Juan 1
MBSNT

Juan 1

1
Migpekeotaw se Kagi te Timanem
1Gebii te wedà pa inangi se keneyonan, tapay sikandin doen iningedanan Kagi te Timanem. Sikandin se doma te Timanem, aw sikandin heman se ontò Timanem. 2Lekat te ketebò te kedita, sikandin se doma te Timanem. 3Wedad palos ininang aw kenà pineokit kandin, so ininang te Timanem se kedita pineokit kandin. 4Sikandin se eglekatan te pedowan te kedita, aw yan se lowa eg-anyag diyà te kengitngit kidoen te pedowan te kedita te otaw. 5Yan heman se mekelowa te kengitngit. Wedà palos pekedaeg se kengitngit diyà te lowa sìyan.
6Doen otaw ngadan din si Juan Memonyagay. Insogò sikandin te Timanem 7meg-indan diyà te kedita te otaw te si Jesus se lowa te Timanem, amon memenal se kedita te otaw diyà ki Jesus pineokit te itoladà din. 8Kenà si Juan se lowa, meneng sikandin se insogò amon meg-indan tepad te lowa. 9Se benal lowa, yan se dimini te keneyonan amon mekelowa te kengitngit kidoen te pedowan te kedita te otaw.
10Dimini si Jesus te keneyonan, meneng pengkey ininang te Timanem se kedita dini te keneyonan pineokit kandin, wedà sikandin kilelai te menge otaw. 11Pengkey dimoton te ogpeanan te kandin kedomaan, meneng wedà dan pegsagman kandin. 12Meneng pengkey sinu se migsagman kandin aw nemenal kandin, yan se otaw mepakay meinang menge batà te Timanem. 13Pegkeinang dan batà te Timanem, kenà iyan iling te pegtebaw te otaw dini te keneyonan. Kenà iyan heman lekat te ibeg aw aneng-aneng te otaw. Meneng lekat te ibeg te Timanem, ininang din dan menge batà din.
14Migpekeotaw sikandin iningedanan Kagi te Timanem, aw mig-ogpà sikandin doma kenami. Kinità day se kelangkaw din. Ontò sikandin melangkaw so sikandin se temisa Batà te Amay din. Ontò sikandin egpenabang, aw ontò benal se kagi din. 15Sikandin se in-indan i Juan Memonyagay te peg-ikagi din, “Seini se otaw tapay ko in-indan kenyo, so minikagi a te doen pa otaw meketetondog kanak aw somelilin kanak. Labi pa sikandin melangkaw diyà kanak, so tapay den sikandin doen te wedà a pa tebaw.”
16Ontò kidon din neidowan, aw gayed kidon din egtebangan te wedad temanan. 17Nemegay se Timanem kenitadon te punù din pineokit ki Moises. Meneng pineokit ki Jesu Cristo, nemegay se Timanem kenitadon te tabang din aw kebenalan. 18Wedad palos otaw kimità te Timanem. Meneng se Batà din temisa, yan se migpetaga-taga diyà kenitadon tepad te Amay din, so gayed dan egpedomaay.
Kenà Misiyas si Juan Memonyagay
Juan 1:19-28; Mat. 3:1-12; Mar. 1:1-8; Luc. 3:1-18
19,20Doen menge pengolo te simbahan te Judiyo aw menge bowad-bowad i Levi dimoton ki Juan Memonyagay. Insogò dan te menge obanen te Judiyo lekat te Jerusalem amon meg-insà dan ki Juan aw sinu sikandin. Seini se inikagi i Juan, so wedà din boloni se kebenalan, meneng timaba sikandin, kagi din, “Kenà ko se Misiyas megpelowà kenyo.”
21Mig-insà dan, “Sinu ka lay? Si Elias ka lay?”
Timaba si Juan, “Kenà ko.”
Minikagi dan, “Sikona besi se sìyan doma telekeliwat te kagi te Timanem pinelimanan day.”
Timaba sikandin, “Kenà ko.”
22Todà dan minikagi, “Indani kay aw sinu ka, amon doen itaba day diyà te menge otaw simogò kenami. Eden lay se inangen no dini?”
23Timaba si Juan, “Siak se otaw impakang te telekeliwat te kagi te Timanem gebii si Isaias,
‘Doen otaw kidoen te kebigtilan megpunù te keilangan meketagad se kedita te otaw, so agpet den domateng se Pengolo.’”
24Se menge otaw mig-insà kandin, yan se insogò te menge Parisiyo. 25Mig-insà dan heman, “Aw kenà nikaw se Misiyas megpelowà kenami, aw kenà nikaw heman si Elias limikò dini, aw kenà nikaw heman se sìyan doma telekeliwat te kagi te Timanem egpelimanan day, nengà lay egpemonyag ka?”
26Timaba si Juan, “Egpemonyag a pineokit te wayeg. Meneng doen sebad otaw doma niyo wedà niyo kilelai. 27Sikandin se meketetondog aw somelilin kanak. Kenà botong se kelangkaw ko amon megtelaban a kandin pengkey meglebad a te sepatos din, so ontò sikandin melangkaw diyà kanak.”
28Neinang se kedita niyan kidoen te lonsod te Bitanya doton dipag te wayeg te Jordan egbonyagan i Juan.
Si Jesus se Nati te Karniro imbegay te Timanem
Juan 1:29-34; Mat. 3:13-17; Mar. 1:9-11; Luc. 3:21-22
29Keeldawan niyan, kinità i Juan si Jesus migpesalo diyà kandin. Pegkità din kandin, minikagi diyà te menge otaw kidoen, “Na, yan se Nati te Karniro imbegay te Timanem, so sikandin se mengabat te salà te kedita te otaw. 30Seini se otaw tapay ko in-indan kenyo, so minikagi a te doen pa otaw meketetondog aw somelilin kanak. Labi pa sikandin melangkaw diyà kanak, so tapay den sikandin doen te wedà a pa tebaw. 31Kedengan, wedà ko pa ketegahi aw sinu sikandin, meneng yan se tod te pegbonyag ko pineokit te wayeg amon metaga-taga se kedita niyo bowad-bowad i Israel tepad te pegdateng din.”
32Minikagi heman si Juan, “Kinità ko se Espiritu Santo migpedanà diyà kandin lekat te langit iling te selepati, aw mig-ogpà kidoen kandin. 33Kedengan, wedà ko pa ketegahi aw sinu sikandin, meneng insogò a te Timanem amon memonyag a pineokit te wayeg, aw inindanan a din te komità a te Espiritu Santo megpedanà kidoen te otaw aw meg-ogpà kandin. Sebad heman kemolò se pegbonyag din, so sikandin se memonyag pineokit te Espiritu Santo. 34Yan se kinità ko den, aw iindan ko den kenyo te sikandin se Batà te Timanem.”
Menge monà tinoledaan i Jesus
35Keeldawan niyan, kimidoen heman todà si Juan Memonyagay sipat dowa tinoledaan din. 36Pegkità din te peg-okit i Jesus kidoen, minikagi sikandin, “Na, yan se Nati te Karniro imbegay te Timanem.”
37Pegdineg te dowa tinoledaan din kenyan, timaking dan ki Jesus. 38Pegbiling i Jesus, kinità din te timaking dan kandin, aw mig-insà, “Eden lay se pinengemahà niyo?”
Timaba dan, “Rabi.” (Se kelebadan niyan, “Menenoladà.”) “Kenan ka lay peg-ogpà?”
39Minikagi si Jesus, “Taking kaw kanak amon kitaen niyo.”
Yan timaking dan kandin, aw kinità dan se eg-ogpaan din. Miglegeana dan kandin lekat te menge alas kwatro te meapon lamig delem.
40Si Andres se sebad diyà te didowa dan dimineg ki Juan aw timaking ki Jesus. Telekedowa dan si Andres aw si Simon, se doma ngadan din si Pedro. 41Pegketà nengemahà si Andres te kakay din si Simon, aw minikagi sikandin, “Kinità day se Misiyas.” (Se kedegdagan niyan, “Cristo.”)
42Impetaking din se kakay din doton ki Jesus. Pegkità i Jesus kandin, minikagi, “Sikona si Simon, batà i Juan. Meneng ingedanan ka ki Cefas.” (Onawa se kelebadan te ngadan Cefas aw Pedro, yan se kagi “Bato.”)
Timaking si Felipe aw si Natanael ki Jesus
43,44Keeldawan niyan, migpetagad si Jesus domoton te probinsya te Galiliya. Onà din pinengemahà si Felipe tege Bitsayda. Yan heman se lonsod eg-ogpaan i Andres aw si Pedro. Pegkità i Jesus ki Felipe, minikagi sikandin, “Taking ka kanak.”
45Penga niyan, nengemahà si Felipe ki Natanael aw minikagi, “Kinità day se otaw impakang i Moises aw menge doma telekeliwat te kagi te Timanem te pegsolat dan gebii. Yan se tege Nasarit si Jesus, batà i Jose.”
46Minikagi si Natanael, “Wedad palos mèpiya lekat te Nasarit.”
Minikagi si Felipe, “Ayas ka amon komità ka kandin.”
47Pegdateng dan doton, minikagi si Jesus tepad ki Natanael, “Na, yan se benal bowad-bowad i Israel, so wedad palos ipegbolon din.”
48Minikagi si Natanael, “Nemeno lay se pegketaga-taga no kanak?”
Minikagi si Jesus, “Te wedà ka pa engayi i Felipe, tapay ta kinità kidoen te kayo igira.”
49Minikagi si Natanael, “Sir, sikona se ontò Batà te Timanem. Ontò sikona se selotan impakang amon lomowan diyà kenami menge bowad-bowad i Israel.”
50Minikagi si Jesus, “Nemenal ka den so minikagi a olò te kinità ta kidoen te kayo igira. Meneng komità ka kwani te inang ko labi pa metolos kani.”
51Minikagi heman si Jesus, “Eneng-enengi se kagi ko kamno, so komità kaw te langit meowang, aw kitaen niyo heman se menge anghil te Timanem menayit aw tomenà diyà kanak Timanem Migpekeotaw.”

© 1982, Wycliffe Bible Translators, Inc. All rights reserved.

Learn More About Se kaling peokit