Ñwaè' Áfásoès 3

1À ka' ba njobè' Nyʉ̀ à gèe wa'a, mɛ̌ Pôl, m ce loo nè wèe. M yu ŋwɛ̀ shaŋ njobè' m yu ŋwɛ̀ rfà' nè Jisos Krâis, a ce fà' nè wèe ce wèe yu bèe enje jɛɛ. 2M ce kwà'shi mɛnɛ wèe à m yu' wɛɛ enɛ Nyʉ̀ à m ce mɛ̀ enɛ m suŋ wèe àmbò ntee bòŋboŋ ce e tʉr nè wèe. 3Nyʉ̀ à m dùŋshi mɛ̀ buu ce àde' ŋwɛ̀ à m ba riŋ ka', mɛ̀ riŋ vi. Mɛ̀ saŋ a suŋ wèe mʉ mmo' efa gho. 4Wee à ka' be' buu ce mɛ̀ saŋ nè wèe na, wèe yɛ enɛ yuu ce àde' bèe a riŋ kuu Krǎis ka' nà, m rìŋ yi bòŋboŋ sê. 5À m ba entòmbì, Nyʉ̀ à gee bèe a riŋ yuu anà ka'. À ka' ba sè'ni na e tuu yi yʉ' yi gee yì bèe ce e m ce à ŋgǎa ntuu, ker ba bèe ce a ce suŋ bèe buu ce Nyʉ̀ à gèe wowèe a riŋ nà, a riŋ yuu anà. 6Yuu anà yi yu enɛ bèe enje jɛɛ a be koni bghònì ce Jus a koni nà foŋ. Wowèe foŋ a yu ŋgʉ̀' mò' efa nyor Jisos Krâis. Wowèe a be koni buu ce Nyʉ̀ à m kà' nè yì bèe ce a yu àbee a Jisos Krǎis wèe. Yuu ce yi gèe bèe à ka' riŋ buu ca yu Nsuŋ Mbòŋmboŋ àmbò Jisos Krâis.

7Nyʉ̀ à m ce mɛ̀ enɛ m fe'shi Nsuŋ Mbòŋmboŋ anà. À ka' ba njobè' e m tʉr ntee bòŋboŋ nè mɛ̀, e m lòr yi ŋger a fa' njep mɛ̌ ntee, a fa mɛ̀ rfà' ca enɛ m gêe. 8Ka' m yu ŋwɛ̌ ŋkɛ' efa mʉ̀ bèe Nyʉ̀ wa'a, e fa mɛ̀ rfà' ca enɛ m fe'shi nè bèe enje jɛɛ wɛɛwɛ, suŋ wowèe buu bbòŋboŋ ce vi lò ese Krâis, ce yu buu ce àde' ŋwɛ̀ riŋ ka'. 9E m ce mɛ̀ enɛ m gee tɛ bèe wɛɛwɛ a riŋ buu ca, ce yu buu ce vi m ba tɛ ŋgòŋ yi ka' kè ba. Nyʉ̀ ce e m gèe buu wɛɛwɛ à m kupshi buu ca a lɛ̂, bèe a riŋ vi ka', 10enɛ nfè' e sè'ni na ka' ghɛɛ àmbò e ghɛɛ na tɛ e bo lòr cor gèe tɛ bèe embe bùu ce a yu btu, ba bcìndap Nyʉ̀ ce bgòrgòr a riŋ bfee ce Nyʉ̀ tʉr à buu wɛɛwɛ. 11A mbò Nyʉ̀ à m gèe buu ce e m kupshi a lɛ efa rkɛ̀' wa'a, buu anà à geetì à nfè' ce e m tuu Jisos Krǎis ce e yu yìsèe Tatâ. 12Yu njo' ye ce sèe ce sèe wowèe yu ŋwɛ̀ mò'sir à koni fɛŋ à rvʉ̀ àgee Nyʉ̀, tɛɛ a yě bsii nè ŋger-ŋwɛ̀ njobè' sèe à byemi nè ye. 13Yi ka' ba wa'a, mɛ̀ ce bu' mmbo nè wèe enɛ wèe fa sɛ̀ njo' ŋgɛ' ce m ce yɛ fa wěe btù na ka'. Wèe be koni sɛ' efa ŋgɛ' anà.

14A mbùu ce m ce gʉ̀'shi njeptii Tàr 15ce bèe embe bùu ba bèe enjep nshè wɛɛwɛ a yu àgho njo' ye. 16M ce loo nè Nyʉ̀ ce e tʉr bkù' sê, enɛ e fa wèe yi yʉ' tɛ yi bo gèe tɛ wee mntee vi ba btatap, 17tɛ Jisos Krǎis cu njep wěe mntee àmbò wèe à byemi nè ye na. M ce loo mɛnɛ wèe taa mŋgàŋ, tɛɛ tatap à rkòŋnì, 18tɛ wèe ker ba bèe Nyʉ̀ wɛɛwɛ bo rìŋ ku' njɛ̀ɛ rkòŋnì ce li bɛ̀r à bke', a sap kùyɛɛ, a sap a ko' mbekì, a coomi a caa ŋger. 19Ka' njɛ̀ɛ rkòŋnì anà li càa ŋger ŋwɛ̀ à rrìŋ wa'a, m ce loo mɛnɛ wèe riŋ li, tɛ buu bbòŋboŋ ce vi ruu njep ntee Nyʉ̀ nà vi bo ruu njep wěe mntee foŋ.

20Wɛ̌ Nyʉ̀ ce wɛ̀ lòr yo ŋger a ce fà' àgho njep wěr mntee gòr sê, Wɛ̌ Nyʉ̀ ce wɛ̀ tʉr ŋger à rgèe caa embe dì' wèr à bipshi kɛ̀ embe dì' wèr ce kwà'shi ɛ̀, 21tɛ bèe a ku'si wɛ̀ njo' cor ker ba njo' Jisos Krǎis à nfè' wɛɛwɛ. Yi yu wa'a.

Currently Selected:

Ñwaè' Áfásoès 3: LNT

Highlight

Copy

Compare