Ñwaè' Fileèpaêi 1

1Ŋwà' ca ce saŋ mɛ̌ Pol wèr Timotì ce wèr yu ŋgǎa mfà' nè Jisos Krâis. Wèr ce saŋ nè wèe ce wèe yu bèe Nyʉ̀ à rla' Filèpâi, ce wèe à tarshi wèe Jisos Krǎis wèe, a ker ce saŋ nè wee btu embe côr, ker ba bdikìn. 2Wèr ce loo wernɛ Nyʉ̀ ce e yu yìsèe Ta ker ba Tata Jisos Krâis, tʉr wèe à ntee bòŋboŋ, ker fa wèe cumʉnyaŋ.

3Mɛ̌ ke yòŋshi yà Nyʉ̀ à nfè' wɛɛwɛ ce m ce kwà'shi àmbò wèe. 4Mɛ̌ ke loo nè wèe, ce loo nè rlu'shì-ŋwɛ̀. 5Mɛ̌ loo wa'a ce yòŋshi Nyʉ̀ njobè' m ce kuushi àmbò wèe à koni mɛ̀ à rfà' Nsuŋ Mbòŋmboŋ, kɛ' embe nfè' ce wèe à m byemi nè Nyʉ̀ vʉ ghɛɛ sè'ni na. 6M rìŋ bòŋboŋ mɛnɛ Nyʉ̀ ce e m kɛ̀' a gee li rfà' ce rbòŋboŋ ca njep wěe mntee be kù dù kùntombì nè rfà' anà, caar dù bà' à nfè' ce li be kè mì à nòŋ ce Jisòs be vʉ̀ nà. 7Yi bòŋ enɛ m tʉr njɛ̀ɛ mkwà'shì ca kuu wèe, njobè' m tʉr wèe à ntee bòŋboŋ. Wèe à m koni mɛ̀ à rfǎ' rbòŋboŋ ce Nyʉ̀ à m fa mɛ̀. Wèe à m koni mɛ̀ à nfè' ce mɛ̀ m tɛɛ a ce fè'shi, a ker ce sàr Nsuŋ Mbòŋmboŋ nè bèe, ker ba sè'ni ce m yu mbe shaŋ na. 8Nyʉ̀ rìŋ enɛ ya ntee yi ce lùu à ryɛ wèe. Njɛ̀ɛ njì ce m kòŋ wèe, ku ba àmbò Jisòs ye ye kòŋ wèe nà. 9M ce loo nè wèe enɛ le rkòŋnì li ku' du kùntombì, gee tɛ wèe yi buu Nyʉ̀, kèr rìŋ jɛɛ jɛɛ efa yuu bòŋboŋ ba yuu bebep, 10tɛ wèe bo co' yuu ce yi bòŋ a caa mo', e kè ba à nòŋ ce Krǎis be kèr vʉ̀ nà wee mntee vi bo ba brara tɛ yuu yi ke' ba ce e taa wèe àgho ka'. 11Jisos Krǎis be gèe tɛ wèe tʉr ba nděe mbòŋmboŋ ce bèe a yɛ bo kù'si Nyʉ̀, kèr nɛ̀si ye.

12Bfʉr wâ, m ce kòŋ tɛ wèe riŋ enɛ ŋgɛ' ce e koni mɛ̀ na à gèe Nsuŋ Mbòŋmboŋ à misì a du kùntombì. 13Ŋgǎa ncìŋ nto', ba bèe wɛɛwɛ ce àfa a riŋ sè'ni enɛ m yu mbe shaŋ njobè' m yu ŋwɛ̀ rfà' nè Jisos Krâis. 14Bèe magòr efa mʉ̀ bfʉr visèe a ka' yɛ mɛ̀ mbe shaŋ wa'a, Tata à gêe, wowèe a misì a tʉr ntee, a ce fè'shi Blǎa Nyʉ̀ nè ŋger-ŋwɛ̀ a ke' ce wɛp yuu ka'. 15Wè mo' efa wowèe a fè'shi buu kuu Jisos Krǎis njobè' a ce ko'-ndoŋ nè mɛ̀, a ce ròo à rcàa mɛ̀, wè mo' a ce fè'shi yap ba à ntee bòŋboŋ. 16Bèe ca a ce fè'shi njobè' wowèe a kòŋ mɛ̀. Wowèe a rìŋ enɛ m yu mbe shaŋ tɛ m bo tome Nsuŋ Mbòŋmboŋ. 17Bèe mo' ca a fè'shi buu kuu Jisos Krǎis njobè' wowèe a ce kòŋ à rba běe bgòrgòr. Yuu ce wowèe a ce fè'shi yu ba yuu ce wowèe a tʉr njep ntee ka'. Wowèe a ku ce ròo enɛ mlù mi ku ce koo mɛ̀ àmbò m yu mbe shaŋ na. 18Yi gèe mnsa' ka'. Kɛ̀ wowèe à ce fè'shi ba à ntee bebep ɛ̀, kɛ̀ a ce gèe ba à ntee bòŋboŋ ɛ̀, bèe a ce yu' àmbò Jisos Krâis. A yuu ce yi gèe m ku ce lu'shi. 19Nè mini-ŋwɛ̀, m be kù ce lu'shi wa'a dù kùntombì, njobè' m rìŋ mɛnɛ le rloo ba rjà' ce li lò ese Yʉ' Jisòs Krǎis li be gèe tɛ m lûŋ. 20Yuu mo'sir ce m ce ròo, a ce kè' mɛnɛ yi koni nè mɛ̀ yi yu enɛ m fa kè gèe yuu ce yi be koosi mɛ̀ rìtu ka'. Yi yu enɛ m tʉr ba ntee tatap sè'ni àmbò mɛ̀ m ku tʉr nà à nfè' sìp tɛ m bo kù fa rlii rgòr nè Jisos Krǎis nè yà nyor. Kɛ̀ m be cu ntèe ɛ̀, kɛ̀ m be kwe ɛ̀, m ku ce ròo ba à rfa rlii rgòr nè ye. 21À ka' ba àmbò mɛ̀, m ka' cu mbe tunshe na m ku ce lɛ̀ mmir ba mbendù Jisos Krǎis. Mɛ̀ ka' kwe, ba sɛ' nè mɛ̀. 22Mɛ̀ ka' cu mbe tunshe na m gee rfà' ce li be jà' bèe. Yi ka' ba wa' mɛ̀ ke' riŋ yì ce m co' ka'. 23M tɛɛ mbetar. M ce kòŋ mɛnɛ mɛ̀ ba mà'shi tunshe dù cu wèr Jisos Krâis. Yì anà yi bòŋ a caa rcu embe tunshe na. 24Geewa'a, yi bòŋ magòr enɛ m cu mbe tunshe njo' wèe. 25Mɛ̀ yɛ mɛnɛ yi bòŋ wa'a. Mɛ̀ rìŋ mɛnɛ m be cu wèe sèe, tɛ m bo jà' wèe tɛ wèe du kùntombì nè le rbyemì, kèr ce lu'shi, 26mɛ̌ kèr vʉ̀ yɛ wèe, tɛ wèe bo yòŋshi Jisos Krǎis njo' mɛ̀.

27Yuu mo'sir yi yu enɛ yè ndèe ba le rcu li ku ba yɛɛnì àmbò Nsuŋ Mbòŋmboŋ Jisòs ce ròo enɛ li ba, ka' mɛ̀ ka' vʉ yɛ wèe, kɛ̀ mɛ̀ vʉ̀ ka' ɛ̀, m bo kù yu' mɛnɛ wèe tɛɛ tatap, a tʉr rkwà'shǐ rmo'sir, a ker ce rè nè ntee mo'sir tɛ Nsuŋ Mbòŋmboŋ ce wèe à byemi àgho bo dù kùntombì. 28Wèe ka' tɛ ce wɛp ye ŋgǎa bbàa ka', ca yi be ba ncǒo nrara nè wowèe enɛ wowèe a be kwe, bʉ, kèr dùŋshi enɛ Nyʉ̀ be gèe tɛ wèe lûŋ. 29Nyʉ̀ à fa wèe njì enɛ wèe fa kù byemi nè Jisos Krǎis byemi ka', e fa enɛ wèe yɛ ŋgɛ' a yě tù foŋ. 30E gèe enɛ wee wèe niŋ njep mʉ̀ bkòr ce wèe à m yɛ mɛ̀ ce rè, a ker ce yu' sè'ni enɛ m ku bii rè na.

Currently Selected:

Ñwaè' Fileèpaêi 1: LNT

Highlight

Copy

Compare