Kañaam 68
68
Kayeeh kadëmanaani Naşibaţi anwatuŋ başooradul
1Kayeeh ki pñaamarën Naşibaţi ki kapënna ţi ulibra wi najukan iyeeh. Kayeeh.
2Naşibaţi anaţiin, başooradul bawayşër,
banşooruluŋ baţi ţi kadunul.
3Jibi udu ujaaŋ uwayşër,
hënk di di ijaaŋ kwayëş baka.
Jibi mbeela manjaaŋ mayuuy ţi bdoo,
hënk di bañaaŋ bajooţ bakkeţuŋ ţi kadun ki Naşibaţi.
4Kë bañaaŋ banwooŋ baŧool başë wo ţi mnlilan
baŧaŋ ţi kadun ki Naşibaţi, aŧum na mnlilan.
5Nayeeharën Naşibaţi, nayeehan katim ki nul.
Nabomaan bgah bi andapiiŋ umpëlënŧ du pndiiş.#68.5 pndiiş baloŋ bapiiŧ aji : infëluŋ
Katimul kawooŋ Yawe Nawat Kabuka.
Nawoon ţi mnlilan ţi kadunul !
6Naşibaţi du ufëţ wi nul uyimanaan
awo aşin banwaaŋuŋ bajug baka,
aji yeŋan ñaaţ nayoţ.
7Ul ajaaŋ ado banlowuŋ bañaaŋ bawo na bañaaŋ.
Ul ajaaŋ ado bakalabuş bawo ţi bjeehi,
kë bampataţiiŋ başë ji baduka du mboş mnwuţaan.
8Iwi Naşibaţi, wi ipënuŋ ţi kadun ki pntaali pi nu,
wi ipoşuŋ du pndiiş...
Pnaţ ntiinku
9...kë mboş manşë şinţar,
kë baţi baktul meel ţi kadun ki Naşibaţi, Naşibaţi i Ŧinayi, Naşibaţi i Iŧrayel.
10Ido kë uşubal uweek wi bnuura ujoti ;
pntaali pi nu pabi noor kë ido pa kë pakak ahinan.
11Iwi Naşibaţi, pntaali pi nu pafëţ du dko di ibiiŋ abomandër najuuk ţi bnuura bi nu.
12Nawat Kabuka aţup uţup,
kë baaţ banjaaŋ baţup uţup ulil unuura mënţ baŧum maakan
13aji : « Başih biki bangoli bajiŋ na pţi,
kë baaţ bandukiiŋ du katoh bafaaşiir iko yi badukuŋ.
14Napiinţ du dko di ŋnŧaam ŋajaaŋ ŋapiinţ
kë ibaaklu yi ubalab ufaaŧal işë wo na unŧaam
kë iluŋ iwo na uwuuru.
15Wi Naşibaţi Anhiniiŋ Maakan agaruŋ başih,
kë mpoj manşë jot ţi pnkuŋ pi Ŧalmon. »
16Pnkuŋ pi Naşibaţi, pnkuŋ pi Başan ;
pnkuŋ panŧumuŋ inkunkaali, pnkuŋ pi Başan.
17An inkuŋ inŧumuŋ inkunkaali,
we ukaaŋ kë nakñeebar pnkuŋ pi uliluŋ Naşibaţi kë afëţ da ?
Aa, Nawat Kabuka afëţ da te mnţo.
18Ŋkaaru ŋgutni ŋi ŋmpëlënŧ ŋakpuluŋ ŋi Naşibaţi ŋawo iñeen-week ŋyaaş ŋŧum,
ŋaŧum pŧum paŋ.
Nawat Kabuka awo ţi pŧoof pi ŋa,
pnkuŋ pi Ŧinayi pawo du dko dyimanaan di nul.
19Iwi Nawat Kabuka imob bañaaŋ ado bakalabuş,
apaya bko duuţ na baka ado da ufëţ
kë baluku bañaaŋ adoo luku bampataţiiŋ.
20Bnuura bawoon ţi Nawat Kabuka na ŋnuur !
Aji ţënk nja, ul awooŋ mbuur mi nja.
Pnaţ ntiinku
21Naşibaţi awo Naşibaţi anjaaŋ aţij mbuur,
ilëman yi mnkeţ iwo yi Nawat Kabuka Ajugun.
22Aa, Naşibaţi aluŋ kafom ikow yi başooradul,
bkow banjabuŋ bi ñaaŋ anlilanuŋ ţi pla bţup pi adoluŋ.
23Nawat Kabuka aji : « Dluŋ kado baka bakakna Başan bajoob ;
dluŋ kado baka bakakna du pndiiloŋ pi bdëk bajoob,
24nahilna naneejan ihoţ ţi pñaak,
pndemënt pi ŋbuş ŋi nan payeenkna kafah ki ŋa ţi başooradu. »
25Iwi Naşibaţi, bawin ubi wi nu du dko dyimanaan,
ubi wi Naşibaţi i naan, naşih i naan.
26Bayeeh bajot kadun,
kë beegani bankkobuŋ ŋntambër ŋmpoţi,
na bankkobuŋ iko iloŋ bakţaş baka.
27Nabeeban Naşibaţi ţi byit !
Nabeeban Nawat Kabuka ţi pŧoof pi pntaali pi Iŧrayel !
28 Benyamin anwooŋ nabaaşa awuŋ ţi kadun ki baka,
babuuşiin biki Yuda na imişa yi baka inknuuruŋ,
babuuşiin biki Ŧabulon, babuuşiin biki Neftali.
29Naşibaţi i nu aţup aji iwo ñaaŋ anhiniiŋ.
Iwi Naşibaţi, diimaan mnhina mi nu manlempuŋ na un maakan !
30Du katoh kaweek ki nu kanwooŋ du Yeruŧalem duuţ di başih bakţijuŋ iko kaţenu,
31Ŋomaan na ulimariya wi bjaagal bi bdëk ;
ŋomaan na pntaali panwooŋ ji pntuni pi ŋgit ŋkaş na pi ŋbay,
panjaaŋ pakunţan pa itaka imbomanaanuŋ unŧaam.
Garan ŋŧaak ŋanjaaŋ ŋaŋal ugut !
32Bayilna bañaaŋ du Ejiptu.
Bañaaŋ biki uŧaak wi Iŧiyopiya baţiirad Naşibaţi awo na iko iŧum ţi iñen.
33An ŋŧaak ŋi mboş nayeeharën Naşibaţi !
Nayeehan nañaamarën Nawat Kabuka !
Pnaţ ntiinku
34Nayeeharën andapiiŋ umpëlënŧ du baţi duuţ, baţi bi unjon !
Natenan, ado pdiim, pdiim pi nul panwooŋ na mnhina.
35Nayikrënan mnhina mi Naşibaţi !
Awo ţi Iŧrayel duuţ, mnhina mi nul manwo du infëluŋ.
36Iwi Naşibaţi, iyibani du ŋfëţ ŋyimanaan ŋi nu.
Naşibaţi i Iŧrayel ajaaŋ awul pntaali pi nul mnhina mnweek.
Bnuura bawoon ţi Naşibaţi !
Currently Selected:
Kañaam 68: knf
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Le Groupe CIM-TBM, Senegal
