Ñwaè' Joân 8
8
1Jisòs à du yi ba mbe rtùu Olèf. 2À ka' ba à mʉ ŋgàptʉ', e ker du mbe Ndàp Nyʉ̀. Bèe wɛɛwɛ a du a yɛ ye mbo. E cu à nshè a ce yɛ'ni wowèe.
3Ŋgǎa ryɛ'ni mncir ba bèe Farìsi a vʉ mbo nè ŋgwa ŋwɛ̀ mò' ce a m koo a mbaŋrùŋwɛ̀, a tɛr kùntombì nè bèe wɛɛwɛ, a laa nè Jisòs enɛ̂, 4“Ŋwɛ̀ ryɛ'nì, a koo njeŋwɛ̀ ca a mbaŋrùŋwɛ̀. 5Musìs à m saŋ mbe ŋwà' mncir enɛ a ka' koo njeŋwɛ̀ a mbaŋrùŋwɛ̀, a tʉʉshì nè blùr e kwê. Wɛ̀ làa yo wɛ kɛ?” 6Wowèe a m làa wa'a, a ce mòoshi ye enɛ e ka' faa nlàa, tɛ a bo rìŋ yuu ce a be gèe nè ye. Jisòs à be'tì nyor à nshè a kɛ' a ce saŋ yuu à nshè nè ntubo. 7Wowèe a ku ce bipshi nè ye enɛ e làa yi enɛ kɛ lɛ? E naa nyor mbekì a laa nè wowèe enɛ̂, “Ŋwɛ̀ mò' à ka' ba a wěe mʉ ce e m be gee yuu bebep ka', banɛ ŋgàŋ tʉʉ njeŋwɛ̀ ca nè lùr entombì.” 8E ka' làa wa'a, a ker be'ti nyor a ce saŋ yuu à nshè nè ntubo. 9Wowèe a ka' yu' nlàa ca a nati a duse mò'sir mò'sir. Bleebèe a m dù entombì nè bghàrbèe, a ma'shi Jisòs a njeŋwɛ̀ anà mbo. 10Jisòs à naa nyor mbekì a laa enɛ̂, “Njeŋwɛ̀, wowèe a yû? Ŋwɛ̀ mò' à gèe yuu nè wɛ̀ ka' a?” 11E laa enɛ̂, “Masà, ŋwɛ̀ à gèe yuu nè mɛ̀ ka'.” Jisòs à laa nè ye enɛ̂, “M be gèe yuu mo' nè wɛ̀ foŋ ka'. Dù yo yu, wɛ̌ dù à fa kèr gèe yuu bebep ka'.”]
12Jisòs à m ker laa nè bèe enɛ̂, “A mɛ̀ rraa enjep ŋgòŋ na. Ŋwɛ̀ ce e ka' vʉ fa mɛ̌ mbùu banɛ àde' e ker jɛr à tʉ̀'nji ka', e be koni ba rraa ce li fa ryòŋ.” 13Bèe Farìsi a laa nè ye enɛ̂, “Ce suŋ wɛ̀ àmbò yo tu; yi ba yɛɛnì ka'.” 14Jisòs à laa nè wowèe enɛ̂, “Ka' ce suŋ mɛ̀ ce suŋ àmbò ya tu wa'a, yuu ce m ce suŋ yi yu yɛɛnì njobè' mɛ̀ rìŋ fàdì' ce mɛ̀ vʉ̀, a riŋ fàdì' ce m ce dù. Wèe rìŋ fàdì' ce mɛ̀ vʉ̀ ka', a riŋ fàdì' ce m ce dù ka'. 15Wèe ce sa' ye ba àmbò bèe enjep ŋgòŋ na a ke sa'. M ce sa' ya yu ŋwɛ̀ mò' ka'. 16M ka' ce sa' bèe, m sa' yɛɛnì njobè' àde' m sa' nè ya tu ka'. M ce sa' àbee wèr ŋwɛ̀ ce e m tuu mɛ̀. 17A saŋ mbe ye ŋwà' mncir enɛ̂, ‘bèe a mmbaa a ka' tɛɛ njìnsa' à yuu banɛ yuu anà yi yu mini.’ 18M ce suŋ àmbò ya tu, ŋwɛ̀ ce e ce suŋ àmbò mɛ̀ foŋ yu yà Ta ce e m tuu mɛ̀.” 19Wowèe a bipshì nè ye enɛ̂, “Yò Ta yû?” Jisòs à beesì a laa nè wowèe enɛ̂, “Wèe rìŋ mɛ̀ ka', a riŋ yà Ta foŋ ka'. Wèe à ba riŋ mɛ̀, wèe à ba rìŋ yà Ta foŋ.”
20Jisòs à m làa buu ca nè wowèe à nfè' ce e m ce yɛ'ni mbe Ndàp Nyʉ̀ a ba ba mbe dì' ce a m ce fa rfa. Ŋwɛ̀ mò' à m koo ye ka' njobè' yì nfè' à m be ghɛɛ ka'.
21Jisòs à m ker laa nè wowèe enɛ̂, “M be dù ya yu, tɛ wèe roo mɛ̀, yɛ ka', kwe nè yè buu bbebep. Àde' wèe vʉ fàdì' ce m ce dù ka'.” 22Jus a laa enɛ̂, “E làa enɛ e ce dù fàdì' ce àde' sèe vʉ ka' wa'a, banɛ e be yʉ yì nyor a?” 23Jisòs à laa nè wowèe enɛ̂, “Wèe yu ye bèe enjep nshè na, mɛ̀ lo ya e mbekì. Wèe yu ye bèe enjep ŋgòŋ na, mɛ̀ ba ya ŋwɛ̀ enjep ŋgòŋ na ka'. 24Mɛ̀ suŋ wèe enɛ wèe be kwe nè yè buu bbebep, njobè' wèe à ka' tɛ byemi enɛ m yu ŋwɛ̀ ce m yu ka', banɛ wèe be kwe nè yè buu bbebep.” 25Wowèe a bipshì nè ye enɛ̂, “A wɛ̀ nda sê?” Jisòs à laa enɛ̂, “M yu ŋwɛ̀ ce mɛ ke suŋ wèe à nfè' wɛɛwɛ enɛ m yu nà. 26M tʉr buu magòr ce mɛ̀ ba làa kuu wèe, kèr sa' wèe njo' buu anà. Geewa'a, m ce suŋ wèe enɛ ŋwɛ̀ ce e m tuu mɛ̀ yu ŋwɛ̀ mini. M ce suŋ ŋgòŋ ca ba yuu ce mɛ̀ yu' ese ye.” 27Jisòs à ka' ce làa wa'a wowèe a riŋ enɛ e ce làa ba àmbò yì Ta ka'. 28Yi ka' ba wa'a, Jisòs à laa enɛ̂, “Be ba à nfè' ce wèe à nàa Muu Ŋwɛ̀ mbekì tɛ wèe ka' rìŋ enɛ a mɛ̀ ye, kèr rìŋ foŋ enɛ m ce gèe yuu mo' a mɛ̌ ŋger ka'. M ku ce làa ba buu ce yà Ta à yɛ'ni mɛ̀. 29Ŋwɛ̀ ce e tuu mɛ̀ yu wèr ye, e mà'shi mɛ̀ mamŋgi' ka' njobè' mɛ̌ ke kǔ gèe ba buu ce nyor ce bòŋ ye.” 30E ka' làa buu ca wa'a, bèe magòr a byemì nè ye.
31Jisòs à laa nè Jus ce a m byemi nè ye nà enɛ̂, “Wèe ka' ku ce gèe buu ce mɛ̀ yɛ'ni wèe, banɛ wèe yu ŋgǎa yɛ'ni yà buu ghup. 32Wèe be rìŋ yuu mini, tɛ mini anà gee tɛ wèe lûŋ.” 33Wowèe a laa enɛ̂, “Wèr yu ŋgʉ̀ Abràhâm. Wèr à m be ba bkwàa nè ŋwɛ̀ mò' ka'. Wɛ̀ ka' ce làa wɛnɛ à be gèe tɛ wèr luŋ à njɛ̌ɛ kɛ?” 34Jisòs à laa nè wowèe enɛ̂, “M ce suŋ wèe nè mini-ŋwɛ̀ enɛ ŋwɛ̀ ce e ka' ce gèe buu bbebep banɛ ŋgàŋ yu ŋkwàa nè buu bbebep. 35Àde' ŋkwàa yi cu mbe ndàp ŋwɛ̀ nfesè ka'. Ŋwɛ̀ ce e ke cu mbo nfesè a muu ŋwɛ̀ ndàp anà. 36Banɛ Muu Nyʉ̀ à ka' gee wèe lûŋ, banɛ wèe à lùŋ nè mini-ŋwɛ̀ ghup. 37M rìŋ mɛnɛ wèe yu ŋgʉ̀ Abràhâm. Ka' yi yu wa'a, wèe ce ròo à ryʉ mɛ̀, njobè' yuu mɛ̀ suŋ wèe yi niŋ wèe mbà tù' ka'. 38M ce suŋ wèe ba buu ce mɛ̀ yɛ ese yà Tâ, wèe à ce gèe ye ba buu ce wèe à yɛ'ni ese yè tâ.” 39Wowèe a beesì nè ye enɛ̂, “Abràham yu yèr tâ.” Jisòs à laa nè wowèe enɛ̂, “Wèe à ba ba boo Abràhâm, wèe à ba gèe ba buu ce Abràham à m ce gèe. 40Wèe ce ròo ye sè'ni à ryʉ mɛ̀ ce m yu ŋwɛ̀ ce mɛ̀ suŋ wèe yuu mini ce mɛ̀ yu' ese Nyʉ̀. Abràham à m be gee yuu mo' wa' ka'. 41Wèe ce gèe ba yuu ce yè ta ce gèe.” Wowèe a laa nè ye enɛ̂, “Wèr yu boo ce a bi à bsàkì ka'. Yèr ta ku ba Nyʉ̀ cà'cà'.” 42Jisòs à laa nè wowèe enɛ̂, “Nyʉ̀ à ka' ba ba yè Tâ, wèe à ba kòŋ mɛ̀ njobè' mɛ̀ lò ese Nyʉ̀ a ka' vʉ àfa. Mɛ̀ vʉ̀ ba à ya ŋger ka'; mɛ̀ vʉ̀ ba à ŋger ŋwɛ̀ ce e m tuu mɛ̀. 43Wèe ce yu' yuu ce m ce làa ka' njokɛ? Wèe ce yu' ka' njobè' yi yu àtɛ̀r nè wèe à ryu' ka'. 44Satàn yu yè tâ. Wèe ce kòŋ à rgèe ba buu ce e kòŋ. E m ku ba ŋwɛ̀ nyʉshi bèe efa rkɛ̀'. Àde' e tɛɛ à yuu mini ka', njobè' e yu ŋwɛ̀ mini ka'. E ke nya' mnde', ku nya' àmbò yi ŋgèe yi yu nà njobè' e yu ŋwɛ̀ mnde', a ba tàr mnde'. 45A yuu ce m ce suŋ wèe yuu mini, wèe à ce byemi nè mɛ̀ ka'. 46Àde' ŋwɛ̀ mò' efa wěe mʉ duŋshi yuu bebep ce mɛ̀ gèe a? Mɛ̀ ka' ce suŋ wèe ba yuu mini, wèe à byemì nè mɛ̀ ka' njokɛ? 47Ŋwɛ̀ à ka' ba ŋwɛ̀ Nyʉ̀ banɛ ŋgàŋ be yu'shi blǎa Nyʉ̀. Mbùu ce wèe ce yu'shi blǎa Nyʉ̀ ka' yu njobè' wèe yu bèe Nyʉ̀ ka'.”
48Jus a beesì nè ye enɛ̂, “To yi yu yɛɛnì àmbò wèr ce làa enɛ à yu ŋwɛ̌ à ŋgǒŋ Sàmarìyà, yʉ' nyʉ̀rkà' yi ba njep wɛ̀.” 49Jisòs à beesì enɛ̂, “Yʉ' nyʉ̀rkà' yi yu njep mɛ̀ ka'; m ce yu'ni ba nè yà Tâ, wèe à ke' ce yu'ni ye yu nè mɛ̀ ka'. 50M ce ròo ba enɛ bèe a ku'si mɛ̀ ka'. Ŋwɛ̀ mò' yu ce e ce ròo enɛ bèe a ku'si ye, a ba ŋwɛ̀ sa' mnsa'. 51M ce suŋ wèe nè mini-ŋwɛ̀ enɛ ŋwɛ̀ à ka' ce yu' yuu ce m ce làa, ce gèe yi, banɛ rkwe li be jòo ye ka'.” 52Jus a laa nè ye enɛ̂, “Wèr rìŋ sè'ni wernɛ yʉ' nyʉ̀rkà' yi yu njep wɛ̀. To Abràham à m kwe, ŋgǎa ncep ntuu Nyʉ̀ a kweŋgèr foŋ. Wɛ̀ ka' ce làa enɛ ŋwɛ̀ à ka' yu' yuu ce à ce làa ce gèe yi, rkwe li ke' joo ye ka' à njɛ̌ɛ kɛ? 53Wɛ̀ càa yèr ta Abràham a? E m kwe. Ŋgǎa ncep ntuu Nyʉ̀ anà a kweŋgèr foŋ. Wɛ̀ ka' ce làa yo enɛ a wɛ̀ nda?” 54Jisòs à beesì enɛ̂, “M ka' ce kù'si ya tu, bkù' anà ba yuu cicì. Ŋwɛ̀ ce e ce kù'si mɛ̀ yu yà Ta ce wèe ce làa enɛ a yè Nyʉ̀ nà. 55Ka' wèe ce làa wa'a, wèe rìŋ ye ka'. Mɛ̀ rìŋ ye. M ka' ba laa mɛnɛ mɛ̀ rìŋ ye ka', mɛ̀ ba ba ŋwɛ̀ mnde' àmbò wèe. Mɛ̀ rìŋ ye, a ce gèe yuu ce e ce làa. 56Abràham ce yu yè ta à m lu'shi enɛ e be yɛ nfè' yà. E m yɛ, a lu'shi.” 57Jus a laa nè ye enɛ̂, “Wɛ̀ be ba' bfè' mnta ka', a ce làa wɛnɛ wɛ̀ m yɛ Abràham ba à njɛ̌ɛ kɛ?” 58Jisòs à laa nè wowèe enɛ̂, “M ce suŋ wèe nè mini-ŋwɛ̀ enɛ, tɛ Abràham ka' kè ba, m ku ba.” 59Wowèe a ka' yu' wa'a, a kwɛ' blùr tɛ a bo tʉʉshi ye àgho. Yi ka' ba wa'a, e bʉ a fʉʉ yi yu embe Ndàp Nyʉ̀.
Currently Selected:
Ñwaè' Joân 8: LNT
Highlight
Share
Copy
Want to have your highlights saved across all your devices? Sign up or sign in
Limbum New Testament © Bible Society of Cameroon, 2003.