YouVersion Logo
Search Icon

OBADYA 1

1
Kotlo e tlogo tlela Edomo
1Pono ya Obadya. Se Morena Mong a bohle a se bolelago a era Edomo. Re kwele lentšu le le tšwago go Morena. Motseta o romilwe a ya dithabeng a re: Tsogang re yo hula felo fao. 2Tseba gore ke go dira e monyane gare ga ditšhaba, wa tlo nyatšega gagolo. 3O forilwe ke boikgantšho bja pelo ya gago, wena modulamariba a mantswe. Wa re o agile kua tletlolo, mo pelong ya gago wa re: Ke mang a kago ntheolela fase? 4Le ge o ka akalala bjalo ka lenong, wa aga sehlaga sa gago kua gare ga dinaledi, ke tlo go fološa moo. O realo Morena. 5Ge o ka tlelwa ke mahodu bošego, le ge e le bahlakodi, a e ka se be go senyegelwa? A ga ke re bona ba ka utswa tše ba lekanego? -- Mme ge o ka tlelwa ke ba go fula kenyo tša gago, a ba ka se go šiele dipudutša? 6Mme bjale Esau ba a mo fenyeka; go fuputšwa le matlotlo a a fihlilwego. 7Banna bohle ba o bego o lakane nabo ba go iša mellwaneng; ba go forile bohle ba o bego o gwerane nabo; ba go kgonne. Ba ba bego ba eja bogobe bjago, ba go epetše moreo. -- Ga a di hlaloganye. 8Ka kgonthe, Morena o itše: Mohla woo ke tlo ba ke fedišitše ba bohlale ba Edomo, le ba tlhaloganyo dithabeng tša ga Esau. 9Hee Themane! Bagale ba gago ba nolegile moko, gore dithabeng tša Esau banna ba fele ka molato wa polao. 10Molato ke sehlogo wa go se dira Jakobo ngwaneno, ge bjale o nyatšega, o le wa go fedišwamoka. 11Ke tša mohla wola o eme o lebeletše, ge manaba a thopa thoto ya gagwe, ge bantle ba tsena dikgorong tša gagwe, ba tšea tša Jerusalema ka matengwa. Ke ge wena o le gona, o na le bona. 12O ka be o lesitše go nyankela mohla woo wa tšatši la kotsi ya gagwe; o ka be o lešitše go sega ba ga Juda mola ba senyega, o lešitše go ba kwera mohla wa patikego. 13O ka be o lesitše go tsena ka kgoro ya setšhaba sa ka, o lesitše go tla le wena, wa thabela kotsi ya bona ba šaraketšwe; o ka be o lesitše go iša dithoto tša bona seatla mohla woo wa molahlego wa bona. 14O ka be o se eme difateng o fofotša baphonyokgi ba bona; e ka be mohla woo wa dikgakanego o se tlemiše mašalela a bona. 15Ka kgonthe, le kgauswi tšatši la Morena la go tlela bantle bohle. Tše o di dirilego, o tlo dirwa tšona; mediro ya gago e tlo go ana hlogo. 16Gobane bjalo ka ge le nwele thabeng e kgethwa ya ka, ditšhaba ka moka di tlo nwa ka mehla di bolabola tša lefela, gomme gwa tlo ba eke di be di se gona. 17Fela, thabeng ya Tsione go tlo ba bophologelo, e tlo ba e kgethwa; mme ba moloko wa Jakobo ba tlo ba le magae a bona. 18Moloko wa Jakobo e tlo ba mollo; moloko wa Josefa e tlo ba kgabo; mme moloko wa Esau e tlo ba makobi; ba tlo a tšhuma ba a fiša. Go ka se ke gwa šala mophonyokgi wa moloko wa Esau; gobane Morena o boletše. 19Ba thoko ya borwa ba tlo tšea thaba tša Esau; ba molaleng ba tlo tšea naga ya Bafilisita; le naga ya Efuraimi le ya Samaria e tlo ba ya bona; mme ba Benyamini ba tlo tšea Gileada. 20Ba ba bego ba thopilwe go mašaba a a Baisiraele, ba tlo tšea naga ye e lego ya Bakanana go fihla Tsarepata; mme mathopša a Jerusalema a a bego a le Sefaradi, a tlo tšea metse ya thoko ya borwa. 21Bahlakodiši ba tlo rotogela thabeng ya Tsione, ba buša ba dithaba tša Esau; mme bogoši e tlo ba bja Morena.

Currently Selected:

OBADYA 1: NSO51

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy