanimi Kauvea ya etawana uhadani,
kadu tauna ya paisewa uvo‑vi‑meani.’
Wayahina, nau‑wawanimi yawaimi uvo‑vi‑tunuhi, e apaina Kauvea ya mataeda unononi.”#Isa 40:3.
24Ka tau eta‑naonao tupwai Parisi ivi‑tunei iomo, 25ka Parisi‑naia Ioni ivi‑tanai‑havinei, ivona, “Aituhu wamke eha Tau Ito‑yavuha‑nana, kadi wamke eha Elidia, kadi wamke eha Tau Apa‑taputapu‑nana, akanai mehenai tomotau evi‑bapitaisoei?”
26Ka Ioni vonei, ivona, “Yauke daudaua tomotau avi‑bapitaiso‑neiei, kate tuta ataina wayahina aitam onoto niwanimia mimini, ka eha ut'‑anamane. 27Ka tauna muniua omomo, kate yauke eha nau‑wawaniu an' ae‑yapayapa ayavuhi, iuna tauna vane‑tawaneu.”#Ioni 1:15.
28Dewaia tanoi habuhabui ivin'‑omo papani Betani wayahina.#1:28 Meagai ainua ai wava Betani imamaei. Aitam meagai Ierusalem nepena ana wava Betani. Tanoi wayahina Lasarusi ya meagai. Ka kadu aitam meagai kikituna anata nepena ana wava Betani. Nonova aituhu Ierusalem kani‑tawanei, e Daudau Ioridani kaubo‑tamani, e aituhu kana‑nei anata, tanoi kavaniahei. Tanoi wayahina Ioni Tau Bapitaiso naunau‑wahe kadu tomotau vi‑bapitaiso‑neiei. Tanoi Ioni ya pai vi‑bapitaiso Ierusalem papanina Daudau Ioridani wayahina.
Yaubada Yana LamiV
29Mana navia Ioni Iesu dueyei omomo wayahina, e Ioni tomotau vonei, ivona “Udu! Onoto tanoi, tauna Yaubada yana LamiV, ka tauna tau ma' tanopi habuhabuka yaka goyona habuhabuna n'‑epa‑yavunei yan' aniga wayahina.#Isa 53:6-7; 1Pi 1:18-19. 30Nonova onoto‑nana wayahina avonavona, tutana avonemi vivane, ‘Onoto aitamoata muniua omomo, kate tauna vane‑tawaneu, iuna tauna avaha mamaei, e munia atupua aomo.’#Ioni 1:15. 31Ka nonova, auyewana wayahina, yauke eha at'‑anamane koiaka tauna. Tanoi yauke itomi me Isiraeli avo‑vi‑aiaiemi, kadu daudaua avi‑bapitaisoemi. Ka ataina nau‑wawanimi tauna un'‑anamanei.”
32Ka hae‑nana wayahina Ioni Iesu haeyei, ivona, “Yaubada Nuana Ahihinata adueyei ana dune bunebune deina wahuma opu‑me, e Iesu wayahina itoha mamaei.#Mat 3:16. 33Nonova eha at'‑anamane koiaka tauna, ka Yaubada vi‑tuneu bapitaiso daudaua adedewei, e wayahiua haeyei, ivona, ‘Apaina Nuau edueyei na‑opu‑me, ka onoto wayahina na‑toha, ka apaina tauna Yaubada Nuana Ahihinata wayahina tomotau vi‑bapitaiso‑neiei.’” 34Ka Ioni kadu vonei, ivona, “Yauke mataua dewana adueyei, wayahina ahaehaeyei vivane tauna Yaubada Natu‑hoina.”#Mat 3:17.
Iesu A Tau Vi‑muni‑waiwai Naona
35Ka mana navia, e Ioni tauna a tau vi‑muni‑waiwai ainua nui imimini, ka Iesu dueyei nepeia neine. 36Wayahina, Ioni tauna a tau vi‑muni‑waiwai vonei, ivona, “Onoto tanoi tauna Yaubada yana LamiV.”#Ioni 1:29.
37Ka a tau vi‑muni‑waiwai ainua, avaha Ioni ya vonana inononi, ivi‑putu Iesu ivi‑muniei.
38Ka Iesu magigino, dueyei, e vi‑tanaiei, ivona, “Aviani yami nuanua?”
Ka taui ivona, “RabiV, aveta yam pai ma'?” (RabiV an' anamana “yau tau viwavenena ananina”.)
39Ka Iesu vonei, ivona, “Uvi‑munieu, e yau pai ma' udueyei.” Akaka auyewana ivi‑muniei, e ivin'‑omo papani‑nana wayahina, e imamaei vinanavi.
40Ka aitam Ioni a tau vi‑muni‑waiwai ainuai ana wava Aniduru. Tauna Simoni Pita taina.#Mat 4:18-20. 41Ka Aniduru vo‑kwayavoni, e avaha akana vaniahei, vonei, ivona, “Simoni, avaha Mesaia‑nanaV avaniahei.” (MesaiaV me Ebereu movi. A vo‑vina me Girisi movia KerisoV, ka an' anamana “Tau Ito‑yavuha”.) 42Wayahina, Aniduru Simoni taini omanei Iesu wayahina. Ka tanoi wayahina Iesu Simoni dueyei, e vonei, ivona, “Wamke am wava Simoni, Ioni natuna. Kate am wava vovouna avenem KepasiV.” (KepasiV me Ebereu movi. A vo‑vina me Girisi movia PitaV, ka an' anamana “Hanu”.)#Mat 16:18.
43Ka mana navia Iesu ya nuanua na‑nei papani Galili, wayahina ine, e tanoi onoto ana wava Pilipi vaniahei, e vonei, ivona, “Evi‑muni‑waiwaieu.”
44Ka Pilipi ya meagai Betesaida, tanoi Pita ka Aniduru yai meagai. 45E Pilipi ine, e tauna a niam ana wava Natanaela vaniahei, e vonei, ivona, “Avaha onotona avaniahei, e nonova tauna wayahina Mosese ya veimea nihenina ginumi, kadu tau apa‑taputapu yai iginuma nihenia ihaehaeyei, tauna onoto Nasareta, Iosepa natuna, ana wava Iesu.”#V.V 18:18; Isa 7:14; 9:6; Ier 23:5; Ese 34:23.
46Ka Natanaela Pilipi ya vonana vona‑nau‑patei, ivona, “Kaiwadi. Ana pata aitam aviani na‑ivaiteka Nasareta wayahina vin'‑omo?”
Ka Pilipi ivona, “En'‑omo, ka onotona edueyei.” Ka ainuai iomo Iesu wayahina.
47Ka tutana Iesu Natanaela dueyei, Iesu tomotaui awaniana imimini vonei Natanaela wayahina, ivona, “Vona‑vavaha, onoto taina aitam me Isiraeli‑hoina, kadu eha aitam vitupu nihenina.”
48Ka Natanaela Iesu vi‑tanaiei, ivona, “Medeina eanamaneu?” Ka Iesu ivona, “Yauke amai‑dueyem madaiba iwaunina emamaei, e munia Pilipi honem.”
49Aina wayahina Natanaela nuana vi‑tupatupa, e tauna Iesu vonei, ivona, “Tau Viwavenena, vona ahiahina, wamke Yaubada Natu‑hoina, ka wamke kadu me Isiraeli yama kiniV.”#Mat 14:33; 16:16; Mar 3:11.
50Ka Iesu vonei, “Ana heta avonem tutana wamke madaiba iwaunina adueyem, e moviuata evitumahaneu? Ataina tuta pai dune aya‑kituna wayahima, ka apaina dewa anani edueyei.” 51E Iesu kadu ivona, “Memeanina nuami vi‑tupatupa, kate avonemi apaina wahuma n'‑am‑waei, e Yaubada yan' anelose udueyei, ivanevane ka iopupu‑me yauke, Tauna Vi‑tomotau, hetaua.”#Nao 28:12.
Currently Selected:
Ioni 1: MVN
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.