2MAKABE 7
7
Pag ne a kamb a yopoe kuum
1Daar a ye, b waa n yõka pag ne a kamb a yopoe. Dĩma da ratame tɩ b modg-b tɩ b wãb kurkuri. Sebra pʋgẽ kurkur yaool n yaa rũn-dẽgdo. A kɩtame tɩ b pãb-b ne sãbse la kaase. 2Bãmb nin-yend n leok b taaba fãa yĩnga: «Bõe la f sokd tõndo do, bõe la f rat n bãng d nengẽ? Tõnd saka kũum n yɩɩd d dog-n-mika kɩɩsgo.» 3B leokra puuga dĩma sũuri t'a kɩt tɩ b rʋglg kut rʋgd la kut laase. 4B sẽn waa n kɛɛda, a kɩtame tɩ b wãag sẽn gom-a wã zelemde, n pilg a zu-gãongo la b fiuus a nus la a nao ta ma wã la a ma-biisa yɛs n getẽ. 5B sẽn fiuus n sɛ, dĩma kɩtame tɩ b pẽneg bugma n gãneg-a vɩɩga bãn-dibli wã zugu. A yĩnga sẽn dɩt bugma yũug sẽn waa n wulumdi, a saam-biisa ne a ma wã ra kengda taab sũuri n na n ki ne raoodo. B ra yetame: 6«Wẽnd neeme la sɩda, b pa get yella sẽn pak tõndã wa b toog ka ye. Pʋs n yaa rẽ la a Moyiiz tõog n gʋls a yɩɩla sebr pʋga, a sẽn waa n sagend Zʋɩf rãmbã n wilgd-b tɩ Wẽnd na n zoe-la b yemsa nimbãanegã.»
7Pipi biiga sẽn ki, b boola kãsem-pʋgdgã. B pulga yẽ me zu-gãongo la b sẽn sok-a: «Fo pa rat kurkur n wãbe, n põs namsg ning d sẽn na n nams-fo, n sɛ wilg a ye n long wilg a to wã?» 8A leokame, ne a buud goama: «Ayoo!» Tɩ b na n nams yẽ me namsg buud toor-toore. 9A sẽn waa n na n ki a yeela dĩma: «Fo yaa nin-yoogo, fo kʋʋda tõnd dũnna la dũni wã Soaala na vʋʋg-do n kõ-d vɩɩm sẽn kõn sɛ tɩ yaa bãmb noor deegr yĩng la d kiida.» 10Yẽ poore, a tãab soaba la b nams yã. A sẽn ta tɩ b yet t'a yiis a zelemde la a tud a nusi, tɩ b fiuusi, tao-tao bala a sakame. 11A leoka ne sũ-keelem: «Yaa Yĩngr-Soaala n kõ maan m yĩnga wilsi; m saka b fiuusgu, b noora deegr yĩnga la m saagdame tɩ daar a ye b na le lebs-b-ma.» 12A sũ-keelma, a sẽn ka zoe namsg ba bilfã yɛɛsa dĩma ne a poorẽ dãmba. 13Yẽ sẽn ki, b namsa a naas soaba ne boto. 14Ad yẽ me sẽn leok bũmb ninga n yaool n ki: «Fo sẽn na n bas tɩ ninsaalb kʋ-fo tɩ f saagda wala b sẽn kãabe tɩ f na waa n vʋʋg daar a ye, ad rẽ n são wʋsgo, tɩ fo nengẽ wã yẽ, vʋʋgr ka na n vʋʋg ye.» 15B waa ne a nu soabã n nams yẽ me. 16Yẽ gẽena dĩma n yeel-a: «Fo me yaa nin-kiidga ne f sẽn dɩt naama, n maand f sẽn date. Da saag n tẽ tɩ Wẽnd basa tõnd buuda ye. 17Fo ye n tõog f menga tɩ f na yãe Wẽnd pãnga. F na yãe b sẽn na n maan foo ne f buuda bũmb ninga.» 18Yẽ poore, a yoob soabã n kolge la a sẽn waa n kolg kũum, a yeelame: «Da belg f meng ye, tõnd n baoo d namsgo la d namsda, tɩ tõnd n beeg d Wẽnde; yaa rẽ la yel-beed lʋɩɩ d zugu. 19Da geel tɩ f na põs sɩbgr ye tɩ yaa ne Wẽnd la f tak zabre.»
20Sẽn toga ne pẽgr zãng zãnga, sẽn ka tog tɩ b yĩm a yell abada yɩɩ ma wã. Yɩɩ wĩnto-yɛng la b kʋ a kambã a nifẽ. A sakame, t'a rɩka yɛla fãa n bas ne Wẽnde. 21A ra kengda a kamba sũuri ne a buuda goama. A ra sagenda wa rao sẽn ka yɛɛsd sẽn kʋrd ye, n sagendẽ tɩ rogem waood sidgd a yĩnga. A ra yet-b lame: 22«Biig rogem pida ne yel-soalma; ka maam n kõ vʋʋsem la vɩɩm ye, ka maam n sigl yĩnga wils ye. 23Yaa rẽ la m saagda tɩ bũmb fãa Naandã sẽn yiis ninsaal moogo la b be bũmb fãa sɩngrẽ, la a baoosgẽ, na lebs yãmb vʋʋsem la vɩɩm tɩ b nimbãan-zoeer labsa la y sãbsa vɩɩma b noya deegr yĩnga.»
24A Antiyokus gesame tɩ paga goama yaa wa a meng tʋʋr la a paoogre. Nugẽ biiga ra ket n vɩɩme; woto a Antiyokus gomame n na n sagl-a. A tol n wẽename n kãab-a t'a na kõ-a arzɛka la a na yãend sũ-noog buud fãa a sã n bas a yaab rãmba rog-n-mikã; a na n lebga a zoa la a na n kõ-a-la tʋʋmd sẽn zẽkd neda. 25Biiga yaool n da pa kelgd a goama meng ye. Dĩma kɩtame tɩ biiga ma kolge n yeel-a t'a sagl a biigã t'a paam n põse. 26Dĩma sagla biiga ma n kaoose t'a yaool n wa sake n na n gom ne a biigã. 27A belga dĩma n kɩll a biiga tʋbre n togs-a woto ne buuda goama: «M biiga, zoe f ma wã nimbãanega, sẽn zãa foom a pʋgẽ kiis a wɛ, n kõ-f bĩisim yʋʋm a tãabo, n dɩlg-f la a wub-f n tãag rũnna. 28M kot-f lame, m biiga, ges yĩngr la tẽnga, ges b sẽn pid ne bũmb niynsa fãa, la f reeg tɩ Wẽnd n yiis sẽn da ka be la b yiisa ninsaal me boto. 29Dɩlla ra zoe nin-kʋʋd kãnga ye. Maan daood wa f kẽem dãmbã, sak kũum, tɩ nimbãan-zoeer Wẽnda sã n wa yals b raarã, bɩ m yãend-f bãmb sɛɛgẽ!»
30Paga ka yãe n gom n baas la biiga sẽn soke: «Yaa bõe la y gũuda? Ka rĩma noor la m tũud ye, m tũuda a Moyiiz sẽn kõ noor ning d yaab rãmbã. 31Bãng tɩ tũu ne foo la yel-beeda sẽn lʋɩ Ebre rãmba zugu la fo menga ka na põs Wẽnd sɩbgr ye. 32Toog sã n tar tõndo, yaa d yel-wẽna yĩnga. 33Sã n yaa tõnd yel-wẽna yĩnga la b tʋlg n sɩbg-do la b wilg-d yam, d Soaala sẽn vɩ wã, puuga b sũura bilf ne-do la b na n le wa zemsa ne b sõgen-kamba. 34La sã n ya foo, wẽn-kɩɩs la wẽnem sẽn ka be taar soaba, da wuk zaalem ye, da belg f meng ye, da zẽk f nug zaalem Wẽnd sõgen-kamba zug ye 35tɩ Wẽnd pãng soaba nee fãa la f ka na n põs b bʋʋd ye. 36Tõnd saam-biisa lʋɩɩsa zooda ne Wẽnda taoore n sak toog bilfu n tẽed vɩɩm sẽn kõn sɛ, la sã n ya foo, ad Wẽnd na n kao-la f bʋʋdo la f wilg-m-menga na reeg a sɩbgre. 37Sã n ya maam, m dɩkda m yĩngã la m vɩɩma, n kõt bãmba m buuda dog-n-mik kõn sãam yĩnga. La m kota Wẽnd tɩ b zoe d buuda nimbãanega la b tall fo menga, pɛt la a namsg pʋgẽ tɩ f wa tẽ tɩ bãmb b ye bal la Wẽnde. 38Wẽnd sã n tar bʋʋm n puug b sũur ne d buudã, m kot-b lame tɩ b sũ-puura yaa n yãend a tɛka, n yãend a tek ne maam la m kẽem dãmbã!»
39Dĩma sũur fudgame t'a na n naams bi-kãng n yɩɩg a kẽem dãmba, bi-kãnga leokra zab-a-la wʋsgo. 40Bi-kãng kii woto n pa tol n dẽgem a menga, n dɩk a meng n bas Wẽnd nugẽ zãnga. 41Dẽ marsã la ma wã pʋgl a kambã. Yẽ n ki b poorẽ. 42M tẽed tɩ woto sekame la d na n sĩnda nams wẽna sẽn nams rɩ-yaalsa poorẽ wã.
Currently Selected:
2MAKABE 7: SSDC98
Highlight
Copy
Compare
Share
Want to have your highlights saved across all your devices? Sign up or sign in
SEBR SÕNGO © Alliance Biblique du Burkina Faso, 1998.