Ñwaè' Joân 1
1
1À m ba efa rkɛ̀', Nlàa yi ku ba. Yi m ba àbee a Nyʉ̀. Nlàa anà yi m ba Nyʉ̀. 2Yi m ku ba efa rkɛ̀' a Nyʉ̀. 3Buu wɛɛwɛ à m gèe yi à ŋger Nyʉ̀. Yuu mo' yi yu ce yi m buu efa rgèe ka'. 4Ryòŋ li m vʉ̀ ba ese yi. Ryòŋ anà li m ba rraa nè bèe. 5Rraa anà li ke raa à tʉ̀'nji. Tʉ̀'nji à m be liisi rraa anà ka'.
6Ŋwɛ̀ mò' à m ba ce Nyʉ̀ à m tuu. Li rlii li m ba enɛ Jǒn. 7E m vʉ̀ tɛ e bo suŋ bèe àmbò rraa anà tɛ bèe a bo byemi njobè' e suŋ wowèe. 8E m ba rraa anà ka'. E m ku vʉ yi ba à rsuŋ bèe àmbò rraa anà.
9Rraa mini ce li ke raa mbendù bèe wɛɛwɛ nà li m vʉ̀ njep ŋgòŋ. 10E m ba njep ŋgòŋ. Ŋgòŋ ca à m gèe ye à ŋger Nyʉ̀. Ŋgòŋ yi m rìŋ ye ka'. 11E m vʉ̀ fa yě là', yì bèe a konì ye ka'. 12À ka' ba yi àmbò bèe ce a m koni ye a ker byemi nè ye foŋ nà, e fa ŋger enɛ wowèe a beeŋger ba boo Nyʉ̀. 13Boo ce a bi ba àmbò a ke bi boo nà ka'. Yu ba boo ce a bi ba àmbò Nyʉ̀ kòŋ. 14Nlàa anà yi m bèeŋger à ŋwɛ̀ ghup, a cu a wěr mʉ. Wèr à m yɛ yi fòo ce yi m lò ba ese yì Tâ. Nyʉ̀ à m fa njɛ̀ɛ fòo ca ba nè muu yì ce e ku ba mò'sir. Wèr à m yɛ rbǒŋ Nyʉ̀ ba mini Nyʉ̀ ba njep ye.
15Jǒn a ŋwɛ̀ ce e m suŋ bèe àmbò ye. E m làa enɛ̂, “Ŋwɛ̀ ca yu ŋwɛ̀ ce mɛ̀ m suŋ wèe enɛ e bii ka' vʉ̀ nà. Mɛ̀ m suŋ wèe enɛ nta' ŋwɛ̀ anà yi càa ya, njobè' tɛ a ka' kè bi mɛ̀, e m ku ba.”
16À ka' ba njo' ku' li rbòŋ, sèe wɛɛwɛ à konì bghònì ese ye ŋkàrà' àŋgoo. 17Nyʉ̀ à m fa sèe mncir ba njì enjep Musìs, à ka' ba njì enjep Jisos Krâis, sèe à rìŋ rbǒŋ Nyʉ̀ ba mini Nyʉ̀. 18Ŋwɛ̀ mò' à m be yɛ Nyʉ̀ ka'. Muu Nyʉ̀ ce e ku ba mò'sir, a ker ba mntee Nyʉ̀, a ye ce e dùŋshi sèe njɛ̀ɛ ŋwɛ̀ ce yì Ta yu.
19Jus ce à rla' Jɛ̀rusalɛ̀m a m tuu bèe mò' efa mʉ̀ ŋgǎa taŋshi taŋshì ba bèe Lɛvì enɛ a du yɛ Jǒn, bipshi nè ye enɛ̂, “A wɛ̀ nda?” 20Jǒn à m kani efa rbèesi yuu ce wowèe a m bipshi na ka'. Cena a yuu ce e m làa nè wowèe à bsii bèe wɛɛwɛ. E m làa enɛ̂, “A mɛ̀ Krǎis anà ka'” 21Wowèe a ker bipshi nè ye enɛ̂, “Banɛ a wɛ̀ nda? A wɛ̀ Àlajà a?” E beesì enɛ̂, “A mɛ̀ Àlajà ka'.” Wowèe a ker bipshi enɛ̂, “A wɛ̀ ŋwɛ̀ ncep ntuu Nyʉ̀ anà a?” Jǒn à kanì. 22Wowèe a ker bipshi nè ye enɛ̂, “Banɛ a wɛ̀ nda sê? Suŋ wèr njɛ̀ɛ ŋwɛ̀ ce à yu tɛ wèr bo kʉti suŋ bèe ce a ba tuu wèr.” 23Jǒn à beesì enɛ̂,
“A mɛ̀ ŋwɛ̀ ce Àsayà à m làa àmbò ye elǔuŋgòŋ enɛ̂, ‘Njèndoŋ mò' ce fuŋ à ntee rìŋ enɛ̂,
Kupshi nè nduunjì nè Tata.’”
24Bèe mò' ce bèe Farìsi a m tuu 25a m bipshi nè Jǒn enɛ̂, “Wɛ̀ ka' tɛ ba Krǎis anà ka', ba Àlajà ka', ba ŋwɛ̀ ncep ntuu Nyʉ̀ ce Nyʉ̀ à m làa enɛ e be tuu nà ka', wɛ̀ ka' ce bàptir bèe njokɛ?” 26Jǒn à beesì nè wowèe enɛ̂, “M ce bàptir bèe ba nè mdip. Ŋwɛ̀ mò' yu a wěe mʉ, ce wèe à be riŋ ye ka'. 27A ye ce e ce vʉ̀ embe mɛ̌ njì. Yi nta' yi càa ya. Mɛ̀ ghɛɛte à ŋwɛ̀ ce àde' m co'ni vi blaba' ka'.”
28Buu ca vi m koni ba à rla' Bɛtanì ce li yu nèŋguu rdip Jodàn. A fàdì' Jǒn à m ce bàptir bèe.
29Tʉ̀' à ka' raa, Jǒn à yɛ àmbò Jisòs ce vʉ̀ à ryɛ ye, a laa enɛ̂, “Yɛ nè Muu Njèe Nyʉ̀ ce e be siŋsi buu bbebep enjep ŋgòŋ. 30A ŋwɛ̀ ce mɛ̀ m ce làa mɛnɛ̂, ‘Ŋwɛ̀ mò' ce vʉ̀ embe mɛ̌ njì ce yi nta' yi càa ya njobè' a m bii ka' bi mɛ̀, e ku ba nà.’ 31Mɛ̀ m rìŋ mɛnɛ a ye Krǎis anà ka'. Geewa'a, mbùu ce mɛ̀ m vʉ̀ ya ce bàptir bèe à to' Isrɛ̀l à m ba enɛ wowèe a bo rìŋ ye.” 32Jǒn à m suŋ bèe ba yuu ce e m yɛ, a laa enɛ̂, “Mɛ̀ m yɛ àmbò Yʉ' Rara yi ce sùu embe bùu àmbò bèŋ wa'a, a cu mbe yě ndù. 33À m ba à nfè' anà mɛ̀ be riŋ ye ka'. Geewa'a Nyʉ̀ ce e m tuu mɛ̀ enɛ m vʉ baptir bèe à m làa nè mɛ̀ wɛɛ enɛ̂, ‘Ŋwɛ̀ ce à be yɛ àmbò Yʉ' yi be sùu embe bùu, cu mbe yě ndù, a ŋwɛ̀ ce e be bàptir bèe nè Yʉ' Rara.’ 34Mɛ̀ yɛ nè mini-ŋwɛ̀, a ce suŋ wèe rara enɛ ŋwɛ̀ anà yu Muu Nyʉ̀.”
35Tʉ̀' à ka' kèr raa, Jǒn à tɛɛ a bèe a mmbaa ce e m ce yɛ'ni wowèe. 36E ka' yɛ àmbò Jisòs ce càa, a laa enɛ̂, “Yɛ nè muu njèe Nyʉ̀.” 37bèe a mmbaa anà a ka' yu' àmbò Jǒn à làa wa'a, a nati a du àmbùu Jisòs. 38Jisòs à ka' karsi nyor yɛ àmbò wowèe a ce vʉ̀ a yě mbùu, e bipshì nè wowèe enɛ̂, “Wèe ce ròo ba kɛ?” Wowèe a laa nè ye enɛ̂, “Rabài (ce yi yu enɛ Ŋwɛ̀ Ryɛ'nì), à ce cu ba fɛ?” 39Jisòs à laa nè wowèe enɛ̂, “Vʉ̀ nè yɛ.” Wowèe a du a yɛ fàdì' e m ce cu, a cu a Jisòs wèe, kɛ' embe nfè' nyʉ̀ à m kɛ̀' a ce coo.
40Mò' efa bèe a mmbaa ca ce e m yu' yuu Jǒn à m làa a du àmbùu Jisòs foŋ nà à m ba Andrù nfʉr Saimʉn Pità. 41E m nàti a du cɛrcɛr sê, a du a yɛ nfʉr yǐ Saimʉn Pità a laa nè ye enɛ̂, “Wèr à yɛ Mɛ̀sayà.” Rlii ca li yu enɛ Krâis (ŋwɛ̀ ce a ghar). 42E m lòr ye a ye a du a yɛ Jisòs. Jisòs à ke' Saimʉ̀n a laa enɛ̂, “Wɛ̌ Saimʉ̀n ce à yu muu Jǒn, a be too wɛ̀ enɛ Kɛfàs.” Rlii ce enɛ Kɛfàs na li ku ba foŋ àmbò rlii ce li yu enɛ Pità nà.
43Tʉ̀' mò' à ka' kèr raa, Jisòs à natì enɛ e ce dù à ŋgǒŋ Galèlê. E m ròo Felêp, a yɛ ye, a laa nè ye enɛ̂, “Vʉ̀ fa mɛ̌ mbùu.” 44Felep ca à m ba ŋwɛ̌ à rla' Bɛ̀tsaidà àmbò Andrù ba Saimʉn Pità a m ba. 45Felep ye ye à m yɛ Nàtanìyɛ̀l a laa nè ye enɛ̂, “Wèr à yɛ ŋwɛ̀ ce Musìs à m saŋ àmbò ye mbe ŋwà' mncir, ŋgǎa ncep ntuu Nyʉ̀ a ker saŋ àmbò ye foŋ nà. A ye Jisòs muu Josɛ̀f ce à rla' Nasarɛ̀t.” 46Nàtanìyɛ̀l à laa nè ye enɛ̂, “Wà' àde' yuu bòŋboŋ yi fʉʉ à rla' Nasarɛ̀t a?” Felep à laa nè ye enɛ̂, “Vʉ̀ yɛ.” 47Jisòs à ka' yɛ àmbò Nàtanìyɛ̀l ce vʉ̀ à ryɛ ye, e laa yuu a kuu ye. E m làa enɛ̂, “Ŋwɛ̀ ca yu ŋwɛ̀ Isrɛ̀l ghup, a ba ŋwɛ̀ nlàayɛ.” 48Nàtanìyɛ̀l à bipshì nè ye enɛ̂, “Wɛ̀ rìŋ mɛ̀ à njɛ̌ɛ kɛ?” Jisòs à beesì enɛ̂, “Tɛ Felep ka' kɛ' wɛ̀, mɛ̀ ba yɛ wɛ̀ à nfè' ce wɛ̀ ba cu njep mbùu ce ce a too enɛ fik nà.” 49Nàtanìyɛ̀l à laa nè ye enɛ̂, “Rabài, a wɛ̀ Muu Nyʉ̀. A wɛ̀ ŋkʉʉ à to' Isrɛ̀l.” 50E ka' làa wa'a, Jisòs ye ye à laa nè ye enɛ̂, “Wɛ̀ ku byemi ba njobè' mɛ̀ ba laa mɛnɛ mɛ̀ ba yɛ wɛ̀ à nfè' wɛ̀ ba cu njep mbùu ce ce a too enɛ fik nà a? À be yɛ buu mo' ce vi be càa cena.” 51E m ker laa enɛ̂, “M ce suŋ wɛ̀ nè mini-ŋwɛ̀ enɛ wèe be yɛ àmbò rbuu li be mʉ̀'ti tɛ bcìndap Nyʉ̀ a ce ko' ce sùu mbendù Muu Ŋwɛ̀.”
Currently Selected:
Ñwaè' Joân 1: LNT
Highlight
Share
Copy
Want to have your highlights saved across all your devices? Sign up or sign in
Limbum New Testament © Bible Society of Cameroon, 2003.