Ñwaè' Áfásoès 6

1Boo, yu'ni nè nè wêe bta ba wêe mmâ. Yi yu yɛɛnì enɛ bèe ce a yu àbee a Tata Jisòs wèe a gee wa'a. 2Ncir entòmbì ce mkà'ni mi yu àgee mo yi yu enɛ̂, “Yu'ni nè yo ta ba yo mâ.” Mkà'ni anà mi yu enɛ̂, 3“Tɛ buu bo ba yɛɛnì nè wɛ̀, tɛ à cu à ŋgòŋ ca njìsàp.” 4Btar boo, wèe fa gèe tɛ ntee yi ce yaŋ boo wee ka'. Wèe yɛ'ni wowèe, cep wowèe à njɛ̀ɛ njì ce Tata Jisòs kòŋ.

5Wèe ce wèe yu bkwàa, yu'ni nè nè wee mmasà enjep ŋgòŋ na; wɛp wowèe. Yu'ni nè nè wowèe nè ntee e mo'sir àmbò wèe ce yu'ni nè Krǎis nà. 6Wèe fa kù ce fà' ba à nfè' ce wowèe a ce yɛ wèe tɛ wowèe a bo yu' rbòŋ nè wèe ka'. Wèe à ba kuushi ba enɛ wèe yu ŋgǎa mfà' nè Krâis, lòr ye ntee wɛɛwɛ gèe ba yuu ce Nyʉ̀ kòŋ. 7Gèe nè le rfà' nè ntee bòŋboŋ. Wèe fa gèe àmbò wèe ku ce fà' ba nè ŋwɛ̀ wa' ka', wèe gee li ba nè Tata Jisos Krâis. 8Rìŋ nè enɛ Tata be là' ŋwɛ̀ wɛɛwɛ à yuu bòŋboŋ ce e gèe, kɛ̀ ŋgàŋ yu ŋkwàa ɛ̀, kɛ̀ e yu ŋkwàa ka' ɛ̀. 9Wèe ce wèe yu mmasà, gèe nè ŋgěe bòŋboŋ foŋ nè bkwàa. Wèe fa ce wɛpsi wowèe ka'. Wèe à ba kuushi enɛ wèe bkwàa ca wèe wɛɛwɛ tʉr Masà mò'sir ce e ce cu mbe bùu. E ke so'niŋgòŋ ka'.

10Yuu ce m ce làa elʉ̀simbùu yi yu enɛ àmbò wèe Tata Jisòs wèe yu àbee na, tɛɛ nè tatap, koni ŋger ese ye ce e tʉr ŋger gòr. 11Yar nè buu bìr wɛɛwɛ ce Nyʉ̀ à fa wèe tɛ wèe bo tami nyor à rmà' bìr àgho, fà dì' Satàn bo' wèe nè bfee kwɛ̀ɛ ka'. 12Sèe ce mà' bìr ca ba sèe bèe wèe ka'. Sèe ce mà' ba sèe byʉ' bbebep wɛɛwɛ ce vi tʉr ŋger mbekì. Byʉ' bbebep ca yu byʉ' ce vi ce sa', a tʉr ŋger, a tap njep ŋgòŋ ce yi yu à tʉ̀'nji na. 13Banɛ wèe lor buu bìr ce Nyʉ̀ à fa nè wèe nà, tami nyor àgho, tɛ Satàn e vʉ̀ nà, wèe bo mà' bìr bòŋboŋ, gwè ka'. Bìr ca ka' mî, tɛ wèe bo kù tɛɛ tatap. 14Tɛɛ tatap, tami nyor àmbò ŋwɛ̀ mini tɛ mini ca ba àmbò ŋkànda ce ŋwɛ̀ mà' bìr à kur njep mbùu. Mà'shi tɛ yo ŋgèe yi ba yɛɛnì. Njɛ̀ɛ ŋgèe ca yi tɛ'shi wèe àmbò yuu ce ŋwɛ̀ mà' bìr à yar a tɛ'shi yì ŋgùŋ àgho wa'a. 15Lòr Nsuŋ Mbòŋmboŋ ce e ce suŋ àmbò cumʉnyaŋ ce Nyʉ̀ ce fa nè bèe, tɛ e ba àmbò blaba' ce ŋwɛ̀ mà' bìr à yar, fà dì' à bo gwè ka'. 16Mo' foŋ yi yu enɛ à lɛ̀ ntee nè Tata Jisòs, tɛ ntee ce wɛ̀ lɛ̀ anà yi ba àmbò byɛɛ bìr, tɛ mjɛɛ Satàn ce mor yi yu à cùu mo mi bo koo njo. 17Lòr nè rlùŋ tɛ li ba àmbò rtaa ŋwɛ̀ mà' bìr wa'a. Lòr nè kàafà' ce à fa ba Yʉ' Nyʉ̀ a fa nè wèe. Kàafà' ca yu blǎa Nyʉ̀. 18Loo nè nè Nyʉ̀ à nfè' wɛɛwɛ. Wèe à ka' ce loo wa'a, wèe ma'shi tɛ Yʉ' Rara yi gee tɛ wèe riŋ à rloo. Cu nè njo, ke' sɛ ka'. Loo nè nè bèe Nyʉ̀ wɛɛwɛ à nfè' wɛɛwɛ, 19ker loo nè mɛ̀ enɛ Nyʉ̀ fa mɛ̀ blàa ce vi yu yɛɛnì à nfè' ce m ka' ce suŋ bèe buu ce àde' bèe à m ba riŋ ka' kuu nsuŋ mbòŋmboŋ. Loo nè enɛ m ka' ce suŋ bèe buu ca, m suŋ nè ŋger-ŋwɛ̀. 20Nsuŋ ca yu nsuŋ ce Jisos Krǎis à m ce mɛ̀ enɛ m tɛɛ a yě tù, suŋ bèe, ka' m yu mbe shaŋ sè'ni wa'a. Loo nè enɛ m suŋ bèe buu ca nè ŋger-ŋwɛ̀, suŋ vi àmbò mɛ̀ ba suŋ.

21M ce kòŋ mɛnɛ wèe riŋ foŋ yuu ce yi koni mɛ̀ tɛ wèe bo rìŋ àmbò m yu. Tikikòs be suŋ wèe buu ca. E yu nfʉr yìsèe, sèe à koŋ ye sê. E yu ŋwɛ̀ rfà' ce e ce fà' nè Tata Jisòs nè mini-ŋwɛ̀. 22A mbùu ce m ce tuu ye enɛ e vʉ yɛ wèe tɛ e bo suŋ wèe àmbò wèr yu tɛ ye ntee yi bo fʉte tɛ wèe yu' rbòŋ.

23Nyʉ̀ ce e yu yìsèe Tâ, ba Tata Jisos Krâis, fa cumʉnyaŋ nè bèe Nyʉ̀ wɛɛwɛ, gee tɛ wowèe a koŋni, lɛ̀ ntee nè Jisòs. 24M ce loo mɛnɛ Nyʉ̀ tʉr ntee bòŋboŋ nè bèe wɛɛwɛ ce a kòŋ Tata Jisos Krǎis nè mini-ŋwɛ̀, a ku cu ba njep rkòŋnì anà.

Currently Selected:

Ñwaè' Áfásoès 6: LNT

Highlight

Copy

Compare