Ñwaè' Áfásoès 4

1Mɛ̀ ce m yu ŋwɛ̀ shaŋ njo' Tata Jisòs, m ce bu' mmbo nè wèe enɛ wèe gee ŋgèe ce yi ghɛɛte à ŋgèe bèe ce Nyʉ̀ à kɛ' enɛ a ba yì bèe. 2Lòr nè wee mnyor njep nshè, ba mʉnyaŋ, kur ntee. Koo nè fàa ce bfʉr a gèe, nje nyor, njo' wèe kòŋni. 3Ghèter nè cu nè cumʉnyaŋ-ŋwɛ̀ tɛ wèe bo cu àbee àmbò bèe ce Yʉ' Nyʉ̀ yi gèe a ba ŋwɛ̀ mò'sir. 4Nyor Jisos Krǎis yu mò'sir. Yʉ' Nyʉ̀ yi ba e mo'sir. Yuu ce Nyʉ̀ à m kɛ' sèe, sèe à lɛ mmir mbendù mo yi ku ba e mo'sir foŋ. 5Tata yu mò'sir, rbyemì li ba rmo'sir, bàptir à ba mò'sir, 6Nyʉ̀ ce e yu Tàr nè bèe wɛɛwɛ à ba mò'sir foŋ. Yu ye ce e tʉr ŋger mbendù bèe wɛɛwɛ, à ba ye ce e lòr bèe wɛɛwɛ a ce gèe mi mfà' àgho, a ker ba foŋ njep bèe wɛɛwɛ.

7Geewa'a, ŋwɛ̀ wɛɛwɛ à koni ŋger à ndèe ce Jisòs Krǎis à fa. 8A mbùu ce a saŋ mbe Ŋwǎ' Nyʉ̀ enɛ̂,

“E m ko' mbekì a gee bèe ce e m so a du a yě mbùu,

a fa mfa nè bèe foŋ.”

9Àmbò a saŋ enɛ̂, “E m ko' mbekì” na, banɛ yi yu ba enɛ kɛ? Yi yu ba enɛ e m kɛ̀' entombì a suu embe dì' ce e m ba, a ba'si njep nshè. 10Ŋwɛ̀ ce e m sùu anà ku ba ye ce e m ko' mbekì a caa rbuu tɛ e bo ba à bdì' wɛɛwɛ, tɛ buu wɛɛwɛ ghɛɛte àmbò vi ba ba. 11Ku ba ye ce e m fa mfa nè bèe. E m fa rfa nè bèe mo' enɛ wowèe a ba ŋgǎa ntuu, a fa nè bèe mo' enɛ wowèe a suŋ bèe buu ce Nyʉ̀ à gèe wowèe a rîŋ, a fa nè bèe mo' enɛ wowèe a kar mbekì fe'shi Nsuŋ Mbòŋmboŋ, a fa nè bèe mo' enɛ wowèe a ke'ni ŋgǎa rbyemì, ker yɛ'ni wowèe. 12E m fa mfa ca tɛ bèe Nyʉ̀ a bo rìŋ à rgèe li rfà', tɛ ŋgǎa rbyemì ce a yu nyor Jisos Krǎis nà a bo tap, 13caar dù bà' à nfè' ce sèe be ba ŋwɛ̀ mò'sir à lisèe rbyemì ker ba à buu ce sèe à rìŋ àmbò Muu Nyʉ̀. Sèe ka' cu wa'a, yi gee sèe ghɛɛ, misi ba yɛɛnì àmbò Krǎis yu nà. 14Yi ka' ba wa'a, banɛ sèe be kèr ba àmbò bghàrbèe ka'. Bèe a ka' ce bo' sèe nè ryɛ'nì mnde', sèe bo dà' ka'. Wowèe a ka' lor ba bfee kwɛ̀ɛ ce tà' tù'si sèe àgho, sèe bo cì'ti àmbò yuu ce yi ke cì'ti à nfè' fu' yi ce càa nà ka'. 15Banɛ sèe à ba ce kòŋ bèe, ce làa ba yuu ce yi yu mini, ce gèe yi, tɛ sèe bo kù' ba àmbò Jisos Krǎis ce e yu tu nà, à mnjì wɛɛwɛ. 16Tu yi ka' tʉr nyor àmbò byùŋ nyor vi ke cʉ'te nyor, gee nyor ba mò'sir nà, mŋgʉ̀' nyor wɛɛwɛ vi ce fà' àmbò vi ba ce fà', banɛ nyor wɛɛwɛ be ku', tap. A mbò nyor Jisos Krǎis yu wa'a, ce ŋwɛ̀ wɛɛwɛ à ka' koŋ bèe mò'.

17Banɛ m ce làa nè wèe tatap sê, à rlii Tata Jisòs enɛ wèe fa cu njɛ̀ɛ rcu ce bèe ce a rìŋ Nyʉ̀ ka' a ce cu nà ka'. Map mkwà'shì yu mkwà'shǐ cicì. 18Wowèe a ce cu à tʉ̀'nji, a tʉr ka' mʉ bɛbɛ' efa ryòŋ ce li lò ese Nyʉ̀ ka', njobè' wowèe a tèe btu, a riŋ yuu ka'. 19Wowèe a ker tʉr rìtu ka'. Wowèe a niŋ njep mʉ̀ bsàrbuu, a koŋ à rgèe vi à nfè' wɛɛwɛ.

20À ka' ba yi àmbò wèe, cena yu yuu ce a yɛ'ni wèe a kuu Jisos Krǎis ka'. 21M ce kwà'shi mɛnɛ wèe à yu' yì nsuŋ, a yɛ'nì wèe buu ce vi yu mini, à ba buu ce vi kùu ye. 22Banɛ wèe co' ŋgǔp nrʉ̀ʉ ce e m gèe wèe à ce gèe njɛ̀ɛ ŋgèe ce wèe à m gèe nà. Buu bbebep ce vi bo' wèe, wèe à ce kòŋ à rgèe vi nà vi bepsi wèe. 23Mà'shi nè tɛ Nyʉ̀ kupse wee mntee tɛ wèe bo tʉr mkwà'shǐ mfi. 24Yar nè ŋgǔp nfi ce Nyʉ̀ à gèe e feesè ye. Ŋgǔp nfi ca yu ŋgěe mini ce yi yu yɛɛnì a ker ba rara.

25Banɛ wèe fa ce nya' mnde' ka'. Ŋwɛ̀ wɛɛwɛ laa ba yuu mini nè nfʉr yì njobè' sèe wɛɛwɛ yu mŋgʉ̀' nyor efa nyor Jisos Krâis. 26Ntee yi ka' bep wɛ̀, à fa mà'shi yi gee tɛ à gee yuu bebep ka'. Fa cu nè ntee bebep ca caar nyʉ̀ coo ka'. 27Fa fa fɛŋ nè Satàn ka'. 28Ŋwɛ̀ ce e m ba nyɛ̀ɛ borni byɛ̀ɛ, ce fa' nè mi mmbo à njǐ yɛɛnì, tɛ e bo koni yuu ce àde' e ja' ŋgǎa fùp àgho. 29Fa làa blǎa bebep ka'. Làa ba yuu bòŋboŋ ce àde' yi ja' ŋwɛ̀, tɛ wo blàa anà vi bo vʉ̀ nè rbòŋ nè bèe ce a yu' vi. 30Fa gèe tɛ ntee yi yaŋ Yʉ' Rara ce yu Yʉ' Nyʉ̀ nà ka'. Nyʉ̀ à fa yi nè wèe àmbò ncòo, yi ce dùŋshi enɛ be ba à nòŋ mo' tɛ Nyʉ̀ tee wèe efa ŋgɛ'. 31Mà' nè ncɛpntee, ba rshentee, ba ntee bebep, ba mlap, ba mnsa'ni. Ŋwɛ̀ fa kèr yu' ryaŋ nè nfʉr yì ka'. 32Gèe nè ŋgěe bòŋboŋ nè bèe mò', koosimnse nè wowèe, foosi wowèe foŋ àmbò Nyʉ̀ à m fòosi wèe njo' Jisos Krǎis nà.

Currently Selected:

Ñwaè' Áfásoès 4: LNT

Highlight

Copy

Compare