MIKA 1
1
Go thopiwa ga Isiraele le Juda
1Lentšu la Morena le le tletšego Mika wa Moresethe mehleng ya Jothama le Ahasi le Hiskia dikgoši tša Juda, le tše a di bonego di ela Samaria le Jerusalema. 2Hee lena ditšhaba, kwang ka moka ga lena! Hee wena lefase, le tšohle tše di lego mo go lona, theetšang! Hlatse ye le lebanego nayo ke Morena Mong a bohle a le mo Ntlong e kgethwa yagwe. 3Tsebang gobane Morena o tlo tšwa felo ga gagwe, o tlo fologa a gata dirwaolo tša lefase. 4Ge a gata, dithaba di tlo tologa, meedi e tlo fatoga, gwa tlo etša mola moti o le mollong, meetse ge a tšhologela leribeng.
5Tše ka moka di tla ka phapogo ya Jakobo, le ka dibe tša moloko wa Isiraele. Diphapogo tša Jakobo e sa le tše dife, ge e se tša Samaria? Mme meboto ya medimo ya Juda e kae, ge e se Jerusalema? 6Gomme Samaria ke go dira mokgobo wa maswika megoleng, ke go dira malemo a merara; maswika a gona, ke tlo a kgatlela lengopeng; ke tlo go epolla le metheo. 7Swantšho tšohle tša medimo ya gona di tlo pšhatliwa; theko tšohle tša maotswa a gona tša fišwa ka mollo, pheko tšohle tša gona ke tlo di dira sethobolo; ka gobane e be e le theko tša bootswa; mme di tlo buša di eba theko tša bootswa.
8Ke tšona tše di ntedišago ka gogolo; ke sepela nao di le fela, ke apotše kobo, ke hlaboša sello wa phukubje, ke tsetsela boka mpšhe, 9Ka gobane dintho tšagwe ga di fole; di bile di fetetše Juda, di fihlile dikgorong tša setšhaba sa ka, le Jerusalema.
10Le se ke la botša ba Gathe, le lese le go lla; ba Bethe-Afara le bopologe leroleng. 11Hee lena ba Safira, tlogang moo le hlobotše wa dihlong; ba Tsamana ga ba tšwele ntle; dillo tša Bethe-Etsele di ba hlokiša modula. 12Ba Marothe ba ba boifa go ka tlogwa ke tše botse, ka gobane kgoro tša Jerusalema di wetšwe ke bošula bo etšwa go Morena. 13Lena ba Lakisi bofang dikoloi tša dipitsi tša lebelo; sebe sa ngwanana wa Tsione se thomegile moo; mo go lena go hweditšwe diphapogo tša Isiraele. 14E be e le tšona, ge le iša dimpho Moresethe-Gathi; dintlo tša Akasiba di fora magoši a Isiraele.
15Lena ba Maresa ke le tlišetša mong e mongwe; letago la Isiraele le tlo fihla Adulama. 16Dutulwa o ntšhwe diubu, o llele bana bago ba baratwa; lefatla lago a le etše la lenong, gobane ba thopilwe ba go šia.
Currently Selected:
MIKA 1: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.