Ñwaè' Áfásoès 5

1Wèe ce wèe yu boo ce Nyʉ̀ kòŋ sê, bè'ni nè gee ŋgèe ce Nyʉ̀ ce gèe. 2Cu nè nè rkòŋnì-ŋwɛ̀ àmbò Jisos Krǎis ye ye à m kòŋ sèe, a fa li ryòŋ a sěe btù nà. Li ryòŋ ce e m fa na, li m ba àmbò rfa ce a fa, Nyʉ̀ à yu' rbòŋ àgho sê.

3Njɛ̀ɛ buu àmbò bsàkì ba mkɛ'ni, ba ŋgěe ŋgwe, ba mbàŋ mmir à buu yi fa kèr yu'ti a wěe mʉ ka', njobè' wèe yu bèe Nyʉ̀. 4Blǎa bbebep, bde' bcicì ba ŋkɛ̀rbuu mbembep fa kè fʉʉ eku wěe cùu ka'. Buu ca yu yɛɛnì ka'. Wèe à ba ce yòŋshi ba Nyʉ̀. 5Rìŋ nè nè mini-ŋwɛ̀ enɛ ŋwɛ̀ ce e ce sàki, ba ŋwɛ̀ ce e ce kɛ'ni, ker ba ŋwɛ̀ ce e tʉr yuu, yi ghɛɛ ye ka', ce e lòr buu ca àmbò yì Nyʉ̀ wa'a, àde' e konì buu bbòŋboŋ ce bèe ce a tʉr dì' mbe dǐ' kʉʉ Jisos Krǎis ba Nyʉ̀ a koni nà ka'. 6Wèe fa mà'shi tɛ ŋwɛ̀ mò' bo' wèe nè blǎa bcicì tɛ wèe gee njɛ̀ɛ buu ca ka'. Yu njo' buu anà ce enɛ Nyʉ̀ be ko'si rshentee, fa ŋgɛ' nè bèe ce a ce yu'ni nè ye ka'. 7Banɛ wèe fa tɛɛ kùu wèe njɛ̀ɛ bèe ca wèe ka'. 8À m ba à nfè' mò' wèe à ce cu à tʉ̀'nji, à ka' ba sè'ni na, wèe à ce cu ba à rraa njobè' wèe yu bèe Tata Jisòs. Gèe nè ŋgèe àmbò bèe ce a ce cu à rraa. 9Rraa ca li gèe bèe a gee buu wɛɛwɛ ce vi yu bbòŋboŋ, a ba yɛɛnì, a ker ba mini. 10Ghèter nè riŋ buu ce vi bòŋ Tata Jisòs. 11Fa tʉr nè yuu mo' à rgèe nè buu bcicì ce bèe a ce gèe à tʉ̀'nji na ka'. Gèe nè tɛ buu anà yɛɛti àwaŋ. 12Yi yu nè rìtu-ŋwɛ̀ à rlàa àmbò buu ce wowèe a ce gèe à bsʉ̀ti. 13A ka' nyɛɛ nè yuu à rraa, banɛ yuu anà yi yɛɛti àwaŋ. 14Yuu yi ka' yɛɛti àwaŋ yi kʉtì ba ba yuu ce à rraa. A mbùu ce a làa enɛ̂,

“Wɛ̀ ce à ce buumi, lɛ' efa mmirlò,

fʉʉ efa rkwe, tɛ rraa Krǎis li saŋ mbe wɛ̌ ndù.”

15Banɛ wèe lor nfè' nè ye ŋgèe. Wèe fa gèe ŋgèe àmbò bèe ce a mɛŋni buu ka', gèe nè ba àmbò bèe ce a rìŋ buu. 16Wèe à ka' koni fɛŋ à rgèe yuu bòŋboŋ wèe gee yi, njobè' buu bbebep à kù' à ŋgòŋ sè'ni na. 17Banɛ wèe fa ba blʉr ka'. Rìŋ nè ba buu ce Tata Jisòs ce kòŋ enɛ wèe gêe. 18Wèe fa ce no mrù' tɛ mi ce koo wèe ka'. Mi ka' ce koo wèe banɛ mi be ce bepsi wèe bepsi. Fa nè wee mnyor ba nè Yʉ' Nyʉ̀ tɛ yi bo ruu njep wěe mntee. 19Yòp byɛɛ njɛ̀ɛ jɛɛ jɛ̀ɛ jɛɛ, laa buu nè bèe nè byɛɛ ca. Yòp byɛɛ, ku'si Tata Jisòs nè yo ntee wɛɛwɛ. 20Yòŋshi Nyʉ̀ ce e yu yìsèe Tâ, à rlii yìsèe Tata Jisos Krâis. Yòŋshi ye à buu wɛɛwɛ à nfè' wɛɛwɛ.

21Yu'ni nè nè wee btu, njobè' wèe yu bèe ce wèe ce gʉ'shi nè Krâis. 22Bbyèŋgê, yu'ni nè nè bduu wee àmbò wèe ce yu'ni nè Tata Jisòs nà. 23Nduu yu tu nè ŋgwa àmbò Krǎis ye ye yu tu nè cor nà. Yu ye ce e gèe cor à lûŋ, cor ca à ba yì nyor. 24Banɛ àmbò cor ce yu'ni nè Krǎis nà, yi yu yɛɛnì enɛ bbyèŋge a yu'ni nè bduu wap à buu wɛɛwɛ.

25Mmbaŋrù, kòŋ nè wee bbyèŋge àmbò Krǎis ye ye à m kòŋ côr, a fa yi tu àtu mo nà, 26tɛ cor anà bo ba jɛɛ. E m lòr mdip ce yu blǎa Nyʉ̀ a gee cor à ba nrara àgho, 27tɛ e lor fa nè yì nyor àmbò ŋgwagǔu mbòŋmboŋ ce e yu nyɛɛnì, a ba nrara, a tʉr fàa koo mʉcàr ka'. 28Mmbaŋrù foŋ a ba kòŋ wap bbyèŋge àmbò a kòŋ wap mnyor nà. Ŋwɛ̀ à ka' koŋ ŋgwa yì, banɛ e kòŋ yì nyor. 29(Ŋwɛ̀ à m be baa yì nyor ka'. Ŋwɛ̀ e lò nyaŋ yi tu, ker fyɛ' à yì nyor àmbò Krǎis e ke gèe nè cor nà. 30E ke gèe wa'a njobè' cor yu yì nyor. Sèe ce sèe yu ŋgǎa côr, sèe yu mŋgʉ̀' mo' efa yì nyor.) 31Yi ku ba àmbò a saŋ mbe Ŋwǎ' Nyʉ̀ enɛ̂, “Yi ka' ba wa'a, banɛ mbaŋrùŋwɛ̀ be mà'shi yì ta ba yì mâ, cu a ŋgwa yì, tɛ a ye a ba ŋwɛ̀ mò'sir” nà. 32Yi yu àtɛ̀r à ryu' blàa ca ka'. Mɛ̀ yɛ ya mɛnɛ vi kùu Krǎis ba yì côr. 33Vi kùu nduu a nje foŋ. Banɛ mbaŋrùŋwɛ̀ koŋ ŋgwa yì àmbò e kòŋ yì nyor, tɛ njeŋwɛ̀ yu'ni nè nduu yì.

Currently Selected:

Ñwaè' Áfásoès 5: LNT

Highlight

Copy

Compare