BAROMA 1
1
Tumedišo. Paulo o rata go tla Roma. Timelo ya Bantle
1Paulo mohlanka wa Jesu Kriste, Moapostola wa go bitšwa le go hlaolelwa Ebangedi ya Modimo, 2yeo a bego a re holofeditše yona ka baporofeta ba gagwe Mangwalong a makgethwa, 3ona a go bolela Morwa wa gagwe e a tswetšwego e le wa leloko la Dafida ka nama, 4a bonala e le Morwa wa Modimo ka maatla le ka Moya wa bokgethwa, le ka go tsoga bahung, yena Jesu Kriste mong wa rena. 5Ke yena a re filego kgaugelo le boapostola, gore mo go bohle bantle go be le ba ba mo kwago ka tumelo, gore a tle a be le leina. 6Gomme le lena le ba mohuta woo wa babidiwa ba Jesu Kriste.
7Nna Paulo ke ngwalela lena ba motseng wa Roma, lena baratiwa ba Modimo, lena bakgethiwa ba ba biditšwego bohle.
Kgaugelo a e be le lena le khutšo e tšwago go Modimo Tata wešo le go Morena Jesu Kriste.
8Ke thoma ka go leboga Modimo wa ka ka Jesu Kriste ge ke bona lena bohle, tumelo ya lena ge e bolelwa mo go fela lefaseng. 9Gobane hlatse ya ka ke Modimo yo ke mo direlago moyeng wa ka go kwatša Ebangedi ya Morwa wa gagwe; o tseba ge ke sa kgaotše go le gopola, 10ge ke fela ke kgopela merapelong ya ka, gore ge Modimo a rata, ke be ke bulelwe tsela ya go tla go lena. 11Gobane ke hlologetšwe go le bona, gore ke le hlallele neo ya Moya, e be go le tiiša. 12E tlo ba go emelana ka tumelo ya rena, go le ya lena, go le ya ka.
13Gomme, bana, bešo, ga ke rate go le utela ge e šetše e le gantši ke re ke tla go lena, mme ka šitišwa; ke rata go bona seenywa sa lena, bjalo ka ge ke se bone ditšhabeng tše dingwe. 14Ke kwa eke ke tlemilwe gore ke hlankele Bagerika le ba mehuta e šele, le ba bohlale le ba ba se nago bohlale. 15Le bjale, ge e le ka nna, ke phegeletše gore le lena ba Roma ke le botše Ebangedi.
16Gobane ga ke na maseme ka Ebangedi ya Kriste, hleng e le maatla a Modimo a go phološa mang le mang e a dumelago, go thoma ka Bajuda, go iša pele ka Bagerika. 17Gomme ka yona Ebangedi go utollwa toko ya Modimo e tšwago tumelong e iša tumelong, bjalo ka ge go ngwadilwe gwa thwe: Moloki o tlo phela ka tumelo.
18Ge e le bogale bja Modimo bo etšwa legodimong, bo bonala bo okametše bohle ba go se boife Modimo, le batho ba bokgopo, ba ba dibago therešo ka bokgopo. 19Gobane tše di tsebegago tša Modimo, le go bantle di pepeneneng, ka ge Modimo a di beile pepeneneng mo go bona. 20Hleng tše di sa bonwego tša gagwe, a lego maatla a neng le neng, le bomodimo bja gagwe, le tšona go tloga tlholong ya legohle, ba ka di hlatha ka go bona ditiro tša gagwe, mme ba hloka tše ba kago latola ka tšona. 21Gobane, le ge Modimo ba mo tsebile, ga ba ka ba mo godiša ba re ke Modimo, ga ba ka ba mo leboga. Ba išitše megopolo lefeleng, dipelo tša bona tša fifala di šilofetše. 22Ba šilofetše mola ba bata mahlale. 23Letago la Modimo Mosefetoge, bakeng sa lona ba beile swantšho sa mothomofetile sa nonyana, le sa phoofolo, le sa digagabi.
24Modimo a ba a ba lesa ba ya le dikganyogo tša dipelo tša bona, ba tsena ditšhileng ba ikgoboša mebele. 25O ba bone ba hlanogetše therešo ya Modimo ba ya le maaka, ba ipega go dibopša ba di hlankela, ba hladile Mmopi Moretwa wa mehleng. Amen.
26Molato ke wona woo ge Modimo a ba gafa ba ya le ditumo tše di lešago dihlong; basadi ba bona ba tlogela modirelo wo ba o bopetšwego, ba tšea modirelo wo ba sa kago ba bopelwa wona; 27banna ba tla ba tlogela modirelo wo ba o bopetšwego wa go dula le mosadi, ba fišegelana monna a duma monna, ba dira tša dihlong; gomme kotlo ya phapogo ba e bona mebeleng ya bona.
28Ke ka gobane ba nyaditše Modimo, ba nyatša go mo tseba. Modimo a ba lesa ba ya le kgopolo tša lefela, ba dira tše di sa dirwego, 29ba tletše bobe bjohle, le bootswa, le bohlola, le megabaru; ba tletše mona le bobolai, le mereba, le maaka, le bomenetša; 30ke ba ditshele, le bophari; ke manaba a Modimo; ke ba lonya; ke baikgogomoši, baikgantšhi, balogi ba mašula, ba go se kwe batswadi; 31ga ba na mogopolo le potego; ga ba na botho le kgaugelo. 32Toko ya Modimo ba a e tseba. Ba tseba le gore badiri ba tše bjalo sa bona ke lehu. Le ge go le bjalo ba di dira, ba thabela ba ba di dirago.
Currently Selected:
BAROMA 1: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.