Mateu 2
2
Tau Nua‑uya Wayahi
1Tutana Iesu tupua meagai Betelehem nihenina, KiniV Erodi papani Iudea veimeyei. Ka tuta‑nana wayahina tau nua‑uya tupwai yai papani ponimanea ini‑tawanei iomo meagai Ierusalem wayahina, e taui me Ierusalem ivi‑tanatanaiei, 2ivona, “Itomi me Iudea yami kiniV vovouna aveta? Anamanei avaha tupua, iuna tauna a wadima vin'‑omo adueyei papani ponimanea. Wayahina, aomo ana‑iwaodu wayahina.”#Yau 24:17.
3Ka KiniV Erodi yai vonaia nononi, e ateatena viviha, ka kadu me Ierusalem yoko ateatei viviha vonaia wayahia. 4Wayahina, Erodi me Iudea yai tau vi‑nomu mata‑genai, kadu veimea a tau viwavenena hone‑hohoni, e wayahia vi‑tanai, ivona, “Aveta baina Tau Ito‑yavuha‑nana ya tupua?” 5Ka taui ivona, “Meagai Betelehem nihenina, aina papani Iudea nihenina, ka tau apa‑taputapu yana hae Iginuma nihenina deina, ivona,
6‘Apaina, Betelehem wayahina me Isiraeli
ai tau veimea vin'‑omo.
Tauna yau tomotau ai tau dune‑vi‑avina,
sipiV ai tau dune‑vi‑avina deina.
Aina wayahina, Betelehem meagai kaikaiwabona
ka ana wava eha kikituna papani Iudea
meagaina habuhabui wayahia.’”#Mik 5:2; Ioni 7:42.
7Wayahina, Erodi tau nua‑uya‑naia hone‑hivahivai, e vi‑tanaiei avi tuta wadima‑nana vin'‑omana vovou. 8Ka Erodi, avaha yai nau‑pata nononi, veimeyei, ivona, “Una‑ne Betelehem wayahina, e tevana taina unene‑vidovidohei. Ka avi tuta uvaniahei, umavina umataedau, e yauke kadu ana‑ne, ana‑iwaodu wayahina.”
9Ka kini‑nanaV ya vonana tau nua‑uya‑naia wayahia iakwa, e taui ine. Ka wadima‑nana, nonova ponimanea idudueyei mataia, ivi‑muniei, e papanina wadima‑nana ivane v'‑ito‑matani, ka tenoke ine, e tevanana ivaniahei mamaei. 10Ka wadima‑nana wayahina tau nua‑uya‑naia idewa‑haiawa ani‑vainena. 11Ka manua inui, e tevanana ayona Mari nui idueyei, e aei ivi‑tupa‑gumi tevanana wayahina, e iaiwaodu wayahina. Ka yai pai vi‑ai iwaei, e am‑venena‑kavovo patana ani‑vainena ivitua‑neiei, iomanei, e tevanina venei, aina goulaV, ka pai mau ahiahina ana wava libanosiV, ka kadu aitam pai mau ahiahina ana wava muroV.#Sam 72:10-15; Isa 60:6.
12Ka munia, avea Yaubada tau nua‑uya‑naia mataedai eha Erodi wayahina imavina. Wayahina, imini, ka mani etawana wayahina imavina yai papani wayahina.
Inovo Papani Egipita Wayahina
13Ka avaha tau nua‑uya‑naia ini‑tawanei, akanai aitam anelose Kauvea wayahina avea Iosepa wayahina vin'‑omo, e mataedei ivona, “Emini, ka tevana ayona nui etaini enovoei papani Egipita wayahina, e tenoke umamaei a itoava amataedam baina umavina wayahina. Yami novo taina nau‑wawanimi, iuna mosikuna Erodi tevana taina nenei na‑nau‑vi‑anigi.”
14Akaka ioyoma‑nana nihenina Iosepa mini, e tevana ayona nui taini neiei papani Egipita wayahina. 15Ka Egipita nihenina imamaei a itoava Erodi aniga wayahina. Iakwa, e imavina ka yai mavina vin'‑omo Kauvea yana vona Iginuma nihenina deina. Aitam tau apa‑taputapu mai‑haeyei ivona,
“Egipita wayahina natu ahone‑taitaini.”#Ose 11:1.
Erodi Yaheyahe Nau‑vi‑anigi‑neiei
16Ka Erodi tau nua‑uya‑naia pota‑wayohei. Ka tutana anamanei taui eha imavina, iuna yai nua‑uya tauna ya vitupu vane‑tawanei, tauna nua‑goyo ani‑vainena. Ka ya veimea boui, e tau vi‑naua vi‑tunei ine meagai Betelehem wayahina, ka kadu ine meagai aitamoata aitamoata Betelehem awaniana wayahia, ka yaheyahe ononotoi taui ai ponimana ainua wayahina opu‑me ina‑nau‑vi‑anigi‑neiei. Erodi ya veimea boui deina, iuna tau nua‑uya‑naia yai vona wayahina Tau Ito‑yavuha ya tupua wayahina. 17Ka dewana vin'‑omo tau apa‑taputapu ana wava Ieremia nonova mai‑haeyei deina, ivona,
18“Vi‑vonavona‑vaine kanononi
meagai Rama wayahina vin'‑omo,
vivane ivi‑mohai ananina
kadu na mata‑inui ivi‑vonevoneyei.
Rakeli yai tete ivi‑mohai
ka yai vi‑mohai eha ta‑biga,
iuna natunatui avaha ianiga.”#Ier 31:15; Nao 35:19.
Egipita Ini‑tawanei, Imavina Yai Papani Wayahina
19Erodi yan' aniga munina, Kauvea yan' anelose vin'‑omo Iosepa wayahina tutana tauna Egipita nihenina mamaei, ka avea vonei, 20ivona, “Iosepa, emini, ka tevana ayona nui etaini, umavina papani Isiraeli wayahina. Iuna tevana a ginibaina avaha aniga.” 21Wayahina, Iosepa mini, e tevana ayona nui taini, imavina ine Isiraeli. 22Ka tutana imavina iomo, Iosepa aitam vane nononi vivane Erodi natuna, ana wava Arekelausi, amana vi‑nau‑seani, e vi‑tau veimea papani Iudea nihenina. Akaka Iosepa matauta, ka eha nuanuana na‑vane papani Iudea wayahina. Ka Yaubada anamana venei avea, e Iosepa tutu‑vivina, ka ine papani Galili wayahina. 23Ka meagai Nasareta nihenina vi‑meagaiei. Ka dewana tau apa‑taputapu yai hae nau‑yehai, vivane, “Tauna ivi‑wahani me Nasareta aitam.”#2:23 Tuta ataina avi iginuma o avi apa‑taputapu Mateu nuanua wayahina tutana tauna mataina taina ginumi eha kat'‑anamane‑vidoha. Kate vona Nasareta me Ebereu movia a nonona vona wahana deina. #Isa 11:1; 53:2; Luk 2:39; Ioni 1:45.
Currently Selected:
Mateu 2: MVN
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.